සිය මව රෝහලේ ජීවිතය හා මරණය අතර සටනක යෙදී සිටින අතරතුර පුතා සිය දිවියේ මුල්ම කඩයිම වන අපොස සාමාන්ය පෙළ විභාගයට මුහුණ දෙන්නේ මව සුව වී නිවෙසට නිරුපද්රිතව එනු ඇතැයි යන දැඩි විශ්වාසයෙනි. ඒ සියලු අපේක්ෂා බිඳ දමමින් විභාගය නිම වීමට දින 4ක් තිබියදී ඒ මව අවසන් ගමන් යන්නේ පුතුගේ සාර්ථිකත්වය දකින්න තරම් වාසනාවක් නැතිවය. මේ කිසිවක් නොදත් පුතු සාමාන්ය පෙළ විභාගය නිම කරන්නේ උසස් සාමර්ථ්යයක් ලැබ තම මවුගේ සිහිනය යථාර්ථයක් කිරීම උදෙසාය. පුතුගේ විභාගය ගැන අපරිමිත බලාපොරොත්තු තබා සිටි සිය බිරියගේ බලාපොරාත්තු ඉටු කිරීමත් පුතුගේ දිවියේ වැදගත් කඩයිම යහපත් මානසිකත්වයෙන් පසු කිරීමට ඉඩ හැරීමත් උදෙසා මව මිය ගිය බව පුතුට නොකියා සිටින්නට පියා සැලකිලිමත් වී තිබිණි.
ගාල්ල, තල්ගම්පිටියෙන් වාර්තා වන මේ අතිශය සංවේදි සිද්ධිය සපුරාම මෙසේය:
තල්ගම්පල ශ්රමදාන මාවතේ පදිංචි වෘත්තියෙන් ගාල්ල කරාපිටිය රොහලේ ඖෂධවේදිනියක වන බී.ජී. අයිරාංගනී මහත්මියගේ සහ කීර්තී නානායක්කාර දෙපළගේ පුතුද මෙවර අපොස සාමාන්ය පෙළ විභාගයට පෙනී සිටි අතර මේ දෙපළගේ බලාපොරොත්තුව වූයේ තම පුතු විභාගයෙන් ඉහළින්ම සමත් වනු දැකීමය. පුතු විභාගයට දැඩි කැප වීමෙන් හා උද්යෝගයෙන් පෙනී සිටින අයුරු මවුපියෝ නිරන්තරයෙන් සතුටු සිතින් බලා සිටියහ.
ඉකුත් 12 දා නිවෙසේ සියලු දෙනා දහවල් ආහාරය ගැනීමෙන් පසුව පුතුගේ සිත තවත් සතුටින් තැබීම සඳහා අතුරුපසට අයිස්ක්රීම්ද ගෙන ඒමට මවුපියෝ කටයුතු කළහ. සියලු දෙනා සතුටින් අයිස් ක්රීම් කමින් සිටින අතරතුර අයිරාංගනී මහත්මියට එක්වර කැස්සක් මතු වූ අතර කැස්ස නතර නොවී දිගින් දිගටම ඇති වීමත් සමඟ ඇය සිහිසුන් වූවාය. පසුව කලබලයට පත් සැමියා, පුතු ඇතුළු පිරිස මව ඉක්මනින් රෝහලක් කරා ගෙන යෑමට 1990 ගිලන් රථ සේවයට දැනුම් දුන්හ. ගිලන් රථය කඩිනමින් පැමිණි නමුත් එහි සිටි අය රෝගියා රෝහලට ගෙන යෑම ප්රතික්ෂෙප කර සිටියේ රෝගියා මිය ගොස් ඇති බැවින් ගිලන් රථ සේවයේ ගෙන ගිය නොහැකි බව පවසමිනි. එසේම ගිලන් රථ සේවයේ පැමිණි අය රෝගියාට අවශ්ය ප්රථමාධාර හෝ ඔක්සිජන් දීමක්ද සිදු කර නැත. එහෙත් ඒ අවස්ථාවේ අසල සිටි හෙදියන් දෙදෙනකු රෝගියා පරීක්ෂා කර බලා ඇය මිය ගොස් නැති බැවින් කඩිනමින් රෝහල්ගත කරන ලෙස දන්වා ඇත. එහෙත් ගිලන් රථයේ පැමිණි අය ඒ ඉල්ලීමද ප්රතික්ෂේප කර තිබේ. මේ අවස්ථාවේ ඇයගේ පුතු විලාප දෙන්නට වීම නිසා ගිලන් රථ සේවයේ අය කිසිවකුට දුරකතනයෙන් කතා කර රෝගියා මිය ගොස් ඇති බවත් දරුවාගේ විලාපය නිසා රෝගියා ගෙන එන බවත් පවසා කරාපිටිය රෝහලට ගෙන ගියේ යැයි අයිරාංගනී මහත්මියගේ සැමියා වන කීර්ති නානායක්කාර මහතා කීවේය.
