සංවිධානාත්මක අපරාධ කල්ලි නායකයකු වන දැනට විදේශගතව සිටින එස්. එෆ්. ජගත් නමැත්තාගේ මෙරට මත්ද්‍රව්‍ය ජාලය මෙහෙයවන පුද්ගලයින් දෙදෙනෙකු අයිස් ග්‍රෑම් දහයයි මිලිග්‍රෑම් හත්සියයක් සමඟ අත්අඩංගුවට ගත් බව බස්නාහිර පළාත දකුණ අපරාධ කොට්ඨාසය පවසයි.
මෙසේ අත්අඩංගුවට ගෙන ඇත්තේ පිළියන්දල පොල්කොටුව (35) හා හෝමාගම බ්‍රාහ්මණගම (30) පදිංචි දෙදෙනෙකු බව පොලිසිය කියයි.
මත්ද්‍රව්‍ය ජාවාරම්කරුවන් දෙදෙනකු පිළිබඳව බස්නාහිර පළාත දකුණ අපරාධ කොට්ඨාසයේ උප පොලිස් පරීක්ෂක කවිශංක නිලධාරියාට ලද තොරතුරකට අනුව හෝමාගම බ්‍රාහ්මණගමදී සහ පිළියන්දල පොල්කොටුව හන්දියේදී මොවුන් දෙදෙනා අත්අඩංගුවට ගෙන තිබේ.
පසුව සැකකරුවන් පරීක්ෂා කිරීමේදී බ්‍රාහ්මණගම පුද්ගලයා ළඟ තිබී අයිස් මත්ද්‍රව්‍ය ග්‍රෑම් 5 මිලිග්‍රෑම් 500ක් සහ පොල්කොටුවේ පුද්ගලයා ළඟ තිබී අයිස් ග්‍රෑම් 05 මිලිග්‍රෑම් 200ක් භාරයට ගෙන තිබුණි.
මොවුන්ගෙන් වැඩිදුර ප්‍රශ්න කිරීමේදී මෙම අයිස් මත්ද්‍රව්‍ය දැනට විදේශගතව සැඟව සිටින සංවිධානාත්මක අපරාධ කල්ලි නායකයකු වන එස්. එෆ්. ජගත් නමැත්තාට අයත් බවත් ඔහුගේ උපදෙස් මත මෙම මත්ද්‍රව්‍ය ගැනුම්කරුවන්ට අලෙවි කර ඇති බවට තොරතුරු අනාවරණය වූ බවත් පැවැසේ.
එස්. එෆ්. ජගත් නැමැත්තා මීට වසරකට පමණ පෙර කොට්ටාව හොරණ පාරේ පෞද්ගලික රසායනාගාරයක් තුළදී පුද්ගලයෙකුට වෙඩි තබා ඝාතනය කිරීම හා හෝමාගම හිරිපිටිය ප්‍රදේශයේ බස් රථගාලක රැඳී සිටි සංජු නමැත්තාට වෙඩි තබා ඝාතනය කිරීමට තැත්කිරීම ඇතුළු සිද්ධීන් රැසකට චෝදනා ලැබූවකු බවත් එම සිද්ධීන්වලට සැකකරුවන් සම්බන්ධ බවට පොලිසිය සැක කරයි.
ඒ අනුව අත්අඩංගුවට ගත් දෙදෙනා අධිකරණයට ඉදිරිපත් කොට රඳවා ගැනීමේ නියෝග ලබාගෙන වැඩිදුර විමර්ශන සිදුකිරීමට නියමිත අතර ඔවුන් හෝමාගම සහ පිළියන්දල පොලිසිවලට භාර දීමට නියමිතය.
සිද්ධිය සම්බන්ධයෙන් බස්නාහිර පළාත දකුණ අපරාධ කොට්ඨාසයේ අධ්‍යක්‍ෂ සහකාර පොලිස් අධිකාරී ජානක කුමාර මහතාගේ අධීක්ෂණය යටතේ ස්ථානාධිපති පොලිස් පරීක්ෂක සුමිත් ජයසිංහ මහතාගේ උපදෙස් මත උප පොලිස් පරීක්ෂක කවිශංක මහතාගේ මෙහෙයවීමෙන් පො.කො (70120) රත්නායක, (92219) අමර sinhala (වි.කා.බ) 83585 රසික පො.කො. රි. (39848) උදිත මහතා ඇතුළු නිලධාරීහු පරීක්ෂණ පවත්වති.
