හිටපු ඇමැති ජොන්ස්ටන් ප්‍රනාන්දු මහතා ඇතුළු දෙදෙනකුගෙන් රුපියල් මිලියන 500ක වන්දියක් ඉල්ලා ජාතික ජන බලවේගයේ නායක අනුර කුමාර දිසානායක මහතා පැවරූ අපහාස නඩුව කොළඹ දිසා විනිසුරු සඳුන් විතාන මහතා ඉදිරියේ ඊයේ (29දා) විභාගයට ගන්නා ලදි.
නඩුවේ පැමිණිලිකරු වන ජාතික ජන බලවේගයේ නායක අනුර කුමාර දිසානායක අධිකරණය හමුවේ සාක්ෂි දෙන ලදි. එහිදී ඔහු කැලණිය විශ්වවිද්‍යාලයෙන් ලබාගත් විද්‍යාවේදී (Bsc) උපාධි සහතිකය ඇතුළු පාර්ලිමේන්තු ලේඛන සිය නීතිඥවරු මාර්ගයෙන් අධිකරණයට ඉදිරිපත් කිරීම කළේය.
ඒකාබද්ධ විපක්ෂ 2017 වසරේ ඔක්තෝබර් මස 15 වැනි දා තංගල්ල නගර සභා ශාලාවේදී ‘ජාතික සම්පත් සුරකිමු – දේශපාලන දඩයම නවතනු’ යන මැයෙන් පැවැති රැස්වීමකදී හිටපු ඇමැති ජොන්ස්ටන් ප්‍රනාන්දු මහතා සිදු කළ ප්‍රකාශයෙන් සහ එය විකාශය කිරීමෙන් සිය කීර්තියට වූ හානිය වෙනුවෙන් රුපියල් මිලියන 500ක වන්දියක් අයකර දෙන ලෙස ඉල්ලා මෙම නඩුව පැමිණිලිකරු සිය ලේඛනගත නීතිඥ ශානිකා සිල්වා මෙනෙවිය මඟින් ඉදිරිපත් කරන ලදි.
පැමිණිලිකරු සිය පෙත්සම මඟින් තමා මෙරට පිළිගත් දේශපාලන පක්ෂයක් වන ජනතා විමුක්ති පෙරමුණේ නායකයා බව හා පාර්ලිමේන්තුවේ විපක්ෂයේ ප්‍රධාන සංවිධායකවරයා බව කියා සිටියි.
හිටපු ඇමැති ජොන්ස්ටන් ප්‍රනාන්දු මහතාගේ ප්‍රකාශ බැලූබැල්මටම ද්වේශසහගත, අපහාසාත්මක හා අසත්‍ය ප්‍රකාශයක් බව ප්‍රකාශ කරන පැමිණිලිකරු එම ප්‍රකාශයෙන් තමාගේ අනාගත දේශපාලන බලාපොරොත්තු කෙරෙහි ඉමහත් අලාභයක් සිදුව ඇති බව පෙත්සම මඟින් සැලකර සිටියේය.
තමාට සිදු වූ අපහාසය වෙනුවෙන් වගඋත්තරකරුවන්ගෙන් රුපියල් මිලියන 500ක වන්දියක් ඉල්ලා 2017 වසරේ නොවැම්බර් 06 වැනිදා එන්තරවාසියක් යැවීම කළ ද එයට පිළිතුරු නොදුන් බව පෙත්සම්කරු කියා සිටියේය. ඒ අනුව විත්තිකරුවන්ගෙන් රුපියල් මිලියන 500ක වන්දියක් වෙන්වෙන්ව හෝ සාමූහිකව අයකර දෙන ලෙස සහ නඩු පැවරීම සිදුකළ දින සිට එයට නෛතික පොලිය ගෙවන ලෙස දන්වා තීන්දුවක් නිකුත් කරන ලෙස මෙම පැමිණිල්ල සිය නඩුකරයෙන් අධිකරණයෙන් ඉල්ලීම් කර තිබේ.
නඩු විභාගය ඔක්තෝම්බර් මස 27 වැනිදාට කල් තැබීම සිදුවිය. පැමිණිල්ල වෙනුවෙන් සුනිල් වටගල, සුසන්ත දොඩාවත්ත ඇතුළු නීතිඥ මණ්ඩලයක් ඉදිරිපත් විය.
