කෑගල්ල හෙට්ටිමුල්ල බණ්ඩාරනායක කනිෂ්ඨ විද්‍යාලය අසල පිහිටි පදික මාරුවේ සිට පුරා වසර 45ක් පුරා ස්වේච්ඡාවෙන් දරුවන් හසුරුවන ‘පාර කියන අත්තම්මා’ නොහොත් ලිලී වයලට් මහත්මියගේ 86 වැනි උපන් දිනය යෙදී තිබුණු ඊයේ (05) දිනයේ ඇය පිළිගැනීමේ උත්සවයක් හෙට්ටිමුල්ල බණ්ඩාරනායක කනිෂ්ඨ විද්‍යාලයේදී පැවැත්විණි.
උපන් දින කේක් ගෙඩිය කපන ලිලී වයලට් මහත්මිය
කෑගල්ල, පරගම්මන උඩ පාරේ පිහිටි නිවෙසේදී 1938 මැයි මස 05 වැනිදා උපත ලබා ඇති ලිලී වයලට් මහත්මිය 1971දී කළුතර ප්‍රදේශයේ තරුණ රියැදුරු මහතකු සමඟ විවාහ වී ඔහුගේ නිවෙසේ පදිංචියට ගියාය. පසුව මේ නව යුවළට 1974 දී එස්. කේ. මංගලිකා නමින් දියණියක් උපත ලැබුවාය. දියණියට මාස හයක් යන්නට පෙර ලිලී මහත්මියගේ සැමියා හදිසි රිය අනතුරකින් ජීවිතක්ෂයට පත්ව තිබේ. පසුව ලිලී මහත්මිය සැමියාගේ නිවෙසේ මාස හයක් පමණ සිට අවුරුද්දක් පමණ වූ දියණිය රැගෙන යළි කෑගල්ලේ, පරගම්මන මවුපියන් පදිංචිව සිටින නිවෙසට පැමිණියාය.
ප්‍රදේශයේ නිවාසවල කුලී වැඩට ගොස් උපයා ගන්නා සොච්චම් මුදලින් දියණිය ලොකු මහත් කර ගත් ලිලී මහත්මිය ඇය කෑගල්ල බුලත්කොහුපිටිය මාර්ගයේ පිහිටි හෙට්ටිමුල්ල බණ්ඩාරනායක කනිෂ්ඨ විද්‍යාලයට ඇතුළත් කළාය. නිවෙසේ සිට පා ගමනින් දියණිය රැගෙන උදේ 6.30ට පාසලට ගිය ලිලී මහත්මිය දියණිය පාසලට ඇරලවා සෙසු දරුවන් පාසල ආසන්නයේ පිහිටි පදික මාරුවේ දුව පැන යන එන අයුරු දැක එදා සිට මේ දක්වා ඇය සිය ස්වේච්ඡාවෙන්ම දරුවන් හැසිරීම සිදු කරයි. දරුවන් රැගෙන යෑමට මවුපියන් විද්‍යාලය ආසන්නයට නොපැමිණියොත් දරුවන් ඔවුන්ගේ නිවෙස්වලට රැගෙන ගොස් භාර දීම ද ඇයගේ සුවිශේෂී ලක්ෂණයකි.
ලිලී මහත්මිය කරන අතිසුවිශේෂි කාර්යභාරය අගය අධ්‍යාපන දෙපාර්තමේන්තුවෙන් පහ ශ්‍රේණියේ සිංහල පෙළ පොතට ‘පාර කියන අත්තම්මා’ නමින් පාඩමක් ද වසර පහක පමණ කාලයක සිට ඇතුළත් කර තිබේ.
ලිලී වයලට් මහත්මිය
ඇයගේ 86 වැනි උපන් දිනය යෙදී තිබුණු ඊයේ (05) දින වසර 45ක ස්වේච්ඡා සේවය අගයා පිළිගැනීමේ උත්සවයක් ආදි ශිෂ්‍යයන් වර්තමාන දරුවන්ගේ මවුපියන් සහ බස් හිමියන් විසින් බණ්ඩාරනායක කනිෂ්ඨ විද්‍යාලයේදී සංවිධාන කර තිබුණි. හෙට්ටිමුල්ල බණ්ඩාරනායක ජාතික පාසල ආසන්නයේ සිට කනිෂ්ඨ විද්‍යාලය දක්වා තූර්ය වාදක කණ්ඩායම් උඩරට වෙස් නර්තන කණ්ඩායම් පෙරටු කරගෙන ඇය ඇතුළු ආරාධිත අමුත්තන් පිරිස කැඳවාගෙන ගියාය.
පසුව පිළිගැනීමේ උත්සවයට කෑගල්ල කොට්ඨාස අධ්‍යාපන අධ්‍යක්ෂිකා රාජිකා වික්‍රමසිංහ, කෑගල්ල බණ්ඩාරනායක ජාතික පාසලේ විදුහල්පති සුරංජිත් ගනේගෙදර, බණ්ඩාරනායක කනිෂ්ඨ විද්‍යාලයේ විදුහල්පතිනි හේමන්තා කල්‍යාණී රූපස් ශ්‍රී, හිටපු විදුහල්පති ලක්ෂ්මන් විජේරත්න ඇතුළු ආදි ශිෂ්‍යයෝ ද, ප්‍රදේශයේ විශාල පිරිසක් ද එක්ව සිටියහ.
උත්සවයේ පිළිගැනීමේ කතාව හේමන්තා කල්‍යාණී රූපස් ශ්‍රී මහත්මිය විසින් සිදු කළාය.
පසුව ලිලී මහත්මියගේ 86 වැනි ජන්ම දිනය නිමිත්තෙන් සංවිධායක මණ්ඩලය සකස් කර තිබූ උපන් දින කේක් ගෙඩිය කපා ආරාධිත අමුත්තන්ට, ශිෂ්‍ය ශිෂ්‍යාවන්ට, සිය දියණිය වන මංගලිකාට සහ මිනිබිරියට හැඬූ කඳුළින් කවන අයුරු දක්නට ලැබුණි. පසුව විද්‍යාලයේ විදුහල්පතිනි හේමන්තා කල්‍යාණි මහත්මිය ඇතුළු ආරාධිත අමුත්තන් සමරු තිළිණයක් සහ රුපියල් ලක්ෂයක මුදලක් ලිලී වයලට් මහත්මියට පරිත්‍යාග කළාය.
