නීතිඥවරියක බව අඟවමින් විදේශ අධ්‍යාපනය සඳහා සිසුන් යොමු කරන ආයතනයක් ගාලු මුවදොර පවත්වාගෙන ගිය කාන්තාවක් ලබන 9 දක්වා රක්ෂිත බන්ධනාගාරගත කරන ලෙස කොටුව මහේස්ත්‍රාත් කෝසල සේනාධීර මහතා ඊයේ (04) නියෝග කළේය.
මෙලෙස රක්ෂිත බන්ධනාගාරගත කරනු ලැබුවේ රුසියානු භාෂා විදේශ අධ්‍යාපන ආයතනයක හිමිකාරිනියක් වන මනෝහාරි පරමේෂ්වරන් නමැති කාන්තාවකි.
සැකකාර කාන්තාව රුසියානු රාජ්‍ය විශ්වවිද්‍යාලයක රුසියානු භාෂාව ඉගෙන ගැනීමට යවන බව පවසා රුපියල් විසිපන් ලක්ෂ අනූ දහසක මුදලක් වංචා කළ බවට ටෝනි ප්‍රනාන්දු යන අයකු සිදු කළ පැමිණිල්ලක් කැඳවූ අවස්ථාවේදී සැකකාර කාන්තාවට ඇප ලබා දෙන ලෙස කළ ඉල්ලීම මහේස්ත්‍රාත්වරයා ප්‍රතික්ෂේප කළේය.
එම මුදල් ලබාගෙන මාස තුනක සංචාරක වීසා මත පැමිණිලිකරු සිසුන් රුසියානු රාජ්‍යයට යවා ඇති අතර, මාස තුනක වීසා පමණක් ලබා තිබීම හේතුවෙන් ඔහු එරට ආගමන විගමන දෙපාර්තමේන්තුව විසින් මෙරටට පිටුවහල් කර ඇති බව ඔහු වෙනුවෙන් පෙනී සිටි නීතිඥවරු අධිකරණයට දන්වා සිටියහ. අධ්‍යාපන ආයතනයක් පවත්වාගෙන ගොස් තිබෙන්නේ ඇය නීතිඥවරියක ලෙස පෙනී සිටිමින් බවත් එලෙස පවසමින් පැමිණිලිකරුට බැණ වැදී ඇති බවත් පැමිණිල්ල අධිකරණයට දන්වා සිටි අතර, ඒ බව ශ්‍රේෂ්ඨාධිකරණයෙන් ලිඛිතව විමසා සිටි අවස්ථාවේදී ඇය නීතිඥවරියක නොවන බවට දන්වා ඇතැයිද ඔවුහු අධිකරණයට දන්වා සිටියහ.
