යුරෝපා පාර්ලිමේන්තු මැතිවරණයේ මූලික ඡන්ද ගණනයේදී ප්‍රංශ ජනාධිපති එමැනුවෙල් මැක්‍රොන්ගේ මධ්‍යස්ථ දේශපාලන පක්ෂය වන රෙනයිසන්ස් පක්ෂයේ සහාය ලැබුණු යුරෝපයේ පුනරුදය (ආර්ඊ) පක්ෂ සමූහය පරාජයට පත්වීම හේතුවෙන් හදිසි මැතිවරණයක් කැඳවමින් ප්‍රංශයේ පාර්ලිමේන්තුව විසුරුවා හැරීමට ජනාධිපති මැක්‍රොන් පියවර ගත් බව විදෙස් මාධ්‍ය වාර්තා කළේය.
යුරෝපා පාර්ලිමේන්තු මැතිවරණය සඳහා එක් එක් රටවල ඡන්ද විමසුම සිදුවන අතර, ප්‍රංශයේ පැවැති ඡන්ද විමසිමේදී ජනාධිපතිවරයාගේ පක්ෂය ලැබූ අන්ත පරාජය හේතුවෙන් වහාම මැතිවරණයක් කැඳවීමට ජයග්‍රාහී දක්ෂිණාංශික පක්ෂයෙන් එල්ල වූ බලපෑම් ඊට හේතු වී ඇතැයි ද වාර්තා වේ.
සාමාජිකයන් 720 දෙනකු පත් කර ගැනීම සඳහා දින 4ක් පුරා පැවැති යුරෝපා පාර්ලිමේන්තු මැතිවරණය සඳහා රටවල් 21ක ඡන්ද දායකයන් සිය ඡන්දය භාවිත කර ඇති අතර, ඊයේ පස්වරුව වන විට ප්‍රංශයේ දක්ෂිණාංශික පක්ෂයේ සහාය ලැබී ඇති යුරෝපීය ජනතා පක්ෂ සමූහයට (ඊපීපී) වැඩි බලයක් ලැබී තිබූ බව ද විදෙස් මාධ්‍ය වැඩිදුරටත් වාර්තා කළේය. එහි දෙවැනි ස්ථානය සමාජවාදී සහ ප්‍රජාතන්ත්‍රවාදී ප්‍රගතිශීලී පක්ෂ සන්ධානයට ලැබී තිබූ බවත්, ප්‍රංශ ජනාධිපතිවරයාගේ පක්ෂය එක්වී සිටින රිනිව් යුරෝප් පක්ෂය තුන්වැනි තැනට ඇද වැටී තිබූ බවත් වැඩිදුරටත් වාර්තා වේ.
