ජනතාවගේ වටිනා කැපකිරීම් නැවත නැවතත් ආවර්ජනය නොකළොත්, සටන් ව්‍යාපාර හා උරුමය ඉතිහාස පොතෙන් මැකී, පිටු ගැලවී යාවි යැයි පාර්ලිමේන්තු මන්ත්‍රී යදාමිණී ගුණවර්ධන මහතා පැවසීය. මෙරට සමාජවාදි ව්‍යාපාරය බිහි කිරීමේ පුරෝගාමියකු වූ දිවංගත පිලිප් ගුණවර්ධන මහතාගේ 52 වන ගුණ සැමරුම් උත්සවය ජනාධිපති රනිල් වික්‍රමසිංහ මහතාගේ ප්‍රධානත්වයෙන් කොළඹ ශ්‍රී ලංකා පදනම් ආයතනයේ දී පෙරේදා (31) පස්වරුවේ පැවැති අවස්ථාවේදී ඒ මහතා මේ බව පැවසීය.
මෙරට පමණක් නොව මහද්වීප ගණනාවක පොදු මහජනතාවගේ ජයග්‍රහණ වෙනුවෙන් කැපකිරීම් රාශියක් කළ ජාතික වීරවරයෙක් ලෙස පිලිප් ගුණවර්ධන මහතා අදටත් ගෞරවයෙන් සිහිපත් කරන බව හෙතෙම කීවේය. එහිදී මන්ත්‍රීවරයා වැඩිදුරටත් මෙසේ ද පැවසීය.
උසස් අධ්‍යාපනය ලබන්න මංපෙත් තෝරන අවස්ථාවේදී අනගාරික ධර්මපාලතුමන් පිලිප් ගුණවර්ධන මහතාගේ පියාණන්ට උපදෙස් දුන්නේ අධිරාජ්‍යවාදී බැමි ලිහලා, එය බිඳගෙන ඉදිරියට යා හැකි අනාගත ලංකාවක් බිහිකිරීමේ අත්දැකීම් එක් කර ගත හැකි තැනකට පිලිප් ගුණවර්ධන මහතා යොමු කරන ලෙසයි.
ඒ අනුව පිලිප් ගුණවර්ධන මහතා විස්කොන්සින් විශ්වවිද්‍යාලයේදී ප්‍රවීණ මහාචාර්ය ස්කොට් නියරිංග් සමඟ එක්ව මෙක්සිකෝවේ දෙවැනි විප්ලවයට සටන්කාමීව සහාය දෙමින් තරුණ වයසේදීම අත්දැකීම් ලැබුවා. ඒත් එතුමාගේ විප්ලවීය සටන්වල අවසානයක් තිබුණේ නැහැ. උතුරු අමෙරිකා මහද්වීපයේ සටන්වලට එතුමා සහාය දක්වන අවස්ථාවේ එතුමාගේ පිටුපසින් බ්‍රිතාන්‍ය ස්කොට්ලන්ඩ්යාර්ඩ් රහස් ඔත්තු සේවය ලුහුබැන්දා. පිලිප් ගුණවර්ධන මහතා ජීවිතයට සමු දී අවුරුදු 40කට පසුව ඒ වාර්තාව නිදහස් කළා. අධිරාජ්‍යවාදීන් හමුවට ගිහින් ඔවුන්ට අභියෝග කර ආසියාවේ හා අප්‍රිකාවේ අපේ රට වැනි යටත් විජිතයන්ව තිබූ රටවල මිනිසුන්ගේ නිදහස හා අයිතිවාසිකම් වෙනුවෙන් වූ සටන ඉදිරියට ගෙන ගිය ආකාරය සම්බන්ධයෙන් වූ තොරතුරු ඒ වාර්තාවේ ඊටත් වඩා ගැබ් වී තිබෙනවා. පිලිප් ගුණවර්ධනයන් නොබියව සටන් වැදුණේ අප වැනි රටවල ජනතාවගේ අවශ්‍යතා ඉස්මතු කරන්නයි.
