- පොහොසත් සංස්කෘතියක් හිමි ශ්‍රී ලංකාවේ ජනතාව IFS සමාගමේ සාර්ථකත්වයට දායක වුණා
IFS සමාගමේ ගෝලීය ප්‍රධාන විධායක නිලධාරී මාර්ක් මොෆට්
- විදේශ සංචිත ඩොලර් බිලියන 5.5 දක්වා ශක්තිමත් වෙලා
තාක්ෂණ රාජ්‍ය ඇමැති කනක හේරත්
පරිගණක හා තොරතුරු තාක්ෂණය හරහා ආර්ථික හා තාක්ෂණික අංශ ඒකාබද්ධ කිරීමට රජයේ විශේෂ අවධානය යොමු වී ඇති බව ජනාධිපති රනිල් වික්‍රමසිංහ මහතා ප්‍රකාශ කළේය.
‘ශ්‍රී ලංකාවේ මෙතෙක් භාවිතා නොකළ විභවයන් උපයෝගී කර ගැනීම’ යන තේමාව යටතේ පැවැත්වෙන 2024 ‘DigiEcon’ ගෝලීය ආයෝජන සමුළුව, ජනාධිපති රනිල් වික්‍රමසිංහ මහතාගේ ප්‍රධානත්වයෙන් කොළඹ,සිනමන් ග්‍රෑන්ඩ් හෝටලයේදී පසුගියදා (25) ආරම්භ විය. එහිදී අදහස් දක්වමින් ජනාධිපතිවරයා මේ බව කීවේය.
ශ්‍රී ලංකාවේ ආයෝජන දිරිමත් කරමින් කොළඹ වරාය නගරය අක්වෙරළ ක්‍රියාකාරකම් සඳහා ද පහසුකම් සැලසෙන මූල්‍ය කලාපයක් ලෙස නිර්මාණය කිරීම තම අරමුණ බවත් ඒ තුළ ව්‍යවසායන් දියුණු කිරීම සහ ඩිජිටල් තාක්ෂණය භාවිතා කිරීම වැනි කටයුතු දෙස් විදෙස් ආයෝජකයන් වෙත පැවරෙන බවත් පැවසීය.
මෙහිදී වැඩිදුරටත් ජනාධිපති රනිල් වික්‍රමසිංහ මහතා මෙසේද පැවසීය.
අප වේගවත් වර්ධනයක් දෙස අවධානය යොමු කරනවා නම් නිසැකවම ඩිජිටල් ආර්ථිකය සහ සමස්ත නවෝත්පාදන පද්ධතිය අත්‍යවශ්‍යයයි. අප එය ආරම්භ කළේ සංචාරක කර්මාන්තය හා කෘෂිකාර්මික නවීකරණය හරහායි. මෙය හඳුනාගෙන ඇති තවත් වේගයෙන් වර්ධනය වන අංශයක්. අප එය ප්‍රවර්ධනය කරන්නේ කෙසේ ද? අප මෙතැන් සිට ගමන් කරන්නේ කොතැනට ද ? කෙසේ වෙතත් අප සතු හැකියාව සහ අපගේ අවශ්‍යතාව කුමක් ද යන්න පිළිබඳව අවධානය යොමු කළ යුතු වෙනවා. පළමුවෙන්ම, අපගේ ආර්ථිකය තුළ මේ අංශය පුළුල් කරන්නේ කෙසේ ද යන්න සොයා බැලිය යුතුයි. ඩිජිටල් ආර්ථිකය සහ ඩිජිටල් තාක්ෂණ ක්ෂේත්‍රයේ නවෝත්පාදනය අපට සහාය වන්නේ කෙසේද? යන්න සොයා බැලිය යුතුයි. මේ වන විට අපි සංවර්ධනය කළ යුතු ක්ෂේත්‍ර හඳුනාගෙන තිබෙනවා. කෘෂිකර්මාන්තය නවීකරණය ඩිජිටල් අංශයේ ව්‍යාප්තිය සමඟ එකට බැඳෙනවා.කෘෂිකර්මාන්තය, සුහුරු කෘෂිකර්මයක් ලෙස නවීකරණය කිරීමට අපගේ අවධානය යොමු වී තිබෙනවා. දෙවනුව, ඕනෑම අංශයක් පුළුල් කිරීමේදී, සලකා බැලිය යුතු කරුණු දෙකක් තිබෙනවා.
