අස්වැසුම දෙවැනි අදියරේ සමීක්ෂණ කටයුතු එළඹෙන 15 වැනිදා සිට ආරම්භ කිරීමට ආණ්ඩුව තීරණය කර තිබේ.
සුබසාධක ප්‍රතිලාභ මණ්ඩලය සමඟ මුදල් අමාත්‍යාංශයේ දී ඊයේ (04) පැවැති විශේෂ සාකච්ඡාවේ දී මෙම තීරණය ගත් බව ඇමැතිවරයා සඳහන් කළේය.
මෙම වැඩසටහනේ දෙවැනි අදියර සඳහා අයදුම්පත් යොමු කිරීමට නොහැකි වූ පිරිසට ඉදිරි සතියක කාලය තුළ ඒ සඳහා අවස්ථාව ලබාදීමට පියවර ගෙන තිබෙන බවද මුදල් රාජ්‍ය ඇමැති ෂෙහාන් සේමසිංහ මහතා පවසයි.
සමීක්ෂණ කටයුතු ජූලි මස 15 වැනි දා නිල වශයෙන් ආරම්භ කිරීමට සූදානම් වුවද කඩිනමින් දෙවැනි අදියරේ ප්‍රතිලාභ ගෙවීම ආරම්භ කිරීමේ අපේක්ෂාවෙන් හැකි සෑම දිස්ත්‍රික්කයකම එම කටයුතු ආරම්භ කරන බව ඒ මහතා සඳහන් කළේය.
කිසියම් පාර්ශ්වයක් සුදුසුකම් නොමැතිව අස්වැසුම ප්‍රතිලාභ ලබා ගන්නේ නම් ඒ බව තහවුරු කර ගැනීම සඳහා සුදුසුම අවස්ථාව මෙය බව සඳහන් කළ සේමසිංහ මහතා තවදුරටත් අස්වැසුම දෙවැනි අදියර සඳහා අයදුම්පත් යොමු නොකළ පිරිසට ඉදිරි සතිය තුළ එම අවස්ථාව උදාවන බව ද කියා සිටියේ ය.
දෙවැනි අදියර සඳහා මේ වනවිට අයදුම්පත් 475,000 ක් පමණ ලැබී තිබෙන අතර ඉන් අයදුම්පත් 450,000ක පමණ තොරතුරු පද්ධතියට ඇතුළත් කර ඇති බව ද යම් යම් අඩුපාඩු සහිතව පුරවන ලද ඉතිරි අයදුම්පත් 25,000ක පමණ ප්‍රමාණය ප්‍රාදේශීය ලේකම් කාර්යාලවල ඇති බව ද සේමසිංහ මහතා පැවසීය.
පවුල් ලක්ෂ 24ක් සඳහා අස්වැසුම ප්‍රතිලාභ ලබාදීම රජයේ අපේක්ෂාව වන අතර ඒ සඳහා අවශ්‍ය මුදල් වෙන්කර ඇති බවද වඩාත් සුදුසුම කණ්ඩායම වෙත ප්‍රතිලාභ ලබාදීමට හැකි සෑම පියවරක්ම ගන්නා බව ද ඇමැති වැඩිදුරටත් පැවසීය.
