හක්මණ ප්‍රාදේශීය ලේකම් කොට්ඨාසයට අයත් ඇල්ලවෙල ජලාශයේ සොරොව්වේ පවතින බාධකයන් ඉවත් කිරීම නාවික හමුදා කිමිදුම්කරුවන් විසින් සිදු කරන ලදි.
පවතින බාධක හේතුවෙන් ජලය නිසියාකාරව බැහැර නොවීමෙන් 2024 යල කන්නයේ කෘෂිකාර්මික කටයුතු සඳහා ජලය මුදාහැරීම ගැටලුකාරී තත්ත්වයක පැවති අතර එම බාධාවන් නිරීක්ෂණය කර ඒවා ඉවත් කිරීමට නාවික හමුදා කිමිදුම්කරුවන්ගේ සහාය ලබා දීමට අදාළ සම්බන්ධීකරණ කටයුතු මාතර දිස්ත්‍රික් ආපදා කළමනාකරණ සම්බන්ධීකරණ ඒකකය මඟින් සිදු කෙරිණි.
ප්‍රාදේශීය වාරිමාර්ග ඉංජිනේරු කාර්යාලයේ ඉල්ලීම පරිදි නාවික හමුදා මූලස්ථානය හා සම්බන්ධ වෙමින් සොරොව්වේ පවතින බාධකයක් ඉවත් කිරීම තුළින් හක්මන – ඇල්ලවෙල ව්‍යාපාරයට අයත් කුඹුරු අක්කර 1300ක් වගා කරන ගොවීන් සඳහා සෙත සැලසේ. මාතර ප්‍රාදේශීය වාරිමාර්ග ඉංජිනේරු කාර්යාලයේ මෙහෙයවීම යටතේ අදාළ කටයුතු ක්‍රියාවට නැංවිනි.