ඒ ආර්ථික අර්බුදය සහ තාක්ෂණය භාවිතා කිරීමයි.එම තාක්ෂණය දියුණු කිරීමට සහ භාවිතා කිරීමට හැකි ශ්‍රම බළකායක් ද අපට අවශ්‍ය වෙනවා. ඩිජිටල් ආර්ථිකය සම්බන්ධයෙන් ගත් විට, අප එය හඳුනාගෙන තිබෙන්නේ, ඒ සඳහා පවතින ඉල්ලුම වැඩිවෙමින් පවතින නිසයි. මීට අමතරව, ආසියාවේ සහ අප්‍රිකාව දෙසින් අනාගතයේදී ඇතිවන ඉල්ලුම දෙස බලන්න. දෘඪාංග සහ මෘදුකාංග යන අංශ දෙකම ආවරණය වන ආකාරයෙන් චීනය සහ ඉන්දියාව යන දැවැන්තයන් දෙදෙනකු අතර අප සිටිනවා. අප එම දැනුම ප්‍රයෝජනයට ගෙන මේ රටවල් සමඟ සහයෝගයෙන් කටයුතු කළ යුතුයි. අප දැනටමත් ඉන්දියාව සමඟ පෞද්ගලික අංශයේ පවතින අවස්ථා පිළිබඳ සාකච්ඡා ආරම්භ කර තිබෙනවා.ශ්‍රී ලංකා මෘදුකාංග සහ සේවා සමාගම් සංගමය (SLASSCOM) සහ තොරතුරු තාක්ෂණ සහ ව්‍යාපාර ක්‍රියාවලි කළමනාකරණ සමාගම්වල රාජ්‍ය නොවන ඉන්දියානු වෙළෙඳ සංගමය (NASSCOM) ආයතන මේ සම්බන්ධයෙන් සහයෝගයෙන් ක්‍රියා කරන අතර, තවත් ආයතන ද ඒ සඳහා එක්වනු ඇතැයි අප බලාපොරොත්තු වෙනවා.
අප මේ වෙළෙඳාම ගොඩනඟා ගැනීමට උත්සාහ කරන අතර අපගේ ජාතික වේදිකාව ගොඩනැඟීම සඳහා ද එමඟින් සහාය ගන්නවා. චීනය සමඟ මූලික සාකච්ඡා ආරම්භ කර ඇති අතර, එහි ද අප සාර්ථක ප්‍රතිඵලයක් බලාපොරොත්තු වෙනවා. අප සිටින්නේ ආසියාවේ. අප ඉදිරියට යා යුත්තේ මෙතැන සිටයි. අප විවිධ ක්ෂේත්‍ර දෙස බැලිය යුතුයි. එසේම කොළඹ වරාය නගරය, ශ්‍රී ලංකාව තුළ ආයෝජන දිරිමත් කරමින් අක්වෙරළ ක්‍රියාකාරකම් සඳහා ද පහසුකම් සැලසෙන මූල්‍ය කලාපයක් ලෙස නිර්මාණය කිරීම අපගේ අරමුණයි. ඒ සමඟම, ඒ තුළ කුමන ව්‍යවසායන් දියුණු කළ යුතුද සහ ඩිජිටල් තාක්ෂණය භාවිතා කරන්නේ කෙසේ ද යන්න පිළිබඳ ඉතිරි වැඩ කටයුතු දෙස් විදෙස් ආයෝජකයන්ට පැවරෙනවා. යටිතල පහසුකම් සම්බන්ධයෙන් ගත් විට, අප විද්‍යා හා තාක්ෂණ සංවර්ධන පනත යටතේ පිහිටුවන ලද ජාතික විද්‍යා හා තාක්ෂණ කොමිෂන් සභාව සහ ජාතික විද්‍යා පදනම යටතේ ජාතික මට්ටමින් පහසුකම් ගොඩනඟමින් සිටිනවා.
