සීතාවක ප්‍රාදේශීය ලේකම් බලප්‍රදේශයේ, කළුඅග්ගල ගිරාඉඹුල හරහා සාලාව මාර්ගය, කහටපිටිය ප්‍රදේශයෙන් කැලණි ගඟට සේදී යෑම සම්බන්ධයෙන්, 2024 අප්‍රේල් 19 දින දිනමිණ පුවත්පතේ පළ වූ Òසීතාවක සාලාව මාර්ග සංවර්ධනය කැලණි ගඟට සේදිලා – ප්‍රදේශවාසීහු පවසතිÓ ප්‍රවෘත්තියෙන් පසු අදාළ අංශවලින් එම අනාරක්ෂිත කැලණි ගං ඉවුර කළුගල් කුට්ටි අතුරා සංවර්ධනය කර ඇතැයි, ප්‍රදේශවාසීහු පවසති.
අබලි ටයර් භාවිත කර ගංඉවුර සකස් කිරීමේ නියමු ව්‍යාපෘතිය වාරිමාර්ග දෙපාර්තමේන්තුව විසින් ආරම්භ කර, කඩින් කඩ අතරමඟ නැවතීමෙන් පසු, කැලණි ගඟේ ජල මට්ටම ඉහළ යෑමත් සමඟම, එම ටයර් කැලණි ගඟට සේදී යෑම නිසා, ව්‍යාපෘතියේ වැඩකටයුතු අතරමඟ නැවතුණි. මෙලෙස ගංඉවුරට අතුරා තිබූ ටයර් කැලණි ගඟට සේදී යෑම නිසා එම ස්ථානයේ පවතින අනාරක්ෂිත තත්ත්වය හා ප්‍රදේශයේ ජනතාවට සම්පතක් වූ මාර්ගය ආරක්ෂා කර ගැනීම සම්බන්ධයෙන්, ජනමාධ්‍ය මඟින් දැනුවත් කිරීමෙන් පසු, අබලි ටයර් භාවිත කර ගංඉවුර සකස් කිරීමේ ව්‍යාපෘතිය එම ස්ථානයට නොගැළපෙන බව සීතාවක සම්බන්ධීකරණ කමිටුවේ සාකච්ඡා වීමත් සමඟ අදාළ අංශ විසින් එම ස්ථානය කළුගල් අතුරා මෙලෙස යථා තත්ත්වයට පත් කර ඇත.
මෙලෙස එම ස්ථානය යථා තත්ත්වයට පත්කර තිබුණ ද, ඒ ආසන්නයේම ඇති විදුලි කණුවක් අසලින් මාර්ගයේ ගලා යන වැසි ජලය කැලණි ගඟට ගලා යෑම නිසා එම ස්ථානයේ ඇති ගංඉවුරේ කොටසක් නැවත වාරයක් කැලණි ගඟට සේදී ගොස් ඇතැයි ප්‍රදේශවාසීහු පවසති. ගංඉවුර සංවර්ධනය කිරීමේ වැඩකටයුතු වාරිමාර්ග දෙපාර්තමේන්තුව විසින් සිදු කරනු ලැබුවත්, එම ස්ථානයේ මාර්ගය සකස් කර ආරක්ෂක වැටක් යෙදීම වෙනත් අංශයකට අයත් කාර්යයක් බව පවසන ප්‍රදේශවාසීහු මෙම අනාරක්ෂිත ස්ථානයට ආරක්ෂක වැටක් යොදා එම ස්ථානය ආරක්ෂිත ස්ථානයක් ලෙසට පත් කර තැන තැන ගොඩ ගසා ඇති ටයර් ගොඩවල්වල වැසි ජලය පිරී මදුරුවන් බෝ වීම අවධානමක් බව පවසන ප්‍රදේශවාසීහු, එම ටයර්ද එම ස්ථානයෙන් ඉවත් කර දෙන මෙන් ඔවුහු වගකිවයුතු අංශවලින් ඉල්ලා සිටිති.
