විදෙස්ගතව සිටින පාතාල ක්‍රියාකාරිකයකු හා මහා පරිමාණ මත්ද්‍රව්‍ය ජාවාරම්කරුවකු බව කියන කංජිපානි ඉම්රාන් යන අයගේ මත්ද්‍රව්‍ය ජාවාරමට ආධාර අනුබල දෙමින් ඔහු අත්අඩංගුවට ගැනීම වැළැක්වීමට කටයුතු කළැයි කියමින් මාලිගාවත්ත පොලිසිය අත්අඩංගුවට ගත් කංජිපානි ඉම්රාන්ගේ පියා සහ වැඩිමහලු සහෝදරයා එක් අයකුට රුපියල් ලක්ෂ 100 බැගින් වූ ශරීර ඇප දෙකක් මත මුදා හැරීමට කොළඹ අතිරේක මහේස්ත්‍රාත් මංජුල රත්නායක මහතා ඊයේ (29) නියෝග කෙළේය.
සැකකාර පියාට අධිකරණයෙන් පනවා තිබූ විදෙස් ගමන් තහනම ඉවත් කළ අධිකරණය ඔහුගේ පුත්‍රයාට විදෙස් ගමන් තහනමක් පැනවීය.
මෙලෙස ඇප මත මුදා හැරුණේ මොහොමඩ් නජීම් මොහොමඩ් ඉම්රාන් නොහොත් ‘කංජිපානි ඉම්රාන්’ යන අයගේ පියා වන නො. 99/08, ශ්‍රී සද්ධර්ම මාවත, මාලිගාවත්ත, කොළඹ 10 පදිංචි මොහොමඩ් ඊබ්‍රහීම් මොහොමඩ් නජීම් සහ ඔහුගේ වැඩිමහලු පුත්‍රයා වන මොහොමඩ් නජීම් අබ්දුල් සාජිත් නමැත්තන්ය.
කංජිපානි ඉම්රාන් යන අයගේ මත්ද්‍රව්‍ය ජාවාරමට හා එම සැකකරුගේ ඇපකරු වශයෙන් පෙනී සිටිමින් ඔහු අත්අඩංගුවට ගැනීම වැළැක්වීමට ආධාර අනුබල දුන්නැයි මාලිගාවත්ත පොලිසිය මෙම සැකකරුවන් දෙදෙනා අත්අඩංගුවට ගෙන තිබුණේ පෙරේදා (28)දාය. කංජිපානි ඉම්රාන් යන අය පොලිස් නිලධාරියකුගේ රාජකාරියට බාධා කරමින් බලපෑම් කළ බවට වන නඩුවක් සම්බන්ධයෙන් පෙරේදා (28) අධිකරණය හමුවේ නඩුවක් කැඳවුණු අතර එම නඩුවට සැකකාර කංජිපානි ඉම්රාන් පෙනී නොසිටීම හේතුවෙන් ඔහුට විවෘත වරෙන්තු නිකුත් කර තිබිණි. එම නඩුවේ ඇපකරුවන් වන්නේ මෙම සැකකරුවන් දෙදෙනා ය. එම සිද්ධියට අදාළව කංජිපානි ඉම්රාන් යන අය ඉකුත් 2022 වසරේ දෙසැම්බර් මස 28 වැනිදා ඇප ලබා ගැනීමෙන් අනතුරුව නැවත අධිකරණයේ පෙනී සිට නැත.
ඒ අනුව එම සැකකරු විදෙස් රටකට පලා ගොස් ඇතැයි පොලිසිය අධිකරණයට කරුණු වාර්තා කර තිබිණි.