ඊට අමතරව අප නව නීති හඳුන්වා දෙනවා.පළමුව,අප ශ්‍රී ලංකා රජයේ ප්‍රධාන තාක්ෂණික උපදේශකයා ලෙස කටයුතු කරන ප්‍රධාන තාක්ෂණ නිලධාරියකු නිර්මාණය කරනවා. ඉන්පසුව, අප තාක්ෂණික හා නවෝත්පාදන කවුන්සිලය පිහිටුවනවා. එය වාණිජකරණය මත පදනම් වූ පර්යේෂණ සඳහා අරමුදල් සපයනු ඇති. අප ජාතික විද්‍යා පදනම හරහා ශුද්ධ හා ව්‍යවහාරික විද්‍යාවන් සඳහා ද අවශ්‍ය සහාය ලබාදීමට බලාපොරොත්තු වෙනවා. පර්යේෂණ වාණිජකරණය සඳහා ද ක්‍රමවේදයක් නිර්මාණය කිරීම අපගේ අරමුණයි. ශුද්ධ හා ව්‍යවහාරික පර්යේෂණ සඳහා රජය විසින් ලබාදෙන සියලුම අරමුදල් ජාතික විද්‍යා පදනම හරහා දෙන අතර, එහි ප්‍රමුඛතා සකස් කර ඒවායේ කාර්ය සාධනය ද අධීක්ෂණය කරනවා. සියලුම රාජ්‍ය ආයතන මෙයට අනුකූල විය යුතු අතර පර්යේෂණ වාණිජකරණය කිරීමට අපේක්ෂා කරන පිරිස් කොමිෂන් සභාව සමඟ කටයුතු කළ යුතුයි. මේ ක්‍රමය රාජ්‍ය සහ පෞද්ගලික යන දෙඅංශයටම මෙන්ම මීට පෙර පර්යේෂණ කටයුතු අත්හැරදමා තිබූ විශ්වවිද්‍යාල සඳහා ද විවෘත වෙනවා.
අප ඩිජිටල් පරිවර්තන නියෝජිතායතනය ද පිහිටුවනවා. මින් පෙර පරිගණක හා තොරතුරු තාක්ෂණය කෙරෙහි අවධානය යොමු කළ අප දැන් මේ හරහා ආර්ථික හා තාක්ෂණික අංශ ඒකාබද්ධ කිරීම පිළිබඳ අවධානය යොමු කරමින් සිටිනවා.අප හඳුන්වා දෙන අවසාන නව ආයතනය වන්නේ ජාතික කෘත්‍රිම බුද්ධි (AI) මධ්‍යස්ථානයයි. මේ වැඩසටහන සඳහා මානව සම්පත් අවශ්‍යයයි. කෙටි කාලීනව, මේ මානව සම්පත අපට වැඩිපුර නිෂ්පාදනය කළ හැකි නමුත් එය ඉදිරියේදී ප්‍රමාණවත් නොවිය හැකියි. මගේ මතය නොවුනත් ඇතැම්විට අපට මේ සඳහා පිටතින් පුහුණුකරුවන් ගෙන්වා ගැනීමට සිදුවිය හැකියි. එසේ නම් ඒ සඳහා බාධා නොකළ යුතුයි. අප වැඩි ශ්‍රම බළකායක් පුහුණු කරන තරමට ප්‍රතිඵලය යහපත් වනු ඇති. රටේ අපට පළපුරුදු මානව සම්පත අවශ්‍ය නම්, සමාගම්වලට බාධා නොවන පරිදි සහ ශ්‍රී ලාංකිකයන්ට මධ්‍ය කාලීනව ප්‍රගතියක් ලබාගත හැකි වන අයුරින් කෙටි කාලයක් සඳහා පිටතින් මානව සම්පත සපයා ගැනීමට ඉඩ දිය යුතුයි.
