ප්‍රංශයේ පැරිස් නුවරදී මේ මස 26 වැනිදා සිට අගෝස්තු මස 11 වැනිදා දක්වා පැවැත්වෙන 33 වැනි ඔලිම්පික් ක්‍රීඩා උලෙළට ශ්‍රී ලංකාවෙන් ක්‍රීඩක ක්‍රීඩිකාවෝ 5ක් සුදුසුකම් ලබති.
බැඩ්මින්ටන් ක්‍රීඩක විරේන් නෙත්තසිංහ ඔලිම්පික් උලෙළට ඍජු සුදුසුකම් ලබාගත් පළමු ක්‍රීඩකයා වූ අතර, හෙල්ල විසිකිරීමේ ශූරී දිල්හානි ලේකම්ගේ හා මීටර් 800 කාන්තා ඉසව්වේ ශූරී තරුෂි කරුණාරත්න රෝඩ් ටු පැරිස් 24 ඔලිම්පික් සුදුසුකම් ලබා ගැනීමේ ලේඛනය අනුව ඔලිම්පික් ක්‍රීඩා උලෙළට සුදුසුකම් ලබා ගත්හ. එයට අමතරව පිහිනුම් ක්‍රීඩාවෙන් ඍජු සුදුසුකම් නොලැබූ රටවලට ලබාදෙන ‘වයිල් කාඩ්’ අවස්ථාව යටතේ කයිල් අබේසිංහ සහ ගංගා සෙනවිරත්න පැරිස් ඔලිම්පික් උලෙළට සුදුසුකම් ලබා ඇත.
ශ්‍රී ලංකාවට මලල ක්‍රීඩාවෙන් තවත් අවස්ථාවක් උදාවී ඇති අතර, එම අවස්ථාව මීටර් 400 ක්‍රීඩක අරුණ දර්ශනට හෝ මීටර් 100 ක්‍රීඩක යුපුන් අබේකෝන්ට හිමිවීමේ අවස්ථා නිර්මාණයවී තිබේ. අඟල් 2කින් ඔලිම්පික් අහිමිවී ගිය හෙල්ල විසිකිරීමේ ක්‍රීඩක රුමේෂ් තරංගගේ අභියාචනය ද පොරොත්තු ලේඛනයේ ඇත.
රෝඩ් ටු පැරිස් 24 ඔලිම්පික් සුදුසුකම් ලබා ගැනීමේ ලේඛනය අනුව මීටර් 400 ඉසව්වෙන් ලොව 51 වැනි ස්ථානයේ පසුවන අරුණ දර්ශනට ඉදිරියෙන් සිටින ක්‍රීඩකයන් සිව්දෙනකු ඉදිරි දින කිහිපයේදී යම් හෙයකින් එම ලේඛනයෙන් ඉවතට ගියහොත් අරුණ දර්ශනට ඔලිම්පික් වරම් උදාවේ. පිරිමි මීටර් 400 ඉසව්වෙන් රෝඩ් ටු පැරිස් 24 ඔලිම්පික් සුදුසුකම් ලබා ගැනීමේ ලේඛනයේ මුල් ක්‍රීඩකයන් 48ට පමණක් ඔලිම්පික් ක්‍රීඩා උලෙළට යෑමේ අවස්ථා උදාවේ.
එලෙස අරුණ දර්ශනට අවස්ථාව උදා නොවුණහොත් මීටර් 100 ක්‍රීඩකයකුට ඍජු සුදුසුකම් නොලැබූ රටවලට ලබාදෙන ‘වයිල් කාඩ්’ අවස්ථාව යටතේ ඔලිම්පික් වරම් උදාවනු ඇත. එහිදී එම ඉසව්වේදී ඉදිරියෙන් සිටින යුපුන් අබේකෝන්ට අවස්ථාව උදාවන අතර, ඔහු පසුගියදා ආබාධයකට ලක්වීම හේතුවෙන් මේ මස 10 වැනිදාට පෙර තරගයකට සහභාගිවී යෝග්‍යතාව සනාථ කළ යුතුය.
එහෙත් ඍජු සුදුසුකම් නොලැබූ රටවලට ලබාදෙන ‘වයිල් කාඩ්’ අවස්ථාව යටතේ ඔලිම්පික් වරම් ලබා ගැනීමට යුපුන් අබේකෝන් මැළිකමක් දක්වන බව ද වාර්තා වේ. පොදු රාජ්‍යමණ්ඩලීය පදක්කම් දිනාගත් යුපුන් අබේකෝන් අනතුරුව ඩයමන්ඩ් ලීග් වැනි ප්‍රමුඛ පෙළේ මලල ක්‍රීඩා තරගවලට සහභාගිවී වෘත්තීය මට්ටමේ සිටින ක්‍රීඩකයකු බැවින් ‘වයිල් කාඩ්’ ක්‍රමයට ඔලිම්පික් වරම් ලබා ගැනීම ගැටලු සහගත බව ශ්‍රී ලංකා මලල ක්‍රීඩා සංගමයේ ප්‍රකාශකයකු ‘දිනමිණ’ට පැවසීය. ඉදිරි දිනවලදී යාවත්කාලීන වන රෝඩ් ටු පැරිස් 24 ඔලිම්පික් සුදුසුකම් ලබා ගැනීමේ ලේඛනයේ මුල් ක්‍රීඩකයන් 48ට අරුණ දර්ශන නොපැමිණියහොත් දේශීය ක්‍රීඩාපිටියේ මීටර් 100 ඉසව්වේ ඉදිරියෙන් සිටින චමෝද් යෝධසිංහට අවස්ථාව උදාවේ.
යම් හෙයකින් හෙල්ල විසිකිරීමේ ඉසව්වේ පැරිස් ඔලිම්පික් සුදුසුකම් ලැබීම ආසන්නයටම පැමිණ තවත් අඟල් 2කින් ඔලිම්පික් අහිමිවී ගිය රුමේෂ් තරංග පැරිස් ඔලිම්පික් උලෙළට එක්කර ගන්නා ලෙස ජාතික ඔලිම්පික් කමිටුව හරහා ජාත්‍යන්තර ඔලිම්පික් කමිටුවෙන් කළ ඉල්ලීම අනුව ඔහුට අවස්ථාව උදා වුවහොත් මීටර් 100 ඉසව්වෙන් ශ්‍රී ලංකා නියෝජනය ද අහිමිවී යනු ඇත.
දකුණු කොරියාවේ මොක්පෝහි පැවති ආසියානු විසිකිරීමේ ශූරතාවලියේදී මීටර් 85.45ක දුරක් හෙල්ල විසිකළ රුමේෂ් තරංග මෙවර තරගවාරයේ ලෝකයේ හෙල්ල විසිකිරීමේ ක්‍රීඩකයකුගේ දහවැනි දිගම විසි කිරීම සිදු කර ඇති හෙයින් ඔලිම්පික් වරම් ලබා ගැනීම ඔහුගේ බලවත් අපේක්ෂාවක්වී තිබේ.
