පේරාදෙණිය විශ්වවිද්‍යාලයේ 23 වැනි උපකුලපතිවරයා තෝරාගැනීමට පැවති සම්මුඛ පරීක්ෂණයේදී ඉහළම ලකුණු ගත් මහාචාර්යවරුන් තිදෙනකුගේ නම් විශ්වවිද්‍යාල පාලක සභාව මඟින් විශ්වවිද්‍යාල ප්‍රතිපාදන කොමිෂන් සභාවට දැනුම් දී තිබේ.
පාලන සභාව ඉදිරියේ පැවති සම්මුඛ පරීක්ෂණයට මහාචාර්යවරුන් 8 දෙනකු ඉදිරිපත්ව ඇති අතර, ඒ අතුරින් වැඩිම ලකුණු ගන්නා තිදෙනාගේ නම් විශ්වවිද්‍යාල ප්‍රතිපාදන කොමිෂන් සභාවට යොමු කිරීමෙන් පසු කොමිෂන් සභාව මඟින් ඒවා ජනපතිවරයා වෙත යොමු කිරීම සම්ප්‍රදායකි. අදාළ තිදෙනාගෙන් කෙනකු උප කුලපතිවරයා ලෙස පත් කිරීමේ බලය ජනාධිපතිවරයා සතුය.
මෙවර උපකුලපති ධුරය සඳහා පැවැති සම්මුඛ පරීක්ෂණයේදී වැඩිම ලකුණු හිමි කරගෙන ඇත්තේ පිළිවෙළින් වත්මන් නියෝජ්‍ය උපකුලපති මහචාර්ය ටෙරන්ස් මදුජිත්, ඉංජිනේරු පීඨයේ මහාචාර්ය කිත්සිරි ලියනගේ හා විද්‍යා පීඨයේ මහාචාර්ය ශාලුක කොඩිතුවක්කු බවට විශ්වවිද්‍යාල ආරංචි මාර්ග සඳහන් කරයි.
වත්මන් උපකුලපති මහාචාර්ය එම්.ඩී ළමාවංශ මහතාගේ ධුර කාලය එළඹෙන අගෝස්තු 5 දායින් අවසන් වීමට නියමිතය.