ඒ වගේම අප මේ වන විට සමස්ත වෘත්තීය පුහුණු ක්‍රමවේදයම ප්‍රතිව්‍යුහගත කරමින් සිටිනවා. එහිදි ආයතන බොහෝ ප්‍රමාණයක් වෙනුවට පළාත් නියෝජිතායතන නවයක් සහිත එක් අධිකාරියක් පිහිටුවන අතර එමඟින් පවත්වාගෙන යන විවිධ පුහුණු මධ්‍යස්ථාන සියල්ල වෘත්තීය විද්‍යාල බවට පත් කරනවා. ඒ සමඟම තාක්ෂණික විද්‍යාල ද ප්‍රතිසංස්කරණයට ලක්වෙනවා. අප සිසුන්ට වසර දෙකකින් පමණ උපාධියක් ලබා ගැනීමට ඉඩ සලසනු ලබන සහාය උපාධි වැඩසටහනක් හඳුන්වාදීමට සැලසුම් කරනවා. වෘත්තීය හා තාක්ෂණික විශ්වවිද්‍යාල, විවෘත විශ්වවිද්‍යාලය හෝ වෙනත් උසස් අධ්‍යාපන ආයතනවලින් අවසානයේ උපාධිය හෝ ශාස්ත්‍රපති උපාධි දක්වා ඉහළ යා හැකි සහාය උපාධි සහිත උපාධිධාරීන් සංඛ්‍යාව ඉහළ නැංවීම මේ වැඩසටහනේ අරමුණයි. මේ ප්‍රවේශය උසස් අධ්‍යාපන සහ විශ්වවිද්‍යාල අධ්‍යාපන යන ක්ෂේත්‍ර දෙකෙහිම යෙදී සිටින පිරිස්වලට ප්‍රයෝජනවත් වනු ඇතියි. චෙන්නායි IITහි මණ්ඩපයක් මහනුවර ආරම්භ කිරීම පිළිබඳ අප ඉන්දියාව සමඟ සාකච්ඡා කරමින් සිටිනවා. ඒ වගේම අප කොතලාවල ආරක්ෂක විශ්වවිද්‍යාලයේ ආකෘතිය අනුව සැකසුණු නව විශ්වවිද්‍යාල තුනක් ආරම්භ කිරීමට ද බලාපොරොත්තු වෙනවා. පළමුවැන්න කුරුණෑගල විශ්වවිද්‍යාලය, සීතාවක සහ කොළඹින් පිටත ඇතැම් විට ගම්පහ ප්‍රදේශයේ ස්ථානයක් පිළිබඳවත් අප සලකා බලමින් සිටිනවා. මේ විශ්වවිද්‍යාල තාක්ෂණය සහ කළමනාකරණය කෙරෙහි අවධානය යොමු කරන අතර විවිධ පාඨමාලා පිරිනැමීම සඳහා අනෙකුත් විදේශීය විශ්වවිද්‍යාල සමඟ සහයෝගයෙන් කටයුතු කරනු ඇති. අප විශ්වවිද්‍යාලවල පවතින පහසුකම් වැඩි දියුණු කරමින් ඒවා පුළුල් කරනවා. දැනට ඉංජිනේරු පාඨමාලා නැති සමහර විශ්වවිද්‍යාලවලට ඒවා හඳුන්වාදීමට අවසර දෙනු ලබන අතර, විශ්වවිද්‍යාල තුළ කෘත්‍රිම බුද්ධිය (AI) ඉගැන්වීම හඳුන්වාදීම සම්බන්ධයෙන් ද කටයුතු කරමින් තිබෙනවා.
