භූතානය ගෝල් 2-0කින් පරාජයට පත්කළ ශ්‍රී ලංකා ක්‍රීඩකයෝ වසර 3කට පසු ජාත්‍යන්තර පාපන්දු තරගයකදී ශ්‍රී ලංකා නාමය ඉදිරියේ ජයග්‍රහණයක් වාර්තා කරයි. අවසන්වරට 2021 වසරේ බංග්ලාදේශය ගෝල් 2-1කින් පරාජයට පත් කිරීමෙන් පසු ශ්‍රී ලංකාව ඊයේ ජාත්‍යන්තර පාපන්දු සම්මේලනයේ සහයෝගීතාව මැද කොළඹ තුරඟ තරග පිටියේ පැවැති ෆීෆා සිවුකොන් ජාත්‍යන්තර පාපන්දු තරගාවලියේදී මේ ජයග්‍රහණය වාර්තා කළේය. භූතානය අවසන්වරට වසර 2015දී ශ්‍රී ලංකාව සමඟ කොළඹ සුගතදාස ක්‍රීඩාංගණයේදී හමුවී ගෝල් 1-0කින් ශ්‍රී ලංකාව පරාජයට පත්වූ අතර, 2013දී ශ්‍රී ලංකාව විසින් ගෝල් 5-2කින් භූතානය පරාජයට පත් කරන ලදී.
එබැවින් වසර 11කට පසු භූතාන පිල ඊයේ ශ්‍රී ලංකාව හමුවේ පසුබෑමකට ලක්වීම විශේෂත්වයකි. ඊයේ තරගයේ පළමු භාගයේදී ගෝල් වාර්තා නොවූ අතර, 45 වැනි මිනිත්තුවේදී එංගලන්තයේ සිට පැමිණි ඩිලොන් ද සිල්වා හා 54 වැනි මිනිත්තුවේදී ඔස්ට්‍රේලියා – ශ්‍රී ලංකා ද්විත්ව පුරවැසි ඔලිවර් ජේම්ස් කෙලාට් ගෝල් වාර්තා කළහ. ශ්‍රී ලංකා – භූතාන තරගය නැරැඹීමට 7000කට ආසන්න පිරිසක් පැමිණ සිටීම කලකට පසු පාපන්දු තරගයකදී දුටු දුර්ලභ දසුනකි. ඊයේ පැවැති පැපුවා නිව්ගිනියා හා මධ්‍යම අප්‍රිකානු පිල අතර පැවැති තරගයෙන් මධ්‍යම අප්‍රිකානු පිල ගෝල් 4-0ක ජයක් අත්කර ගත්තේය. ඒ අනුව මධ්‍යම අප්‍රිකානු පිල සිය දෙවැනි ජයග්‍රහණය වාර්තා කිරීමට සමත් විය.
ඡායාරූපය – සුලෝචන ගමගේ
