ඉඹුල්ගොඩ රාජසිංහ විදුහලේ සිසිල් පැන් දන්සල අද
ගම්පහ දිස්ත්‍රික් විශේෂ – සිසිල ගුණතිලක
වෙසක් උත්සවය නිමිති කරගෙන ගම්පහ, ඉඹුල්ගොඩ රාජසිංහ මහා විද්‍යාලයේ ශිෂ්‍ය නායක මණ්ඩලය මඟින් සංවිධානය කරනු ලබන සිසිල් පැන් දන්සල අද (23) පස්වරු 4.30 සිට විද්‍යාලයීය ප්‍රධාන ගේට්ටුව අබියසදී, විදුහල්පති අමරවීර මුදලිගේ මහතාගේ සහභාගිත්වයෙන් පැවැත්වේ.
තුසිත අධ්‍යාපන ආයතනයෙන් අද දන්සල් රැසක්
ගම්පහ දිස්ත්‍රික් විශේෂ – සිසිල ගුණතිලක
කිරිඳිවැල තුසිත අධ්‍යාපන ආයතනයේ ගුරුවරුන් හා දෙමව්පියන්ගේ සහයෝගයෙන් දෙවන වරටත් පවත්වන දන්සල අද (23) පස්වරු 12.30 සිට එම අධ්‍යාපන ආයතන පරිශ්‍රයේ දී පැවැත්වේ.
මෙම දන්සල සුප්, පාන්, කඩල, රොටි, මඤ්ඤොක්කා, ආප්ප, තේ, කෝපි, කෙසෙල්, ගස්ලබු, අන්නාසි ආදී ආහාරපානවලින් සමන්විතය.
ගම්පහ සමුපකාර රෝහලේ මින්ගෝ රයිස් දන්සල හෙට
ගම්පහ දිස්ත්‍රික් විශේෂ – සිසිල ගුණතිලක
වෙසක් උත්සවය නිමිත්තෙන් ගම්පහ සමුපකාර රෝහලේ සේවක සුබසාධක සංගමය මඟින් 15 වැනි වරටත් පවත්වනු ලබන Òමින්ගෝ රයිස්Ó දන්සල හෙට (24) පස්වරු 7.00 සිට එම රෝහල් පරිශ්‍රයේදී, සභාපති ලසන්ත නදීර කපුරුබණ්ඩාර මහතාගේ ප්‍රධානත්වයෙන් පැවැත්වේ.
සව් දන්සලක්
කිරිඳිවැල සමූහ
දොම්පේ ප්‍රාදේශීය සභාවේ පුස්තකාලය සහ කිරිඳිවැල ආයුර්වේද වෛද්‍ය මධ්‍යස්ථානය සංවිධානය කළ සව් දන්සල කිරිඳිවැල ප්‍රාදේශීය සභාවේ ලේකම් අජිත් රණසිංහ මහතාගේ ප්‍රධානත්වයෙන් පැවැත්වූ අවස්ථාව.
බියගම පොලිසියෙන් ත්‍රිරෝද රථවලට බෞද්ධ කොඩි 500ක්
මල්වාන සමූහ – මහානාම විතානගේ දෙල්ගොඩ සමූහ – සුදත් පුබුදු කීර්ති
මෙවර වෙසක් පොහොය නිමිත්තෙන් පොලිස්පති දේශබන්දු තෙන්නකෝන් මහතාගේ සංකල්පයකට අනුව ත්‍රිරෝද රථවල බෞද්ධ කොඩි ප්‍රදර්ශනය කිරීමේ නව වැඩපිළිවෙළ යටතේ, බියගම පොලිසිය මඟින් සිය පොලිස් බල ප්‍රදේශයේ ත්‍රිරෝද රථවල බෞද්ධ කොඩි ප්‍රදර්ශනය කිරීමේ වැඩසටහනක් ඊයේ (22) පෙරවරුවේ පැවැත්විණි.
මේ වැඩසටහනේදී නොමිලයේ බෞද්ධ කොඩි 500ක් ත්‍රිරෝද රථවල ප්‍රදර්ශනය කිරීමට කටයුතු කර තිබේ.
එහිදී බියගම පොලිසියේ වැඩබලන ස්ථානාධිපති ප්‍රධාන පොලිස් පරීක්ෂක චින්තන ලියනගේ මහතා ඇතුළු පොලිස් නිලධාරින් විසින් බියගම නිදහස් වෙළෙඳ කලාප ත්‍රිරෝද රථගාලේ හා මාර්ගයේ ධාවනය වන ත්‍රිරෝද රථවල බෞද්ධ කොඩි සවිකරනු ලැබූ අයුරු ඡායාරූපයේ දැක්වේ. ප්‍රජා පොලිස් ඒකකයේ ස්ථානාධිපති ප්‍රධාන පොලිස් පරීක්ෂක ඩබ්.ඩී. වීරසිංහ, රථවාහන අංශයේ ස්ථානාධිපති උප පොලිස් පරීක්ෂක එල්.ඒ.ඩී.එස්. ජයතිස්ස හා උප පොලිස් පරීක්ෂක ටී.බී.එන්. රාජකරුණා යන නිලධාරීහුද මෙහි වෙති.
විහාර මහා දේවි බාලිකාවෝ තුන්දහසක් අටසිල් සමාදන් වෙති
මල්වාන සමූහ – මහානාම විතානගේ දෙල්ගොඩ සමූහ – සුදත් පුබුදු කීර්ති
මෙවර වෙසක් පොහොයට සමගාමීව කිරිබත්ගොඩ විහාර මහා දේවි බාලිකා විද්‍යාලයේ බාලිකාවෝ තුන්දහසක් (3,000) පමණ දෙනකු පෙරේදා (21) එම විද්‍යාලයේදී අටසිල් සමාදන් වූහ. විදුහල්පතිනී දමයන්ති මහාලක්ෂ මහත්මියගේ හා නියෝජ්‍ය විදුහල්පති අජිත් අත්තනායක මහතාගේ උපදෙස් අනුව විද්‍යාලයීය බෞද්ධ සංගමය මඟින් සංවිධානය කර තිබූ එම ශීල ව්‍යාපාරයට පළමු වැනි ශ්‍රේණියේ සිට 13 වැනි ශ්‍රේණිය දක්වා පන්තිවල අධ්‍යාපනය ලබන බාලිකාවෝ මෙසේ ශීල ව්‍යාපාරයට එක් වී සිටියහ.
‘අපි සොයුරෝ’ සංගමයෙන් නූඩ්ල්ස් දන්සලක්
මල්වාන සමූහ – මහානාම විතානගේ
යබරලුව ‘අපි සොයුරෝ’ එකමුතු සංගමය මඟින් සංවිධානය කරන ලද නූඩ්ල්ස් දන්සලක් එළැඹෙන 25 වැනිදා පස්වරු 6.00ට යබරලුව ස්කෝල හන්දියේදී පැවැත්වේ.