කලා විෂය ධාරාවෙන් කලා පීඨවල ඉගෙනුම ලබන ශිෂ්‍ය ශිෂ්‍යාවන් ගණනාවක් අපට ඉන්නවා. රජයේ රැකියා දෙස බැලුවොත් මේ වන විට ඒ අයට රැකියා ලබාදීම ගැටලුවක් වී තිබෙනවා. භූගෝල විද්‍යාව වැනි විෂයන් හෝ වෙනත් විෂයන් හදාරන අවස්ථාවක ඒ අනුව ඔවුන්ට රැකියා දිය හැකි සමාගම් තිබේ ද යන්න පිළිබඳ අප දැන් සාකච්ඡා කරමින් සිටිනවා.ඔවුන් විශ්වවිද්‍යාලයේ සිටියදී මේ සිසුන් තොරතුරු තාක්ෂණ සහ ඉංග්‍රීසි භාෂාව පිළිබඳ ප්‍රවීණයන් බවට පත්වන්නේ නම් එවිට ඔවුන්ට රැකියා සොයාගත හැකියි. මේ වැඩසටහන මඟින් නිශ්චිත පිරිසකට රැකියා අවස්ථා සැලසෙනවා. මේ සඳහා රජය අරමුදල් සපයනු ඇති. වැටුප් ගෙවීමට මුදල් නැති නිසා සංවර්ධන නිලධාරීන් ලෙස තවත් අමතර රැකියා ඇති කිරීමට වඩා තොරතුරු තාක්ෂණ විෂය හැදෑරීමට මුදල් ලබාදීම වැදගත්. ඒ නිසා යෝජනා වී ඇති මේ වැඩපිළිවෙළ ස්ථාපිත කරන්නේ කෙසේ ද යන්න පිළිබඳ ඔබ සැමදෙනා සමඟ සාකච්ඡා කිරීමට අප සූදානම්.
තාක්ෂණ රාජ්‍ය ඇමැති කනක හේරත් මහතා-
ජනාධිපති රනිල් වික්‍රමසිංහ මහතාගේ දූරදර්ශී නායකත්වය නිසා ශ්‍රී ලංකාව කැපී පෙනෙන ආර්ථික ප්‍රබෝධයක් අත්කරගෙන තිබෙනවා.පොලී අනුපාත සියයට 30 සිට සියයට 12 දක්වා පහත වැටී ඇති අතර උද්ධමනය සියයට 68 සිට තනි ඉලක්කමක් දක්වා අඩු වී තිබෙනවා.විනිමය අනුපාතිකය ස්ථාවර කරමින් අපගේ විදේශ සංචිත ඩොලර් බිලියන 5.5 දක්වා ශක්තිමත් වී ඇති අතර අපගේ දළ දේශීය නිෂ්පාදිතය ධන සියයට 5.3 දක්වා ඉහළ ගොස් තිබෙනවා. මේ ජයග්‍රහණ සියල්ල මේ ඩිජිටල් ආයෝජන සමුළුවට සත්කාරකත්වය සැපයීම වෙනුවෙන් අප පරිපූර්ණ ලෙස ස්ථානගත කර තිබෙනවා.
පසුගිය වසරේ ශ්‍රී ලංකාවේ තනි පුද්ගල අන්තර්ජාල භාවිතය සියයට 3.9කින් වර්ධනය වී ඇති අතර එය ගෝලීය සාමාන්‍ය වන සියයට 1.8 ද ඉක්මවා තිබෙනවා. සමාජ මාධ්‍ය භාවිතය සියයට 6.5 කින් ඉහළ ගොස් ඇති අතර, අපගේ ජංගම දුරකතන භාවිතය සියයට 148ක් වෙනවා. මේ තත්ත්වය මඟින් මෙරට ඩිජිටල් පරිවර්තනයක් සඳහා අප සතු හැකියාව පෙන්නුම් කෙරෙනවා. 2025 වන විට දීපව්‍යාප්ත වශයෙන් 4G ආවරණය ගැනීම අපගේ ඉලක්කය වන අතර අපගේ අන්තර්ජාල සම්බන්ධතා සඳහා ඇති විකල්ප වැඩිදියුණු කිරීමේ අරමුණින් Starlink අන්තර්ජාල සේවාව සඳහා ද අප මූලික අනුමැතිය දී තිබෙනවා.
