හදිසි ප්‍රතිචාර ජාලය වැඩි දියුණු කිරීමට විදේශ ආධාර ලෙස ලැබුණු රුපියල් කෝටි 2ක් පමණ වටිනා වාහනයක් අයථා ලෙස භාවිත කිරීමේ වරදට පවරා ඇති නඩුවට ලබන මැයි 22දා උසාවිය ඉදිරියේ පෙනී සිටින ලෙස කොළඹ මහාධිකරණ විනිසුරු නවරත්න මාරසිංහ මහතා ඊයේ (29දා) හිටපු ඇමැති ඒ.එච්.එම්. ෆවුසිට සිතාසි නිකුත් කළේය.
නඩුව ඊයේ (29දා) කැඳවූ අවස්ථාවේ විත්තිකරු අධිකරණය ඉදිරියේ පෙනී නොසිටි අතර සිය සේවාදායකයාට චර්ම රෝගයක් වැලඳී ඇති බවට නීතිඥයන් වෛද්‍ය සහතික ඉදිරිපත් කරන ලදි.
මෙම නඩුව පසුගිය පෙබරවාරි 5දා අවසන්වරට කැඳවූ අවස්ථාවේ ජනාධිපති නීතිඥ ශවේන්ද්‍ර ප්‍රනාන්දු විත්තිය වෙනුවෙන් කරුණු දක්වමින් චෝදනා පත්‍රය ඉවත් කර ගැනීම පිළිබඳ සලකා බලන ලෙස සිය සේවාදායකයා අල්ලස් කොමිසමෙන් ඉල්ලීමක් ඉදිරිපත් කර ඇති බව කියා සිටියේය. එම ඉල්ලීම ගැන පැමිණිල්ලේ ස්ථාවරය මීලඟ නඩු දින අධිකරණයට දන්වන ලෙස විනිසුරුවරයා නියෝග කළේය.
2010 වසරේ අගෝ: 14දා හා 2015 වසරේ ජන 20දා අතර කාලය තුළදී ආපදා කළමනාකරණ ඇමැතිවරයා හැටියට කටයුතු කරමින් ලක් රජයට පාඩු කළේය යන චෝදනාව මත අබ්දුල් හමීඩ් මොහාමඩ් ෆවුසි යන අයට විරුද්ධව නඩු පවරා තිබේ.
ඉන්පසු නීතිපතිවරයා විසින් 2022 වසරේ නොවැ: 02දා අධි චෝදනා 4ක් යටතේ චෝදනා ගොනු කර ඇත. ආපදා කළමනාකරණ ඇමැතිවරයා හැටියට කටයුතු කරමින් නෙදර්ලන්තයෙන් පරිත්‍යාගයක් ලෙස ආපදා කළමනාකරණ මධ්‍යස්ථානයට ලැබුණු කෝටි 2ක් පමණ වටිනා ටොයෝටා ලෑන්ඩ් කෘෘසර් ජීප් රථයක් තමා වෙත මුදා හරින ලෙස අමාත්‍යාංශ ලේකම්වරියට පොලඹව, ඇති බව අල්ලස් හෝ දූෂණ කොමිසම ඉදිරිපත් කළ චෝදනා පත්‍රයේ සඳහන්වේ. 2018 අංක 22 හා 1994 අංක 20 දරන පනත්වලින් සංශෝධිත 1954 අංක 11 දරන අල්ලස් පනතේ 70 වැනි වගන්තිය යටතේ අධිචෝදනා 4ක් යටතේ විත්තිකරුට එරෙහිව විරුද්ධව නඩු පවරා ඇත.
නීතිඥ නටාෂා විජේසේකර මෙනෙවිය සමඟ ජනාධිපති නීතිඥ ශවේන්ද්‍ර ප්‍රනාන්දු මහතා විත්තිය වෙනුවෙන් පෙනී සිටියේය. මීලඟ නඩු දිනය මැයි 22දාට නියමිත විය.
