හදිස අනතුරකින් මරණයට පත්වූ හිටපු රාජ්‍ය ඇමැති සනත් නිශාන්ත මහතාගේ ආරච්චිකට්ටුව නි‍ෙවසට ගිනි තබා විනාශ කිරීමේ චෝදනා එල්ල වී තිබූ සැකකරුවන් 68 දෙනා එම නඩුවෙන් නිදහස් කිරීමට හලාවත දිසා විනිසුරු හා ප්‍රධාන මහේස්ත්‍රාත් සිරිමෙවන් මහේන්ද්‍රරජා විසින් පෙරේදා (04) නියෝග කෙරුණි.
මෙසේ හිටපු රාජ්‍ය ඇමැති සනත් නිශාන්ත මහතාගේ නි‍ෙවස ගිනි තබා විනාශ කර තිබුණේ හලාවත ජාතික ජන බලවේගයේ ප්‍රධාන සංවිධායකවරයා සමඟ එක්සත් ජාතික පක්ෂයේ හලාවත හා ආරච්චිකට්ටුව හිටපු ප්‍රාදේශීය සභා මන්ත්‍රීවරුන් පිරිසක් සමඟ තවත් ජාතික ජන බලවේගය පක්ෂ ආධාරකරුවන් පිරිසකි.
ගෝඨාභය රාජපක්ෂ මහතාගේ රජය පෙරළා දැමීමට කටයුතු කළ ගෝල්ෆේස් අරගලකරුවන්ට හිටපු සනත් නිශාන්ත රාජ්‍ය ඇමැතිවරයා ඇතුළු රජයට සම්බන්ධ පිරිසක් පහර දී එළවා දැමීමට පළිගැනීමක් ලෙස මෙසේ විශාල පිරිසක් විසින් රාජ්‍ය ඇමැතිවරයාගේ ආරච්චිකට්ටුව පිහිටි නි‍ෙවස 2022 මැයි 9 ගිනි තබා විනාශ කර තිබුණි.
ගිනි ගැනීමෙන් ඇමැතිවරයාගේ සියලු දෑ ගිනි ගෙන විනාශ වී තිබුණි.
මෙම ගිනි තැබීමට හලාවත ජාතික ජන බලවේගය පක්ෂ සංවිධායක අජිත් ගිහාන් මහතා සමඟ එක්සත් ජාතික පක්ෂ ආධාරකරුවන් 200කට ආසන්න පිරිසක් විටින්විට හලාවත හා ආරච්චිකට්ටුව පොලිසි විසින් අත්අඩංගුවට ගෙන තිබූ අතර එහි දී පරීක්ෂණවලින් පසු 68 දෙනකුට චෝදනා එල්ල කරමින් පොලිසිය විසින් නඩු පවරා තිබුණි.
කෙසේ නමුත් අදාළ නි‍ෙවස ගිනි තැබීමට සම්බන්ධ සැකකරුවන් සම්බන්ධ දර්ශන ඇති බවට එවකට රාජ්‍ය ඇමැති සනත් නිශාන්ත මහතා පොලිසියට පවසා තිබුණද සනාථ කර ගත හැකි සාක්ෂියක් ඉදිරිපත් කිරීමට අපොහොසත් වී තිබුණි.
වසර දෙකකට ආසන්න කාලයක් පැවති මෙම නඩු විභාගයට පොලිසියට සැකකරුවන් වෙනුවෙන් කිසිදු පිළිගත හැකි සාක්ෂියක් ඉදිරිපත් කිරීමට හැකියාව නොතිබුණි.
පැමිණිල්ල වෙනුවෙන් හලාවත හා ආරච්චිකට්ටුව පොලිසිය පෙනී සිටි අතර, විත්තිය වෙනුවෙන් ස්විනි පෙරේරා, රුවන් චමින්ද ඇතුළු නීතිඥයින් තිදෙනකු අධිකරණයේ පෙනී සිටිමින් කරුණු ඉදිරිපත් කර තිබුණි.
එහිදි විත්තිය වෙනුවෙන් පෙනී සිටි නීතිඥ ස්විනි පෙරේරා මහතා අධිකරණයේ පෙනී සිටිමින් පවසා සිටියේ තම සේවාදායකයින් වෙනුවෙන් දේශපාලන පළිගැනීම් මුල් කරගනිමින් මෙම පැමිණිල්ල දමා ඇති බවත් මේ සම්බන්ධ චෝදනා එල්ලවී ඇති පිරිස අතර දේශපාලනයේ නිරත වන ව්‍යාපාරික කටයුතුවල හා වෙනත් කටයුතුවල නිරත වන පිරිස් දැඩි අපහසුතාවන්ට ලක්වී ඇති බවත් මෙම පිරිස අදාළ චෝදනාවලින් නිදහස් කර මුදාහරින ලෙස නීතිඥවරයා අධිකරණයෙන් ඉල්ලා සිටියේය.
මෙහිදි අධිකරණය හමුවේ කරුණු දැක්වූ හලාවත ප්‍රධාන මහේස්ත්‍රාත්වරයා පවසා සිටියේ නීතිය සැමට සාධාරණ විය යුතුයි. එසේම නීතිය ලොකු පොඩි කියලා වෙනසක් නොකළ යුතු බවත් මෙම පිරිස වෙනුවෙන් ඉදිරිපත් කළ හැකි කිසිදු සාක්ෂියක් නොමැති තත්ත්වයක් හමුවේ මෙම සැකකරුවන් අධිකරණය හමුවේ ඉදිරිපත් නොකරන ලෙසට පොලිසියට දැඩි චෝදනා එල්ල කරමින් අදාළ චෝදනාවලින් නිදහස් කර මුදා හැරීමට කටයුතු කර තිබුණි.
ඒ අනුව මෙම නඩුව තවදුරටත් පවත්වාගෙන යාමට අවශ්‍යතාවක් නොමැති බව පෙනී යන හෙයින් අපරාධ නඩු විධාන සංග්‍රහයේ 186 වන වගන්තියට අනුව සියලුම සැකකරුවන් මුදා හැරීමට කටයුතු කර තිබුණී.
