යුද හමුදාපති ලුතිනන් ජෙනරාල් විකුම් ලියනගේ මහතා පසුගිය දින නැඟෙනහිර ආරක්ෂක සේනා මූලස්ථානයේ නිල සංචාරයක නිරත වූයේය. සංචාරයේ නිරත යුද හමුදාපතිතුමන් වෙත භටපිරිස් විසින් හමුදා සම්ප්රදායානුකූල මුරය පසු කරගෙන යාමේ ගෞරවාචාරය පුදකිරීමෙන් අනතුරුව ආරක්ෂක සේනා ආඥාපති – නැඟෙනහිර මේජර් ජෙනරාල් එස්.ඒ. කුලතුංග මහතා විසින් එතුමන් පිළිගනු ලැබීය.
යුද හමුදාපති ආරක්ෂක සේනා මූලස්ථානය – නැඟෙනහිර යටතේ සේවයේ නියුතු භට පිරිස් ආමන්ත්රණය කරමින් මානුෂීය මෙහෙයුමේදී දිවි පිදූ වීරෝධාර රණවිරුවන් අනුස්මරණය කළ අතර සේවයේ නියුතු යුද හමුදා සාමාජිකයන්ගේ කැපවීම ඇගයීමට ලක් කළේය. එමෙන්ම රාජකාරි අතරතුර භට පිරිස් සමඟින් සුහදතාවය පවත්වා ගැනීමේ වැදගත්කම පිළිබඳව ද එතුමන් පෙන්වා දුන්නේය. සංචාරයේ සමාප්තිය සනිටුහන් කරමින් සමරු තිළිණ හුවමාරුවක් ද සිදු කෙරිණි.
ආරක්ෂක සේනා මූලස්ථාන පරිශ්රයේ සංචාරය නිමවීමෙන් අනතුරුව යුද හමුදාපති විශේෂ අමුත්තන් සඳහා වූ පොතේ සමරු සටහනක් ද තැබීය. මෙම අවස්ථාව සඳහා අධ්යක්ෂ ජෙනරාල් ප්රධාන මාණ්ඩලික 22, 23 සහ 24 පාබල සේනාංකයන්හි සේනාංකාධිපතිවරුන්, ආරක්ෂක සේනා මූලස්ථානය – නැඟෙනහිර භටකාර්ය සම්පාදන ආඥාපති, එම සේනාංකය යටතේ ස්ථාපිත බලසේනාවන්හි බලසේනාධිපතිවරුන්, අණදෙන නිලධාරීන් ඇතුළු ජ්යෙෂ්ඨ නිලධාරීන්, නිලධාරීන් සහ සෙසු නිලයන් පිරිසක් ද සහභාගී වූහ.
දිගාමඩුල්ල විශේෂ - වසන්ත චන්ද්රපාල
