නීතී විරෝධී ලෙස මුහුදු මාර්ගයෙන් රැගෙන ආ වියළි කහ කිලෝග්‍රෑම් 1373කට අධික තොගයක් රැගත් ඩිංගි යාත්‍රාවක් සමඟ සැකකරුවන් දෙදෙනෙකු ඊයේ (10) අලුයම් කාලයේ පුත්තලම පල්ලියවාසල්පාඩු වෙරළ ප්‍රදේශයේ කළ විශේෂ සෝදිසි මෙහෙයුමක් මඟින් නාවික හමුදා භාරයට ගැනීමට කටයුතු කර තිබේ. ඒ අනුව වයඹ නාවික විධානයට අයත් ශ්‍රී ලංකා නාවික තම්බපණ්ණි ආයතනය මඟින් පුත්තලම පල්ලියවාසල්පාඩු වෙරළ ප්‍රදේශයේ ඊයේ (10) අලුයම් කාලයේ කළ මේ විශේෂ සෝදිසි මෙහෙයුමේදී වෙරළ තීරයට පැමිණි සැකකටයුතු ඩිංගි යාත්‍රාවක් නිරීක්‍ෂණය කර පරීක්‍ෂාවට ලක් කර තිබේ.එහිදී ඩිංගි යාත්‍රාවේ තිබී නීතී විරෝධීව මුහුදු මාර්ගයෙන් මෙරටට ගෙනා උර හතළිස් හතරක අසුරන ලද වියළි කහ කිලෝ 1373 ග්‍රෑම් 700ක තොගයක් සමඟ සැකකරුවන් දෙදෙනෙකු සහ ඩිංගි යාත්‍රාව නාවික හමුදා භාරයට ගෙන ඇත.
මේ මෙහෙයුමෙන් නාවික හමුදා භාරයට ගත් සැකකරුවන් කල්පිටිය ප්‍රදේශයේ පදිංචිකරුවන් බවට හඳුනාගෙන ඇති අතර නාවික හමුදා භාරයට ගත් සැකකරුවන් දෙදෙනා,වියළි කහ කිලෝ 1373 ග්‍රෑම් 700ක තොගය සහ ඩිංගි යාත්‍රාව ඉදිරි නීතිමය කටයුතු සඳහා පුත්තලම පොලිස් ස්ථානය වෙත භාරදීමට කටයුතු කළ බව නාවික හමුදාව පවසයි.
