මරාගෙන මැරෙන බෝම්බකරුවකු වයඹදිග පාකිස්තානයේ කයිබර් පක්ටුන්කා ප්‍රාන්තයේදී සිදු කළ ප්‍රහාරයකින් චීන ඉංජිනේරුවන් පස්දෙනකු ජීවිතක්ෂයට පත්වීම හේතුවෙන් එම ප්‍රාන්තයේ චීන අයෝජන ව්‍යාපෘති අවදානම් තත්ත්වයකට පත් වී ඇතැයි විදෙස් මාධ්‍ය වාර්තා කළේය. පුපුරන ද්‍රව්‍ය පැටවූ මෝටර් රථයක් චීන ඉංජිනේරුවන් ගමන් ගත් මෝටර් රථයේ හප්පා එම ප්‍රහාරය සිදු කර තිබිණි.
මේ ප්‍රහාරය සම්බන්ධව පුළුල් පරීක්ෂණයක් ආරම්භ කර වරදකරුවන්ට දඬුවම් කරන ලෙසත්, චීන පුරවැසියන්ගේ ආරක්ෂාව තහවුරු කිරීමට පියවර ගන්නා ලෙසත් චීන රාජ්‍යතාන්ත්‍රිකයන් පාකිස්තාන රජයෙන් ඉල්ලීමක් කර ඇතැයි ද වාර්තා වේ. වසර 2021 දී තලේබාන් සංවිධානය ඇෆ්ගනිස්තානයේ බලය අත්කර ගැනීමෙන් පසු පළමු වසර දෙක තුළ පමණක් පාකිස්තානයේ ප්‍රහාර 73% කින් ඉහළ ගොස් ඇතැයි ද, ඊට හේතුව තලේබාන් සංවිධානයේ සහාය ලබන පාකිස්තානයේ ත්‍රස්ත කණ්ඩායම් ශක්තිමත් වීම බව ද වැඩිදුරටත් වාර්තා වේ. පසුගියදා එල්ල වූ මරාගෙන මැරෙන බෝම්බ ප්‍රහාරය වසර 2022 අප්‍රේල් මාසයේදී කරච්චි විශ්වවිද්‍යාලය අසලදී සිදු කළ ප්‍රහාරයෙන් පසු චීන ජාතිකයන් ඉලක්ක කර එල්ල කර ඇති වඩාත්ම බරපතළ ප්‍රහාරය බව ද විදෙස් මාධ්‍ය වාර්තා කළේය.