ආයෝජන ප්‍රවර්ධන රාජ්‍ය ඇමැති දිලුම් අමුණුගම මහතා-
DigiEcon වැඩසටහන තාක්ෂණ අමාත්‍යාංශය සමඟ සහයෝගයෙන් සැලකිය යුතු වැඩ කොටසක් කර තිබෙනවා. එසේම රාජ්‍ය අංශය ඩිජිටල්කරණයට ලක් කිරීම ආයෝජන ප්‍රවර්ධනය කිරීමේ ප්‍රධාන සාධකයක් වී තිබෙනවා. රේගු සත්‍යාපන කටයුතු සහ සැපයුම් ඩිජිටල්කරණය කිරීම වැනි තාක්ෂණ අමාත්‍යාංශය විසින් කළ මෑතකාලීන ව්‍යාපෘති, විදේශ ආයෝජන සඳහා පෙර තිබූ අපහසු ක්‍රියාවලි විධිමත් කර තිබෙනවා. ආයෝජන මණ්ඩලය (BOI) සහ අපනයන සංවර්ධන මණ්ඩලය (EDB) යන ආයතන දෙක මේ වන විට සිය කාර්යක්ෂමතාව ඉහළ නැංවීමට ඩිජිටල් මෙවලම් භාවිතා කරනු ලබනවා.
ජනාධිපති කාර්ය මණ්ඩල ප්‍රධානී සහ ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක මහතා-
ආර්ථික වර්ධනය සහ ස්ථාවරත්වය ඇති කිරීමට ශ්‍රී ලංකාව සඳහා මේ වන විට මුදල්, මූල්‍ය සහ පාලන අංශයන්ගේ සැලකිය යුතු ව්‍යුහාත්මක ප්‍රතිසංස්කරණ කර තිබෙනවා. මූල්‍ය අංශයෙන්, මහ බැංකු පනත, රාජ්‍ය මූල්‍ය කළමනාකරණ පනත සහ රාජ්‍ය ණය කළමනාකරණ පනත වැනි නව නීති හඳුන්වාදී තිබෙනවා. මේ පියවර මඟින් මහ බැංකුවේ ස්වාධීනත්වය ඉහළ නැංවීම, විනයගරුක මූල්‍ය කළමනාකරණයක් සහතික කිරීම සහ රාජ්‍ය ණය ඵලදායී ලෙස කළමනාකරණය කිරීම, එමඟින් වඩාත් ස්ථාවර සහ පුරෝකථනය කළ හැකි ආර්ථික පරිසරයක් නිර්මාණය කිරීම අරමුණු කරනවා.
ප්‍රතිසංස්කරණ ක්‍රියාදාමයේ ප්‍රධාන අංගයක් වන ආර්ථික පරිවර්තන පනත් කෙටුම්පත මේ වන විට ලෝක බැංකුවේ සහ ජාත්‍යන්තර මූල්‍ය අරමුදලේ ධනාත්මක ඇගයීමට ද ලක්ව තිබෙනවා. මේ නීති මඟින් ආර්ථික වර්ධනයේ සහ නවීකරණයේ නව යුගයක් ආරම්භ කරනු ඇතැයි අප අපේක්ෂා කරනවා. වේගයෙන් වර්ධනයක් අත්කරගත හැකි ක්ෂේත්‍ර අතර සංචාරක ව්‍යාපාරය, ඉතා පහසුවෙන් ළඟා විය හැකි ක්ෂේත්‍රයක් බව අප හඳුනාගෙන තිබෙනවා. මේ අංශය දියුණු කිරීමට පමණක් නොව ඉහළ පෙළේ සංචාරකයන් ආකර්ෂණය කර ගනිමින් එය නඟා සිටුවීමට ද අප කටයුතු කරමින් සිටිනවා.
