අධික ලෙස බීමත්ව සිහිසුන් වූ බව කියමින් නිවසට ඇරලවන ලද මුලතිව් පුදුකුඩිඉරිප්පු ස්වාතිපුරම් ප්‍රදේශයේ පුද්ගලයෙකු පහර දීමකින් මියගොස් ඇති බවට පශ්චාත් මරණ පරීක්ෂණයේදී 3දා හෙළි වී තිබේ.
ඒ අනුව අදාළ සැකකරුවන් අත්අඩංගුවට ගෙන අධිකරණය හමුවට ඉදිරිපත් කරන ලෙස මුලතිව් මහේස්ත්‍රාත්වරයා පොලිසියට නියෝග කොට ඇත.
28 හැවිරිදි නාගරත්නම් ස්වයදීපන් නමැති මියගිය පුද්ගලයා සවස් කාලයේදී ඔහුගේ මිතුරන් පිරිසක් සමඟ මත්පැන් පානය කිරීමට එක් ස්ථානයක් වෙත ගොස් තිබේ.
මධ්‍යම රාත්‍රියේදී ඔහුව කර තබාගත් පිරිසක් නිවසට පැමිණ ඔහු අධික ලෙස මත්පැන් පානය කිරීම නිසා සිහි මූර්ජා වූ බවත් වෙරිමත සිඳී ගිය පසුව ඔහු අවදි වන බවත් පවසා පැමිණි පිරිස පිටව ගොස් තිබේ.
පසුදින උදෑසන ඔහු අවදි නොවීම නිසා නිවසේ උදවිය ඔහුව පුදුකුඩිඉරිප්පු රෝහලට රැගෙන ගොස් තිබේ.
එහිදී රෝගියා පරීක්ෂා කළ වෛද්‍යවරු ප්‍රකාශ කොට ඇත්තේ ඔහු මියගොස් ඇති බවයි.
මරණය සම්බන්ධයෙන් පැවති පශ්චාත් මරණ පරීක්ෂණයේදී ඔහුගේ හිසට පහරවල් කිහිපයක් එල්ල වීමෙන් පසුව මොළයේ අභ්‍යන්තරයට රුධිරය වහනය වීම නිසා මරණය සිදුව ඇති බවට අධිකරණ වෛද්‍ය නිලධාරිවරයා නිගමනය කොට තිබේ.
ඒ අනුව පොලිසිය මුලතිව් අධිකරණයට කරුණු වාර්තා කිරීමෙන් පසුව සිද්ධියට සම්බන්ධ සැකකරුවන් අත්අඩංගුවට ගන්නා ලෙස පොලිසියට නියෝග ලැබී තිබේ.
