මත් කරල් ජාවාරමේ යෙදී සිටි පුද්ගලයකු මත් කරල් තොගයක් සමඟ පොලිස් විශේෂ කාර්ය බළකායේ නිලධාරීන් පිරිසක් විසින් පෙරේදා (09) මන්නාරම පොලිස් වසමේ එරුක්කලන්පිඩ්ඩියේදී අත්අඩංගුවට ගෙන තිබේ.
පොලිස් විශේෂ කාර්ය බළකායේ නිලධාරීන් පිරිසකට ලද තොරතුරක් මත මන්නාරම පොලිස් වසමේ එරුක්කලන්පිඩ්ඩිය, 05 කණුව ප්‍රදේශයේ දී වැටලීමක් කර ඇත.
එහිදී බලපත්‍රයක් හෝ වෛද්‍ය නිර්දේශයක් නැතිව නීති විරෝධී ලෙස මත් කරල් 550ක් ජාවාරම් කිරීම සඳහා සන්තකයේ තබාගෙන සිටි පේසාලේ ප්‍රදේශයේ පදිංචි අවුරුදු 28ක පුද්ගලයකු අත්අඩංගුවට ගෙන වැඩිදුර විමර්ශන කටයුතු සඳහා මන්නාරම පොලිස් ස්ථානය වෙත භාර දී ඇත.
පොලිස් විශේෂ කාර්ය බළකාය අණදෙන නිලධාරී ජ්‍යෙෂ්ඨ නියෝජ්‍ය පොලිස්පති නීතිඥ වරුණ ජයසුන්දර මහතාගේ නියෝග හා උපදෙස් පරිදි යාපනය කලාපය භාර ජ්‍යෙෂ්ඨ පොලිස් අධිකාරී රෝයි සුමනවර්ධන මහතාගේ මෙහෙයවීම මත සහකාර පොලිස් අධිකාරී අශෝක මහතාගේ අධීක්ෂණයෙන් විශේෂ කාර්ය බළකාය මන්නාරම කඳවුරේ නිලධාරීන්ට ලද තොරතුරකට අනුව උප පොලිස් පරීක්ෂක එම්.ජී.එස්. සමරසිංහ ඇතුළු නිලධාරීන් කණ්ඩායමක් විසින් මේ වැටලීම කර තිබේ.
