ලොවෙන් එකෙක් එක් දෙයකට වෙයි සමත” යන කියමන හැම විටම නිවැරැදි නොවේ. මා එසේ පවසන්නේ ක්ෂේත්‍ර කිහිපයක දස්කම් පෙන්වන පුද්ගලයන් ද ඉදහිට හෝ අපට හමුවන නිසා ය. එකිනෙකට සම්පූර්ණයෙන්ම වෙනස් ක්ෂේත්‍ර කිහිපයක දස්කම් දැක්වීමට යම් කෙනෙකුට හැකියාව ඇත්නම් එය ඉතා විරල සිදුවීමකි. අපේ කතා නායකයා වන සදුන් කිතුලේගොඩ ද එවැනි පුද්ගලයෙකි.
සඳුන් කිතුලේගොඩ නවසීලන්තයේ වාසය කරන ශ්‍රී ලාංකිකයෙකි. ඔහුගේ පවුලේ සමීපතමයන් බොහෝ දෙනෙක් වාසය කරන්නේ ද නවසීලන්තයේ ය. වසර 36 ක් තිස්සේ නවසීලන්තයේ ජීවත් වුවද ඔහු තවමත් ශ්‍රී ලාංකික පුරවැසියෙකි. ඔහු මෙරට පුරවැසිභාවය අතහැර එරට පුරවැසිභාවය ලබාගෙන නැත. එසේ ලබා ගැනීමේ බලාපොරොත්තුවක් ද නැත. සඳුන් සෑම වසරකම ශ්‍රී ලංකාවට පැමිණීමට අමතක නොකරයි. එසේ පැමිණෙන්නේ හිස් අතින් නොව මෙරටට විශාල වටිනාකමින් යුත් වෛද්‍යාධාර තොගයක් ද රැගෙනය. ඒ ඔහු තුළ ඇති දේශහිතයිශීභාවය නිසාය.
දශක තුනක් තිස්සේ ඔහු කොළඹ ජාතික රෝහලට, මහනුවර මහ රෝහලට මෙන්ම මෙරට ප්‍රාදේශීය රෝහල් ගණනාවකට උදව් උපකාර කරයි. කොළඹ ජාතික රෝහලට දැඩි සත්කාර ඇදන් (I.C.U. Beds)33ක් ඔහු මේ වනවිට පරිත්‍යාග කර ඇත. මහනුවර මහ රෝහලට නිර්වින්දන යන්ත්‍ර (anas thatic mechin) 03ක් පසුගිය දා ඔහු පරිත්‍යාග කළේය. එම එක් යන්ත්‍රයක වටිනාකම රුපියල් මිලියන දෙසීයක් පමණ වේ. මීට අමතරව නිර්වින්දන වෛද්‍ය උපකරණ, ඇද ඇතිරිලි ඇතුළු වෛද්‍යාදාර රැසක් ඔහු විසින් මෙරට රෝහල්වලට පරිත්‍යාග කර ඇත.
සඳුන් කිතුලේගොඩ මූලික අධ්‍යාපනය ලබන්නේ කොළඹ තර්ස්ටන් විදුහලෙනි. ජීව විද්‍යා අංශයෙන් උසස්පෙළ සමත් ව නවසීලන්තයට යන ඔහු එහිදී නිර්වින්දන වෛද්‍ය විද්‍යාව පිළිබඳ උසස් අධ්‍යාපනය ලබා නිර්වින්දන තාක්ෂණවේදියකු ලෙස වෘත්තීය ජීවිතය අරඹන්නේය. නවසීලන්තයේ වෙලින්ටන් රෝහලේ නිර්වින්දන තාක්ෂණවේදියකු ලෙස වසර 31ක් තිස්සේ සේවය කරන සදුන් මේ වන විට එම රෝහලේ ප්‍රධාන නිර්වින්දන තාක්ෂණවේදියාය. (එරට රෝහල්වල නිර්වින්දන වෛද්‍යවරුන් නොමැති අතර ශල්‍යකර්මවලදී රෝගියා නිර්වින්දන කර ශල්‍ය වෛද්‍යවරයාට සහාය ලබා දෙන්නේ නිර්වින්දන තාක්ෂණවේදියාය.)
