බිරිය විදේශගත වූ පසු තම හතර හැවිරිදි දියණියට අමානුෂික ලෙස පහර දී එය වීඩියෝගත කර සමාජ මාධ්‍ය වෙත මුදාහැරි බළන්ගොඩ පෙට්ටිගල ප්‍රදේශයේ පදිංචි 27 හැවිරිදි පියකු ලබන 17 වැනිදා දක්වා රක්ෂිත බන්ධනාගාරගත කරන ලෙස බළන්ගොඩ මහේස්ත්‍රාත් හේෂානි රොද්‍රිගෝ මහත්මිය ඊයේ (03) නියෝග කළාය.
බළන්ගොඩ පෙට්ටිගල ප්‍රදේශයේ පදිංචි ලෝගරත්නන් ප්‍රසාද් නමැති පියකු මෙලෙස රිමාන්ඩ් කෙරිණි.
මොහුගේ බිරිය මීට මාස නවයකට පෙර විදේශගතව ඇති අතර එම දැරිය රැකබලා ගැනීම පියා සහ පියාගේ මවුපියන් වෙත භාර දී තිබුණි.
ඇය විදේශගතව මාස නවයක් ගත වූ පසු මොහු විසින් මෙලෙස මෙම දැරියට පහර දී තිබෙන අතර දැරිය මේ වන මිට බළන්ගොඩ මූලික රෝහලට ඇතුළත් කර ප්‍රතිකාර කෙරේ. බළන්ගොඩ පොලිසියේ ස්ථානාධිපති ප්‍රධාන පොලිස් පරික්ෂක දමිත් ජයකොඩි මහතාගේ උපදෙස් පරිදි ළමා හා කාන්තා අංශයේ ස්ථානාධිපතිනි ශාලිකා රාජපක්ෂ, නුවන් දර්ශන යන නිලධාරීහු වැඩිදුර පරීක්ෂණ සිදු කරති.
