කටුනායක නිදහස් වෙළෙඳ කලාපයේ සේවයේ නිරත මත්පෙති සඳහා ඇබ්බැහි වූ තරුණයන් වෙත ඒවා අලෙවි කළ ඔසුසල් හිමියෙකු ඇතුළු දස දෙනෙකු කටුනායක පොලිසිය මගින් ඉකුත් 24 දින අත්අඩංගුවට ගෙන තිබේ.
ශ්‍රී ලංකාව තුළ දැනට ක්‍රියාත්මක යුක්තිය මෙහෙයුමට සමගාමීව කටුනායක පොලිසියේ අපරාධ විමර්ශන අංශයේ නිලධාරීන් පිරිසක් විසින් ක්‍රියාත්මක කරන ලද මෙහෙයුමක දී කටුනායක නිදහස් වෙළෙඳ කලාපය තුළ සේවයේ නිරත මත්ලෝලී තරුණයන් පිරිසක් අත්අඩංගුවට ගෙන තිබේ.
ඔවුන් රඳවා තබා ගෙන දීර්ඝ ලෙස ප්‍රශ්න කිරීමේ දී මෙම තරුණයන් හට මත්පෙති සපයන කටුනායක ඇවරිවත්ත නගරයේ ප්‍රධාන ඇඟලුම් අලෙවිසලක සේවකයින් සිවු දෙනෙකු අත්අඩංගුවට ගැනීමට හැකි වී තිබේ.
ඔවුන්ගෙන් දීර්ඝ ලෙස ප්‍රශ්න කිරීම් සිදු කර ගෙන යාමේදී කටුනායක නිදහස් වෙළෙඳ කලාපයේ තරුණයන්ට මත්පෙති අලෙවි කරන බටහිර ඔසුසල සහ මෙම ජාවාරම මෙහෙයවන එම වෙළෙඳසලේ හිමිකරු ද පොලිසිය විසින් අත්අඩංගුවට ගැනීමට සමත් වනු ලැබීය.
ඔහුට මෙම ඖෂධ අලෙවිසල පවත්වාගෙන යාම සඳහා නීත්‍යානුකූල වෙළෙඳ බලපත්‍රයක් නොතිබුණු අතර එහි සේවය කිරීම සඳහා සුදුසුකම් ලත් ඖෂධවේදියකු සහ බටහිර ඖෂධ අලෙවි කිරීම සඳහා ද ඖෂධ බලපත්‍රයක් ද තිබී නොමැත.
පසුව සීදූව ප්‍රාදේශීය සෞඛ්‍ය වෛද්‍ය නිලධාරිවරයා ද කැඳවා මෙම ඖෂධ වෙළෙඳ සල පරික්ෂාවට ලක් කළ අතර එහිදී මත්පෙති සහ අලෙවි කර අවසන් කර තිබූ හිස් මත්පෙති කාඩ්පත් විශාල ප්‍රමාණයක් ද සොයා ගෙන අත්අඩංගුවට ගෙන තිබේ.
ප්‍රාදේශීය සෞඛ්‍ය වෛද්‍යවරයාගේ සහ මීගමුව සහකාර පොලිස් අධිකාරි රත්නායක මහතාගේ උපදෙස් මත මෙම ඔසුසල වසා මුද්‍රා තැබීමට ද කටුනායක පොලිසියේ අපරාධ විමර්ශන අංශයේ නිලධාරීන් පියවර ගෙන තිබුණි.
මෙසේ අත්අඩංගුවට ගත් ඔසුසලේ හිමිකරු ඇතුළු අනෙකුත් පුද්ගලයන් දස දෙනා මිනුවන්ගොඩ මහේස්ත්‍රාත් අධිකරණය වෙත ඉදිරිපත් කර තිබූ අතර, ඔවුන් එළැඹෙන 04/01 දින තෙක් රක්ෂිත බන්ධනාගාර ගත කිරීමට නියෝග කර තිබුණි.
මෙම අත්අඩංගුවට ගැනීම සහ මේ පිළිබඳ වැඩිදුර විමර්ශන කටයුතු මීගමුව සහකාර පොලිස් අධිකාරි රත්නායක මහතාගේ උපදෙස් මත කටුනායක පොලිසියේ ස්ථානාධිපති ප්‍රධාන පොලිස් පරීක්ෂක අජිත් නිශ්ශංක මහතාගේ අධීක්ෂණය යටතේ අපරාධ විමර්ශන අංශයේ ස්ථානාධිපති උප පොලිස් පරීක්ෂක මාරසිංහ, උප පොලිස් පරීක්ෂක මොහොමඩ් නිෂ්මි, පොලිස් සැරයන් (37371) සුනිල්, පොලිස් කොස්තාපල්වරුන් වන (33249) අනුෂ්ක, (37627) කුමාර, (93015) කරුණාරත්න, (96820) සඳමාල් , (100255) සෙනෙවිරත්න සහ (102289) මධුසංඛ යන මහත්වරු සිදු කරමින් සිටිති.