සඳුන් ඇතුළු වෛද්‍ය කණ්ඩායමක් සෑම වසරකම කොළඹ ජාතික රෝහලේ දී විශේෂ ශල්‍ය වෛද්‍ය සායනයක් පවත්වයි. සැබවින්ම එය විශාල පුන්‍ය කටයුත්ත්කි. මුහුණේ සහ ශරීරයේ විවිධ විරූපතා ඇති දරුවන් කිහිප දෙනෙක් තෝරා ප්ලාස්ටික් ශල්‍යකර්ම සිදු කර ඔවුන් සාමාන්‍ය තත්ත්වයට පත් කිරීම එම උදාර පුන්‍ය කටයුත්තයි.මෙම ශල්‍ය සායනය සඳහා ප්ලාස්ටික් ශල්‍ය වෛද්‍යවරයෙක්, ස්නායු ශල්‍ය වෛද්‍යවරයෙක්, ඇතුළු සිව් දෙනෙකුගෙන් යුත් කණ්ඩායමක් මෙරටට පැමොණේ. මේ සඳහා වැයවන සියලු වියදම් දරන්නේ ද මේ කණ්ඩායමයි. නවසීලන්තයේ “ඉන්ටර්ප්ලාස්ට්” (interplas t) නමැති සංවිධානය ද මේ සඳහා සහයෝගය දක්වයි. මෙම ශල්‍යකර්ම සිදු කරන්නේ සෞඛ්‍ය අමාත්‍යාංශයේ නිසි අවසරය ඇතිව බවත් මේ සඳහා කොළඹ ජාතික රෝහලෙන් ලැබෙන සහයෝගය අතිවිශිෂ්ඨ බවත් සඳුන් කිතුලේගොඩ පවසයි. මෙම ව්‍යාපෘතිය සිදු කරන්නේ ප්ලාස්ටික් සැත්කම් සඳහා අධික වියදමක් දැරීමට නොහැකි දිළිදු දරුවන්ට උපකාර කිරීමේ අරමුණෙන් බවද සදුන් පවසයි.
ආගම දහමට, ශ්‍රී ලාංකික සංස්කෘතියට, ඉතා ගරු කරන පුද්ගලයෙකු ලෙස ඔහු එරට සිට තවත් වටිනා කටයුත්තක් සිදු කරයි. යුරෝපා රටවල සිටින තරුණ තරුණියන්ගේ විවාහ මංගල උත්සවවල අෂ්ඨක කීම එම විශේෂ කටයුත්තයි. නවසීලන්තයට අමතරව ඇමරිකාව, කැනඩාව, ඕස්ට්‍රේලියාව වැනි රටවල විවාහ මංගල්‍යයන් 196 ක පමණ ඔහු මේ වනවිට අෂ්ඨක කියා ඇත. රැකියාවෙන් නිවාඩු ලබාගෙන කිසිදු අය කිරීමකින් තොරව මෙම කටයුත්ත සිදු කරයි.
මීට අමතරව සඳුන් කිතුලේගොඩ මාධ්‍යවේදියෙකු ලෙස ද කටයුතු කරන්නෙකි. වසර 24ක් තිස්සේ ඔහු විසින් එරට “ලක් හඩ”නමින් ගුවන් විදුලි සේවාවක් පවත්වාගෙන ගොස් ඇත. 25 වැනි වසරේ දී එම ගුවන් විදුලි නාලිකාව එරට වෙසෙන නව පරපුරට භාර දීමට ඔහු කටයුතු කළේය. දශක තුනක් තිස්සේ ඔහු මෙරට පුද්ගලික නාලිකාවක් ඔස්සේ නවසීලන්තයේ තොරතුරු ශ්‍රී ලාංකිකයන්ට සමීප කරන්නේය.
නවසීලන්තයේ එක්සත් ශ්‍රී ලංකා සංවිධානයට සම්බන්ධව වසර 30 ක් තිස්සේ කටයුතු කරන සඳුන් කිතුලේගොඩ එහි සභාපතිවරයා ලෙස වසර 03ක් ද කටයුතු කර ඇත.
සදුන් කිතුලේගොඩගේ මෙම උදාර සේවය එරට දී ඉහළම ඇගයීමට ලක් වීම ඔහු ජීවිතයේ ලද විශාලම භාග්‍යය බව ඔහු පවසයි. එරට විවිධ ක්ෂේත්‍රවල කටයුතු කරන විශිෂ්ටයින් ඇගයීමට නවසීලන්තයේ රජය කටයුතු කරයි. එය සිදු කරන්නේ “Qeen service” නමැති සංවිධානය හරහාය. එම සම්මනය දෙන්නේ එරට පුරවැසිභාවය හිමි අයට පමණි. 2023 වසරේ දී සදුන් කිතුලේගොඩ මෙම සම්මානය සඳහා තේරී පත් වුණත් ඔහුට එරට පුරවැසිභාවය නොමැතිවීම හේතුවෙන් ගැටලුවක් මතුවිය. එහෙත් එහි සංවිධායකයන් ශ්‍රී ලංකා රජයෙන් විශේෂ අවසරයක් ගෙන ඔහුට එම සම්මානය පිරිනමා ඇත. ඔහුට එය අමරණීය සිහිවටනයකි.