නිදහසෙන් පසුව එතුමා ජනසතු ව්‍යාපාරයට නායකත්වය දුන්නා. අපේ රටේ පොදු මහජනතාව සමඟ එක්ව ඔවුන්ගේ මහා නිර්මාණශීලී හැකියාවෙන් ජාතික ආර්ථිකය නැංවිය හැකි ආකාරයේ ජාතික ව්‍යාපාර ගොඩනඟන්න පුළුවන් බව ඔප්පු කිරීමට එතුමාට වුවමනාවක් තිබුණා. බස් ජනසතුව හා වරාය ජනසතුව එහිදී විශේෂයෙන් මතක් කළ යුතුයි. එදා ලෝකයේ 126 වැනි වරාය, ජනසතු ව්‍යාපාරයෙන් වසර 25කට පසුව ලෝකයේ ශ්‍රේණිගත කිරීම්වලින් 26 වැනි තැනට පැමිණියා. ජනසතු ව්‍යාපාරයෙන් ඉස්මතු කර පෙන්නුවේ අපේ රටේ මිනිසුන්ගේ තිබෙන හයියයි. ඒ වගේම තමයි අපේ රටේ කැත්ත උදැල්ල අරගෙන ගෙන්දගම් පොළොව සමඟ ගැටිලා අස්වද්දා, ආසියාවේ පෙරදිග ධාන්‍යාගාරය බවට පරිවර්තනය කළ රටේ ගොවි ජනතාවට, ගොවිතැන් ඉදිරියට කරගෙන යන්න තිබුණු අයිතිවාසිකම්වල ප්‍රශ්නයක් තිබුණා. ඔවුන්ට බැංකු පද්ධතියෙන් කිසිම සහයෝගයක් තිබුණේ නැහැ. අපේ රටේ සාමාන්‍ය ගොවි ජනතාවට ණයක් ගන්න යන්න බැංකුවක් තිබුණේ නැති කාල පරිච්ඡේදයක් තිබුණා. ඒ කාලේ විශේෂ පිරිස් තෝරාගෙන බැංකු කටයුතු කළේ. රටේ ජනතාවගේ හද ගැස්ම හඳුනන පළමු ජාතික බැංකුව ඇති කරන පනත පාර්ලිමේන්තුවට ගෙනාවේ පිලිප් ගුණවර්ධන මහතා. මහජන බැංකු පනත නමින් තිබුණත් පළමුවෙනි පනත සමූපකාර සංවර්ධන බැංකු පනතයි. මේ බැංකු පනත අපේ රටේ සාමාන්‍ය ජනතාවට, ලෝකයත් සමඟ ගනුදෙනු කරන්න, තමන්ගේ වෙළෙඳ ව්‍යාපාර දියුණු කරන්න, අපේ රටේ මිරිකෙන ආර්ථිකය තුළින් ඒ ජනතාවට ඉස්මතු වෙලා එන්න පුළුවන් වපසරිය නිර්මාණය කර තිබෙන පනතක්.
මහාචාර්ය රනිල් සේනානායක මහතා –
පිලිප් ගුණවර්ධන මහතා, ජාතියක් ලෙස සමාජය නඟා සිටුවීම සංවර්ධන ඉලක්කය වූ යුගයක බිහි වූ නායකයෙක්. එදා ආර්ථික සංවර්ධනය හෝ අපට උපයා ගත හැකි නැතිනම් ණයට ගත හැකි මුදල් ප්‍රමාණය ආදිය වෙනුවට සමාජ යහපැවැත්මයි අරමුණ වුණේ. පිලිප් ගුණවර්ධන මහතා අපට පෙන්වා දුන්නේ මෙයයි. අඳගොවියාට සහනයක් ගෙන දුන් කුඹුරු පනත සඳහා මූලික වූවෙක් ලෙස ද ඔහු සිහිපත් වෙනවා. ඔහු ප්‍රකාශ කළා රට සංවර්ධනය කිරීමට, නිදහස ආරක්ෂා කිරීමට, රටේ ජනතාවට සේවය කිරීමට සූදානම් ඕනෑම පිරිසක් සමඟ වැඩ කරන බව. එය ඕනෑම කණ්ඩායමක් වෙන්න පුළුවන්.
ඉත්තෑපාන ධම්මාලංකාර හිමියන් මුලසුන දැරූ අතර, අගමැති දිනේෂ් ගුණවර්ධන, කථානායක මහින්ද යාපා අබේවර්ධන, හිටපු ජනාධිපතිවරුන් වන මහින්ද රාජපක්ෂ, චන්ද්‍රිකා බණ්ඩාරනායක කුමාරතුංග, පවුලේ ඥාතින් වන ප්‍රසන්න ගුණවර්ධන, ලක්මලී ගුණවර්ධන, හිටපු කථානායකවරුන් වන චමල් රාජපක්ෂ, කරු ජයසූරිය, හිටපු ඇමැති බැසිල් රාජපක්ෂ මහත්ම මහත්මීන්ද, මැති ඇමැතිවරුන්, පාර්ලිමේන්තු මන්ත්‍රීවරුන්, රටවල් රැසක තානාපතිවරුන්, විද්වතුන්, පාක්ෂිකයන් රැසක් මේ අවස්ථාවට සහභාගි වී සිටියහ.
