ශ්‍රී ලංකා නිදහස් පක්ෂයේ සභාපති ධුරයේ කටයුතු කිරීම වළක්වමින් ලබාදී තිබූ නියෝගය කඩ කිරීම මඟින් හිටපු ජනාධිපති මෛත්‍රීපාල සිරිසේන මහතා අධිකරණයට අපහාස කර ඇති බවට තීරණය කර ඔහුට දඬුවම් පමුණුවන ලෙස ඉල්ලා ගොනු කර ඇති පෙත්සම කරුණු තහවුරු කිරීම සඳහා ලබන සැප්තැම්බර් මස 02 වැනිදා කැඳවීමට අභියාචනාධිකරණය ඊයේ (10) තීරණය කළේය.
අභියාචනාධිකරණ සභාපති විනිසුරු නිශ්ශංක බන්දුල කරුණාරත්න සහ අභියාචනාධිකරණ විනිසුරු ශෂී මහේන්ද්‍රන් මහත්වරුන්ගෙන් සමන්විත විනිසුරු මඬුල්ලක් හමුවේ මේ පෙත්සම් කැඳවූ අවස්ථාවේදී මේ බව තීරණය කෙරිණි. ශ්‍රී ලංකා නිදහස් පක්ෂයේ විධායක සභිකයකු වන මොන්ටේගු සරත්චන්ද්‍ර මහතා විසින් මේ පෙත්සම ගොනු කර තිබුණි. පෙත්සමේ වගඋත්තරකරු ලෙස ශ්‍රී ලංකා නිදහස් පක්ෂයේ හිටපු සභාපති, හිටපු ජනාධිපති මෛත්‍රීපාල සිරිසේන මහතා නම් කර සිටී.
මෛත්‍රීපාල සිරිසේන මහතා ශ්‍රී ලංකා නිදහස් පක්ෂයේ සභාපතිවරයා ලෙස කටයුතු කිරීමට එරෙහිව තමන් කොළඹ දිසා අධිකරණය හමුවේ මීට පෙර නඩුවක් ගොනු කළ බව පෙත්සම්කරු සඳහන් කර ඇත. එම නඩුව කොළඹ දිසා විනිසුරු සඳුන් විතාන මහතා හමුවේ සලකා බැලූ අතර එම නඩු විභාගය අවසන් වන තෙක් ශ්‍රී ලංකා නිදහස් පක්ෂයේ සභාපති ධුරය දැරීම සහ එම ධුරයේ කටයුතු කිරීමෙන් මෛත්‍රීපාල සිරිසේන මහතා වළක්වමින් අතුරු ඉන්ජක්ෂන් තහනම් නියෝගයක් ඉකුත් අප්‍රේල් මස 24 වැනිදා නිකුත් කරන ලද බව එහි සඳහන් වේ.
එසේ තිබියදී ඉකුත් මැයි මස 12 වැනිදා කෝට්ටේ “සෝලිස් ” ශාලාවේදී ශ්‍රී ලංකා නිදහස් පක්ෂයේ විධායක කමිටු රැස්වීමක් කැඳවා මෙහෙයවීමට මෛත්‍රීපාල සිරිසේන මහතා කටයුතු කර ඇති බව පෙත්සමේ දැක්වේ.
තමන් ශ්‍රී ලංකා නිදහස් පක්ෂයේ සභාපති ධුරයෙන් ඉල්ලා අස්වන බවට පක්ෂයේ නියෝජ්‍ය මහලේකම් සරත් ඒකනායක මහතා වෙත ලිපියක් යවා ඇති බව ද එහි සඳහන් වේ. අප්‍රේල් මස 24 වැනිදා අතුරු ඉන්ජක්ෂන් තහනම් නියෝගයක් නිකුත් කර තිබියදී මැයි මස 12 වැනිදා තෙක් හිටපු ජනාධිපති මෛත්‍රීපාල සිරිසේන මහතා එම පක්ෂයේ සභාපති ධුරයේ කටයුතු කර ඇති බව එමඟින් පැහැදිලි වන බව පෙත්සම්කරු විසින් පෙන්වා දී තිබේ. එලෙස අධිකරණය විසින් නිකුත් කර ඇති නියෝගයක් නොතකා හැර එම නියෝගය උල්ලංඝනය කිරීම මඟින් ආණ්ඩුක්‍රම ව්‍යවස්ථාවේ 105 (3 ) වගන්ති යටතේ මෛත්‍රීපාල සිරිසේන මහතා විසින් අධිකරණයට අපහාස කිරීමේ වරද සිදුකර ඇති බවට පෙත්සම් මඟින් පැමිණිලි කර තිබේ.
ඒ අනුව ඒ සම්බන්ධයෙන් විභාගයක් පවත්වා ඔහු වරදකරු බවට තීරණය කර දඬුවම් නියම කරන ලෙස පෙත්සම මඟින් ඉල්ලා තිබේ.
නීතිඥ දිනේෂ් ද සිල්වා මහතාගේ උපදෙස් මත හිරන්න දමුණුපොළ, චමෝදී රාජනෙත්ති, සඳලි පෙරේරා යන නීතිඥවරුන් සමඟ නීතිඥ ශාන්ත ජයවර්ධන මහතා පෙත්සම්කරු වෙනුවෙන් පෙනී සිටියහ.
