වසර පහකට වැඩි කාලයක් ඉවතදමා තිබූ බිම් ඇතුරුම් ගල් තොගයක් ප්‍රයෝජනයට ගෙන ජනතාවගේ ශ්‍රමදායකත්වයෙන් සෑදූ පාරක් සීතාවක ප්‍රාදේශීය සභාවේ සේවකයින් පැමිණ ගලවා ගෙන ගිය පුවතක් පාදුක්ක, පින්නවල ප්‍රදේශයෙන් වාර්තා වේ.
පසුගිය දිනවල පැවති අධික වර්ෂාපතනය නිසා උල්දිය මතුවීම හේතුවෙන් පාදුක්ක, පින්නවල ගම්මාන දුම්රියපොළ මාර්ගයේ අඩි 150ක් පමණ මාර්ගය කිසිම අයුරකින් ගමන් කිරිමට නොහැකි ලෙස මඩ වගුරක් බවට පත්ව තිබී ඇත.
එබැවින් මාස 2කට ආසන්න කාලයක් පවුල් 35ක පමණ ජනතාව තම දරුවන්ගේ පාසල් කටයුතු හා ඔවුන්ගේ එදිනෙදා ගමන් බිමන් සඳහා අනාරක්ෂිත ලෙස දුම්රිය මාර්ගය භාවිත කළ බව එම ගම්වාසීහු පවසති.
තවදුරටත් එසේ ගමන් කිරිමට නොහැකි නිසාත් මාර්ගය පිළිසකර කිරිමට කිසිදු ජනතා නියෝජිතයෙකුගේ සහයක් නොලැබුණු නිසාත් ගම්වාසීන් විසින් ශ්‍රමදානයක් සංවිධානය කරමින් පෞද්ගලික මුදල්වලින් ගල්පස් යොදා මාර්ගය පිළිසකර කරගෙන ඇත.
නමුත් එම උත්සහය ද අසාර්ථක වීම නිසාවෙන් නැවතත් එම මාර්ගයේ ගමන් කිරිමට නොහැකි වීම නිසා , පින්නවල සමයවර්ධනාරාම පන්සල අසල මාර්ගයේ අතුරා තිබී මීට වසර 5කට පමණ පෙර ගලවා දමා තැන් තැන්වල වල් වැදී දිරාපත් වෙමින් තිබූ බිම් ඇතුරුම් ගල්වලින් කොටසක් ගෙන මෙම වගුරු බිමක්වූ පාර පිළිසකර කර ගැනීමට ප්‍රදේශවාසීන් කටයුතු කර ඇත.
සීතාවක ප්‍රාදේශීය සභාවේ ලේකම්ගේ නියෝගය පරිදි සීතාවක ප්‍රාදේශීය සභාවේ සේවකයින් ලවා සවිකරන ලද බිම් ඇතුරුම් ගල් ගලවා පෙරේදා (03) යළි රැගෙන ගොස් ඇත.
මේ නිසාවෙන් ඉතා වෙහෙසක් දරා මිල මුදල් පවා වැය කරමින් කිසිදු වැඩක් ගෙන නොතිබූ බිම් ඇතුරුම් ගල් ප්‍රයෝජනයට ගෙන සිදු කළ කටයුත්ත කිසිදු පලක් නොවීම පිළිබඳව කරකියා ගැනීමට නොහැකි වූ ජනතාව ප්‍රාදේශීය සභාවේ ලේකම්ට විරුද්ධව මෙම අවනඩුව දෙවියන්ට භාර කළ අයුරු දැකගත හැකි විය.
මේ පිළිබඳව සිදු කළ විමසීමකදී සීතාවක ප්‍රාදේශීය සභාවේ ලේකම් චන්දන පද්මසිරි මහතා මෙසේ පවසා සිටියේය. “ ඒක තනිකරම අසත්‍යයක්. ඒ අසල මාර්ගයකට අල්ලා තිබුණු බිම් ඇතුරුම් ගල් තොගයක් එම මාර්ගය කාපට් අතුරා තාර දැමීමෙන් පසු බිම් ඇතුරුම් ගල් තොගය ගලවා ඉවත් කර තිබුණා. වෙනත් මාර්ගවලට ඇල්ලීම සඳහා. මේ ගමේ අය සභාවේ කිසිදු අවසරයකින් තොරව සභාව සතු නොවන දුම්රිය රක්ෂිතයකට අයත් ඉඩමක පාරක් හදාගෙන ඒ ගල් ටික ගෙනැල්ලා අල්ලලා. එහෙම කරන්න දෙන්න බෑ. එහෙම ගල් ඇතුරුම් කරනවා නම් සභාව සතු පාරකට පමණයි කළ යුත්තේ. ඒ නිසා ඒකට ගල් අල්ලන්න සභාවට අවසර දෙන්න හැකියාවක් නෑ. ඒ නිසා ඒ ගල් ටික අපි ගලවගෙන අරන් ආවා. ඒ ගමේ අය තමයි සභාව සතු දේපොළ බලහත්කාරයෙන් ෙපෟද්ගලික පාරවලට අල්ලලා තියෙන්නේ. මම ඒ සම්බන්ධයෙන් පැමිණිල්ලක් දැම්මේ නැහැ පොලිසියට. එහෙම පැමිණිල්ලක් දැම්මා නම් පොදු දේපළ පනත යටතේ මේ හැමෝම බන්ධනාගාරගත වෙනවා.
