(හෙළයේ මහා සිනමාකරු ආචාර්ය ලෙස්ටර් ජේම්ස් පීරිස් මහතාගේ 105 වැනි ජන්ම දිනය ඊයේට (05) යෙදී තිබිණි. මේ ලිපිය ඒ නිමිත්තෙනි).
දේශීය කතානාද සිනමාව නව මාවතකට යොමු කළ ආචාර්ය ලෙස්ටර් ජේම්ස් පීරිස් මහතා දෙස් විදෙස් ඇගයීමට ලක් වූ මෙරට සිටි විශිෂ්ටතම සිනමාකරුවෙකි.ඒ මහතා 1919 අප්‍රේල් 5දා දෙහිවලදී උපත ලැබූ අතර දොස්තර ජේම්ස් ප්‍රැන්සිස් පීරිස් මහතා සිය දයාබර පියාණන් වූ අතර ඈන් ගර්ට්රූට් විනිප්‍රීඩා මහත්මිය දයාබර මෑණියන් වූවාය. බම්බලපිටිය ශාන්ත පීතර විද්‍යාලයෙන් මූලික අධ්‍යාපනය ලැබූ ලෙස්ටර් ඉංග්‍රීසි සාහිත්‍යයට දැක්වූයේ දැඩි ඇල්මකි.අධ්‍යාපනය නිමවීමත් සමඟ තරුණ ලෙස්ටර් ලේක්හවුස් ආයතනයට සම්බන්ධ වී “ඔබ්සර්වර්” පුවත්පතෙන් මාධ්‍යවේදියකු ලෙස සිය මාධ්‍ය ජීවිතය ඇරඹුවේය. ඉන්පසු රජයේ චිත්‍රපට අංශයට සම්බන්ධ වන ලෙස්ටර් ‘ලංකා ගීතය’, ‘නෙළුම් ගම’, ‘වියළි කලාපය ජය ගැනීම’, ‘රැකෙනු නැත්නම් තැවෙනු’ වැනි වාර්තා චිත්‍රපට නිර්මාණය කෙරිණි.
1949 දී නිර්මාණයකදී Soliloquy (සෙලියලොකි) ඉංග්‍රීසි වාර්තා චිත්‍රපටය විනාඩි 12ක පර්යේෂණාත්මක චිත්‍රපටයකි. 1956 ලෙස්ටර් නිර්මාණය කළ ‘රේඛාව’ ඔහුගේ ප්‍රථම වෘත්තාන්ත චිත්‍රපටය ලෙස ඉතිහාසයට එක් වෙයි.අපේ කතානාද සිනමාවට සිංහල ලකුණ උරුම කර දුන්නේ රේඛාව චිත්‍රපටයෙනි. ඉන්දියානු වට්ටෝරු සිනමාවට කොටු වූ අපේ දේශීය කතානාද සිනමාව චිත්‍රාගාරවලින් බැහැර වී එළිමහන් දර්ශන තල වෙත රැගෙන ගියේ ද ලෙස්ටර් නිර්මාණය කළ රේඛාව චිත්‍රපටයයි.
1960දී සංදේශය නිර්මාණය කළ ඔහු 1965 දී ගම්පෙරළිය චිත්‍රපටය නිර්මාණය කළ අතර ඉන්දීය අන්තර්ජාතික සිනමා උලෙළේදී හොඳම වෘත්තාන්ත චිත්‍රපටය ලෙස ‘ගම්පෙරළිය’ රණමයුර සම්මානයෙන් පිදුම් ලැබුවේය. දෙලොවක් අතර, රන්සළු, ගොළු හදවත, අක්කරපහ, නිධානය, දෑස නිසා, මඩොල්දූව, The God King, වීර පුරන්අප්පු, අහසින් පොළොවට, පිංහාමි, බැද්දේගම, කලියුගය, යුගාන්තය, අවරගිර, වෑකන්ද වලව්ව, අම්මාවරුනේ ලෙස්ටර් දේශීය සිනමාවට තිළිණ කළ නිර්මාණයන්ය.
මේ අසහාය සිනමාකරුවා 2000 රණමයුර යාවජීව සම්මානය (නවදිල්ලිය), 2001 – ඩූවිල් ස්වර්ණපද්ම සම්මානය (ප්‍රංශය), Golden Lotus Award 2002 – (ප්‍රංශය) 2003 – යුනෙස්කෝ ෆෙලෙනි රන් සම්මානය, 2007 – ශ්‍රී ලංකාභිමානය ඇතුළු දෙස් විදෙස් ඇගයීමට ලක් වූ මේ අග්‍රගණ්‍ය සිනමාකරුවාට 2003 වසරේදී පේරාදෙණිය විශ්වවිද්‍යාලයෙන් සම්මාන ආචාර්ය උපාධිය ද පිරිනමන ලදි. නැසී ගිය ප්‍රවීණ සිනමාවේදිනි සුමිත්‍රා පීරිස් මහත්මියගේ දයාබර සැමියා වූ මේ ලෝක පූජිත සිනමාකරුවා 2018 අප්‍රේල් 28දා දිවි සිනමාවෙන් සමුගත්තේය.