කරාපිටිය රෝහලට රෝගියා ගෙන ගිය විට වෛද්යවරුන් කඩිනමින් ඇය දැඩි සත්කාර ඒකකයා ඇතුළත් කර ප්රතිකාර ආරම්භ කළ අතර, එසේ දින කිහිපයක් දැඩි සත්කාර ඒකකයේ ප්රතිකාර ලබමින් සිටියදී පුතුගේ විභාගය නිම වීමට දින 4කට පෙරාතුව ඇය මෙලොව හැර ගියාය. අයිරාංගනී මහත්මියගේ සිහිනය තම පුතු ඉතා උසස් ලෙස විභාගය සමත් වීම බව අවබෝධ කරගෙන සිටි සැමියා පුතුට මව මිය ගිය බැව් කීමට එය අවස්ථාව කර නොගත්තේය. මේ පුවත දැනගත හොත් එය දරාගැනීමට නොහැකිව පුතු සිය අධ්යාපන කටයුතු අඩපණ කර ගනු ඇතැයි සිතු පියා විභාග කටයුතු නිම වන තෙක් මවගේ මිය යෑම පුතුට නොපවසා සිටින්නට තීරණය කළේය. මේ කිසිවක් නොදත් පුතු සිතුවේ සිය මව රෝහලේ ප්රතිකාර ලබමින් සිටින බවයි. පුතාට ඒ බව විශ්වාස කිරීමට හැකි වන සේ ගෙදර පරිසරයද පියා විසින් සකස් කර තැබිණි.
මිය ගිය අයිරාංගනී මහත්මියගේ දේහය රෝහලේ මෘත ශරීරාගාරයේ තැන්පත් කර තබා පෙරේදා (14) පස්වරුවේ මල් ශාලාවට භාර දීමට කටයුතු කෙරිණි. ඇයගේ පුතු විභාගයේ අවසන් දින විෂයය සඳහා පෙනී සිටිමට ගාල්ලේ සිය පාසල වෙත ගිය පසු ඊයේ (15) දහවල් දේහය මල් ශාලාවේ තැන්පත් කර තැබීමට පියා ඇතුළු පවුලේ ඥාතීහු කටයුතු කළහ. ඇයගේ දේහය අද (16) ගාල්ල, තල්ගම්පිටියේ නිවෙසට ගෙන ඒමට නියමිතය. මේ කිසිවක් නොදත් පුතු තම මවට බරපතළ රෝගී තත්ත්වයක් නැති බැවින් ප්රතිකාරවලින් පසු නිවෙසට ගෙන ඒමට හැකියාව ලැබෙතැයි සිතා සිය විභාග කටයුතු නිම කර තිබේ.
පුතුගේ අනාගතය අඳුරු නොකර සිහින ජය ගැන්මේ මාවත තරණය කරන්නට පියා හා ඥාතීන් කළ එම ක්රියාව බොහෝ දෙනාගේ පැසසුමට ලක් වූ අතර ඒ සම්බන්ධයෙන් බොහෝ දෙනා පියා ඇතුළු ඥාතීන්ට ප්රණාමය පළ කරන අයුරු දක්නට ලැබිණි.
මේ සම්බන්ධයෙන් අදහස් දක්වන කීර්ති නානායක්කාර මහතා පැවැසුවේ 1990 ගිලන් රථ සේවය රෝගියා රෝහලට ගෙනයෑම ප්රතික්ෂේප නොකර කඩිනමින් රෝහලට ගෙන ගියේ නම් මීට වඩා වෙනස් සතුටුදායක ප්රතිඵලයක් අපට ලැබෙන්නට ඉඩ තිබුණු බවයි. මේ ආකාරයට කටයුතු කරන සුළුතරයක් නිසා 1990 ගිලන් රථ සේවාව සම්බන්ධයෙන් ජනතාව අතර පවතින විශ්වාසයේ බිඳීමක් ඇති විය හැකි බවද හෙතෙම කීවේය.
අක්මීමන විශේෂ - සුනිල් ගමගේ
