චරිත ධනංජය බමුණුහේන්ද්‍ර රූපවාහිනී ප්‍රේක්ෂකයන්ට අමුත්තෙක් නොවේ. මෙරට ප්‍රකට නාළිකා ගණනාවකම, ප්‍රවෘත්ති නිවේදකයෙක්, ප්‍රවෘත්ති හා කාලීන වැඩසටහන් නිෂ්පාදකවරයෙක් ආදී නිවේදනයේ, ගවේෂණාත්මක පුවත්, සඟරාමය වැඩසටහන් නිෂ්පාදනයේදී විවිධ භූමිකා කෙරෙන් අප හමුවන චරිත දේශීය වශයෙන් නොමඳ සම්මාන, ඇගයීම්වලින් පිදුම් ලැබූවෙක්. දැන් ස්වාධීන රූපවාහිනියෙන් අප හමුවන ඔහු මෙරට රූපවාහිනී සම්මාන උලෙළවලදී සම්මානයෙන් පිදුම් ලැබූ වාර බොහොමයකි.
හොඳම රූපවාහිනී නිවේදක, ඇතුළු තුරුණු ශක්ති, ජාතික යෞවන සම්මාන ආදිය ඊට අයත්ය. එසේම, ඒ සඳහා තවත් බොහෝ රූපවාහිනී සම්මාන උලෙළවලදී නිර්දේශ වූ චරිත වඩාත් කතාබහට ලක් වන්නේ ගවේෂණාත්මක වැඩසටහන් නිෂ්පාදනයට දක්වන රුචිකත්වය නිසාය. මේ වසරේදීත් මෙරට ප්‍රකට රූපවාහිනී සම්මාන උලෙළවලදී විශිෂ්ටතම කාලීන ප්‍රවෘත්ති වාර්තාකරණයට හිමි සම්මානයෙන් පිදුම් ලැබූ චරිත ඉකුත් 2022 වසරේදී ජනමාධ්‍ය ඔස්සේ වාර්තා කළ කාගේත් අවධානය යොමු වූ එක් සිද්ධියක් පිළිබඳ දිගින් දිගටම තොරතුරු සොයා ගියේය. ඒ අන් කිසිවක් නොව, මෙරට එක් ප්‍රකට රාජ්‍ය විශ්වවිද්‍යාලයක සිසු සිසුවියන් ගණනාවක්ම කෙටි කලක් තුළදී සියදිවි නසා ගැනීම පිළිබඳය. අපි දැන් ඔහුගෙන්ම එහි වගතුග විමසමු.
‘ මං පුවත්පත් ඇතුළු ජනමාධ්‍ය ඔස්සේ ඒ විශ්වවිද්‍යාල සිසු සිසුවියන්ගේ දිවි නසා ගැනීම්වලට අදාළ සිද්ධි දැක්කා. මේ රටේ මහජන මුදලෙන් ඉගෙන ගෙන, රටට සේවය කරන්නට සිටින මේ තරුණ ජීවිත මේ විදිහට නිරපරාදේ වැනසීම ගැන කවුරුත් කනගාටුවෙන් බලන බවත් මට පෙනුණා. ඒ සමහරු මනෝ විද්‍යාව උගත් සහ එහි ප්‍රවීණතාවක් ලද තැනැත්තන් වීම මේ ගැටලුව වඩාත් තීව්‍ර කරන්නක්. ඒ අනුව මේ ඇසුරෙන් රූපවාහිනී වැඩසටහනක් නිෂ්පාදනයට අපි ස්වාධීන රූපවාහිනිය විදිහට එකඟතාවකට එළැඹුණා.
