ජා-ඇළ ඇළ ජපන් ජබර වැනි ආක්‍රමණශීලි ජලජ ශාකවලින් පිරී යාම නිසා පාසිවලින් ගහනව ඇළ විනාශ වීමේ තර්ජනයකට මුහුණපා ඇති බව ප්‍රදේශවාසීහු චෝදනා කර සිටිති. මේ තත්ත්වය නිසා ඇළ අවට ගම්වාසීන් තම ගෙවතු වගාවන් සදහා ඇළේ ජලය ලබා ගැනීමේදී ගැටලුවකට මුහුණපා ඇති බවද ඔවුහු සඳහන් කර සිටිති.
ජා-ඇළ ප්‍රාදේශීය ලේකම් කොට්ඨාසයට අයත් ඉදිවිටිය, කලඑළිය, දෑලතුර යන ප්‍රදේශවල අධික ජන කොටසක් තම එදිනෙදා වැඩ කටයුතු සඳහා ද ජා-ඇළ ඇළේ ජලය කාලාන්තරයක් මුළුල්ලේ භාවිතයට ගනිමින් සිටී. වසර ගණනාවකින් ඇළ පිළිසකර කිරීමට වාරි මාර්ග දෙපාර්තමේන්තුව පියවර ගෙන නැති බවද ඔවුහු සඳහන් කර සිටිති.
ඔවුන් වගකිව යුත්තන්ගෙන් ඉල්ලා සිටින්නේ ඇළේ රොන්මඩ ඉවත්කොට ආක්‍රමණශීලි ජලජ ශාක, පාසි ඉවත්කොට ඇළේ ජල ධාරිතාවය රඳවා ගැනීමට කඩිනම් පියවරක් ගන්නා ලෙසය. මේ පිළිබඳ ගම්පහ වාර්මාර්ග ප්‍රධාන ඉංජිනේරු ක්‍රිශාන්ත රුපසිංහ මහතා පවසන්නේ ඇළ අවට පදිංචි පිරිස් විසින්ම ඇළ තාවුල්ලේ අනවසර වගා කිරීම් සිදු කරන බවත් ඇළ දෙපසට අපවිත්‍ර කුණු සීමාවකින් තොරව බැහැර කිරීමත් ඇළ මේ අයුරින් ජරාජීර්ණ වීමට හේතුවක් වී ඇති බවය. ඇළ ආරක්ෂා කර ගැනීම ජනතාවගේ ද වගකීමක් බවය. කෙසේ වෙතත් හැකි ඉක්මනින් ජා-ඇළ ඇළ පිළිසකර කිරීමට කඩිනම් ක්‍රියා මාර්ගයක් ගන්න බවත්ය.