IFS සමාගමේ ගෝලීය ප්‍රධාන විධායක නිලධාරී මාර්ක් මොෆට් මහතා-
IFS සමාගමේහි ප්‍රධාන විධායක නිලධාරියකු ලෙස පෞද්ගලිකව මා පමණක් නොව, පසුගිය අවුරුදු 25ක කාලයක් පුරා ශ්‍රී ලංකාවේ සිටින IFS ප්‍රජාව උණුසුම් ලෙස පිළිගැනීම සම්බන්ධයෙන් ජනාධිපති රනිල් වික්‍රමසිංහ මහතාට සහ තාක්ෂණ රාජ්‍ය ඇමැති කනක හේරත් මහතාට ස්තුතිය පුද කිරීමට කැමැතියි. මගේ අත්දැකීම් අනුව, ශ්‍රී ලංකාව යනු ස්වීඩනයේ ආරම්භ කරන ලද IFS මගේ සමාගම සමඟ ගැඹුරු සහ දිගුකාලීන සබඳතා ගොඩනඟා ගත් රටක්. ශ්‍රී ලංකාවේ ජනතාව, ඔවුන්ගේ පොහොසත් සංස්කෘතිය සහ ප්‍රශංසනීය කාර්යයන් ආචාර ධර්ම සමඟින්, IFS සමාගමේ අඛණ්ඩ සාර්ථකත්වයට නිසැකවම දායක වී තිබෙනවා. මේ වන විට තුන්වතාවක් ශ්‍රී ලංකාවට පැමිණ තිබෙනවා. අප පසුගිය වසර 25 පුරා ශ්‍රී ලංකාව තුළ ආයෝජනය කර ඇති අතර තවත් පුද්ගලික ආයතන තුනක් මඟින් අපට මේ සඳහා සහාය ලැබුණා.
එම ආයතන සංවිධාන රට තුළ IFS සමාගමේ සාර්ථකත්වය ගොඩනැඟීමට සහ ඔවුන්ගේ අනෙකුත් සමාගම් සඳහා අපගේ මෙහෙයුම් පුළුල් කිරීමට ද උනන්දු වෙනවා. මේ සඳහා IFS හෝල්ඩින් සමාගම කොළඹ වරාය නගරයේ නව ව්‍යාපෘතියක් ආරම්භ කරනවා. මේ ව්‍යාපෘතිය මඟින් අපගේ ආයෝජකයන් සතු IFS සමාගමට අයත් නොවන සමාගම් වෙත තොරතුරු තාක්ෂණ සේවා සපයනු ලබනු ඇති අතර ඉදිරි වසරවලදී ශ්‍රී ලංකාවේ අමතර රැකියා අවස්ථා දහස් ගණනක් උත්පාදනය කිරීමට ද අපේක්ෂා කරනවා යැයි පැවසීය.
විදේශ කටයුතු ඇමැති ජනාධිපති නීතීඥ අලි සබ්‍රි, ශ්‍රී ලංකාවේ චීන තානාපති කී සෙන්හොන්ග් (Qi Zhenhong), තාක්ෂණ අමාත්‍යාංශයේ ලේකම් ආචාර්ය ධර්මසිරි කුමාරතුංග,විදේශ කටයුතු අමාත්‍යාංශයේ ලේකම් අරුණි විජේවර්ධන මහත්ම මහත්මීන් ඇතුළු අමාත්‍යාංශ ලේකම්වරුන්, දේශීය හා විදේශීය ආයෝජකයන් ඇතුළු පිරිසක් මේ අවස්ථාවට එක්ව සිටියහ.
නෙත්මි පූජනී රත්නායක