කතාවේ සැඟවුණු පැති සෙවීම මුලින්, මේ පිළිබඳ දුරකතන මාර්ගයෙන් අදාළ විශ්වවිද්‍යාලයේ ඉහළ නිලධාරින්ගෙන් තොරතුරු විමසා බැලුවා. ඒ අනුව මේ පිටුපස වෙනම කතාවක් ඇති බව අපට වැටහුණා. එය අතිශය මානුෂික වන්නක් බවත් පෙනී ගියා. තවදුරටත් මෙවැනි ඛේදවාචකවලට අපේම තරුණ පරපුර යොමු නොවන තැනට මේ ඇත්ත ගැටලු සහ ඊට විසඳුම් ඉදිරිපත් කරන්න පුළුවන් නම්, උගත්, බුද්ධිමත් තරුණ පරපුර වටිනා ජීවිතයත් රැක ගනිමින් තමන්ගේත් රටේත් අනාගතය සාර්ථක කර ගැනීමට කටයුතු කරනු ඇතැයි අප බලාපොරොත්තු වුණා.
විශේෂයෙන්ම, දරා ගැනීමේ ශක්තිය අභියෝගයට ලක් වූ අවස්ථා ඒ ඇතැම් මරණ සමඟ අසන්නට ලැබුණා.
අනෙක, දැඩි මානසික පීඩනය. ඒ පීඩාව තරමකටවත් සංසිඳවන කලාව, සාහිත්‍ය, විනෝදාස්වාද, ක්‍රීඩා ආදියටත් ඇතැමුන් යොමු වී නැති වගත් එම විශ්වවිද්‍යාලයේ වෛද්‍ය, මනෝ වෛද්‍ය අංශ මඟින් හෙළි කළ විස්තර හරහා හඳුනාගත හැකි වුණා.
ගැටලු නිරාකරණය
මුළුමනින්ම පාහේ අධ්‍යයන, විභාග කටයුතුවලටම අදාළ සිසුන් වැඩි දෙනකු කාලය වෙන්කර ඇතැයි එවිට හෙළි වුණා. අනෙක, වෛද්‍ය හා උපදේශන අංශවලට එම විශ්වවිද්‍යාලයේ හත්දහසකට ආසන්න සෑම සිසු සිසුවියක් ගැනම, පුද්ගලිකව සොයා බැලීමේ හැකියාවක් කොහෙත්ම නැහැ. මේ අවාසනාවන්ත ඉරණමට මුහුණ පෑ ඇතැමුන් තමන්ගේ ගැටලු අදාළ අංශවල සුදුසුකම් ලද්දන්ට ඉදිරිපත් කර තිබුණේත් නැහැ. තවත් සමහරු මානසික ගැටලු, ආබාධවලට ප්‍රතිකාර ගත් අය. ඒ කෙසේ වෙතත්, මේ ගැටලු සමාජයෙන් වසන් කළ යුතු ඒවා නෙවෙයි. ඉදිරි පරම්පරාවේ දැනුම්වත්වීම පිණිස ගැටලු නිරාකරණය කරගෙන ඉදිරියට යන ආකාරය තරුණ පරපුරට ඉගැන්විය යුතුයි. ඒ වග විශ්වවිද්‍යාලයේ උපකුලපතිවරයා ඇතුළු ඉහළ නිලධාරින් අවධාරණය කළ කරුණක්…’
චරිත, සම්මානයට, කතාබහට ලක් වූ තවත් රූපවාහිනී වැඩසටහන් නිෂ්පාදනය කළ, එම නිවේදන කටයුතු කළ අයෙකි. තබ්බෝව මහ වනාන්තරයේ අතරමං වූ දිවි පැටවුන්, කොළඹට තදාසන්න උද්‍යානයකදී සරසවි සිසුවියක එම සරසවියේ සිසුවියක අතින්ම ඝාතනය වීම ආදිය මින් පෙර ගවේෂණාත්මක, කාලීන රූපවාහිනී වැඩසටහන් නිර්මාණය කර තිබෙනවා. ඉදිරියේදී තවත් එවැනි කාලීන, සංවේදී සිදුවීම් ඇසුරෙන් රූපවාහිනී වැඩසටහන් නිෂ්පාදනයට අපේක්ෂා කරන බවයි, චරිත ධනංජය කියන්නේ.
