ඓතිහාසික රුහුණු කතරගම මහා දේවාලයේ 2024 වාර්ෂික ඇසළ මංගල්‍යය හෙට (06) දිනෙන් ආරම්භ කෙරේ. හෙට සිට දිනපතා පෙරහර පැවැත්වෙන අතර, අවසාන මහ පෙරහර 21 වැනිදා වීදි සංචාරය කෙරේ. 22 වැනිදා අලුයම මැණික් ගඟේ දිය කැපීමෙන් පසු උත්සව කටයුතු නිමාවට පත්වේ.
උතුරු නැඟෙනහිර ප්‍රදේශවල සිට පාද යාත්‍රාවෙන් පැමිණෙන බැතිමතුන් මේ දිනවල කුමන සහ යාල වනෝද්‍යාන හරහා කතරගම පුදබිමට පැමිණෙමින් සිටිති. වාර්ෂිකව පහළොස් දහසකට අධික බැතිමතුන් පිරිසක් මෙලෙස පැමිණෙති.
ඉකුත් 03 වැනිදා ආරක්ෂක රාජ්‍ය ඇමැති ප්‍රමිත බණ්ඩාර තෙන්නකෝන් මහතා පාද යාත්‍රාවෙන් පැමිණෙන බැතිමත්හු සමඟ එක්වී පුදබිමට පැමිණියහ. මේ අවස්ථාවේදී බස්නායක නිලමේ තැන්පත් ඩිෂාන් වික්‍රමරත්න ගුණසේකර මහතා විසින් රාජ්‍ය ඇමැතිවරයා පිළිගනු ලැබීය.
මෙවර ඇසළ මංගල්‍ය අතිඋත්කර්ෂවත් ලෙස පැවැත්වීමට බස්නායක නිලමේ තැන්පත් ඩිෂාන් වික්‍රමරත්න ගුණසේකර මහතා කටයුතු යොදා ඇති අතර, පැරණි චාරිත්‍රානුකූලව අලි ඇතුන් සහිතව උඩරට, පහතරට සහ සබරගමු සාම්ප්‍රදායික නැටුම්වලින් පෙරහර පැවැත්වේ.
උත්සව සමයේ කතරගම පුදබිමට පැමිණෙන බැතිමතුන්ට අවශ්‍ය සියලුම පොදු පහසුකම් සැලසීමට කඳවුරු භාර නිලධාරී, මොනරාගල දිසාපති පසන් රත්නායක මහතා කටයුතු කර ඇත. බැතිමතුන්ගේ ආරක්ෂාවට ශ්‍රී ලංකා පොලිසිය සහ ශ්‍රී ලංකා යුද්ධ හමුදාව විශේෂ වැඩසටහනක් ක්‍රියාත්මක කර ඇති අතර, ජල සහ සෞඛ්‍ය පහසුකම් සැලසීමට ද ඔවුන් විසින් කටයුතු යොදා ඇත.
