ලීසිං වාරික නිසි ලෙස නොගෙවූ වාහන අත්පත් කරගත යුතු නිසි ක්‍රමවේදයෙන් බැහැර යමින් පොලිස් නිලධාරීන් ලෙස වංචනිකව පෙනී සිටිමින් කුමන්ත්‍රණකාරි ලෙස වෑන් රථයක් නීති විරෝධීව අත්පත් කර ගැනීමේ සිද්ධියට සම්බන්ධ මූල්‍ය ආයතනයක සීසර්වරුන්ට එරෙහිව අධිකරණය හමුවේ චෝදනා ගොනු කරන ලෙස අනුරාධපුර අතිරේක මහේස්ත්‍රාත් රුද්‍රිකා ද සිල්වා හේවාවසම් මහත්මිය අනුරාධපුර කොට්ඨාස අපරාධ විමර්ශන අංශයට නියෝග කළාය.
මේ සිද්ධිය සම්බන්ධයෙන් මිහින්තලේ සහ කවරක්කුලම පොලිසි මඟින් අධිකරණයට ඉදිරිපත් කර ඇති මුල් බී වාර්තාවල සඳහන් කරුණු සහ අනුරාධපුර කොට්ඨාස අපරාධ විමර්ශන අංශය මඟින් ඉදිරිපත් කර ඇති වැඩිදුර වාර්තාවල සඳහන් කරුණු අතර පරස්පරතාවක් පවතින බැවින් ඒ සම්බන්ධයෙන් සවිස්තර වාර්තාවක් අධිකරණයට ඉදිරිපත් කරන ලෙසටද අතිරේක මහේස්ත්‍රාත්වරිය අනුරාධපුර කොට්ඨාස අපරාධ විමර්ශන අංශයට තවදුරටත් නියෝග කරනු ලැබීය.
මෙසේ නියෝග කළේ ලීසිං වාරික නිසි ලෙස නොගෙවූ වාහන අත්පත් කර ගත යුතු නිසි ක්‍රමවේදයට මුළුමනින්ම බැහැරව යමින් සීසර්වරුන් විසින් වෑන් රථයක් බලහත්කාරයෙන් නීති විරෝධීව අත්පත් කර ගැනීමේ සිද්ධියට අදාළ නඩුව යළි කැඳවූ අවස්ථාවේදීය.
වැඩිදුර වාර්තාවක් අධිකරණයට ඉදිරිපත් කරමින් අනුරාධපුර කොට්ඨාස අපරාධ විමර්ශන අංශය සඳහන් කළේ අනුරාධපුර එස්.එස්. කැබ්ස් ආයතනය භාරයේ තිබූ වෑන් රථයක් සීසර්වරුන් විසින් බලහත්කාරයෙන් ලබාගෙන ඇත්තේ පොලිස් නිලධාරීන් ලෙස වංචනිකව පෙනී සිටිමින් කුමන්ත්‍රණකාරීව බවට මූලික විමර්ශනවලදී අනාවරණ වූ බවයි.
අදාළ වෑන් රථය අත්පත් කරගෙන ඇත්තේ නීති විරෝධීව බවටද ස්වකීය විමර්ශනයේදී තවදුරටත් අනාවරණය වූ බවට පොලිසිය අධිකරණයට දැන්වීය.
ලීසිං පදනම මත තමා විසින් මිලදී ගත් වෑන් රථයක් ලීසිං වාරික නිසි ලෙස නොගෙවූ බවට චෝදනා කරමින් පොලිස් නිලධාරීන් ලෙස වංචනිකව පෙනී සිටිමින් සීසර්වරුන් විසින් අත්පත් කරගත් බව පවසමින් අනුරාධපුර එස්.එස්. කැබ්ස් ආයතනයේ කළමනාකාර අධ්‍යක්ෂ සුනන්ද ධර්මසිරි මහතා මුලින්ම පැමිණිලි කළේ මිහින්තලේ පොලිසියට වන අතර මිහින්තලේ පොලිසිය අදාළ විමර්ශනයේදී තහවුරු කළේ අදාළ වෑන් රථය අත්පත් කරගෙන ඇත්තේ නීත්‍යනුකූලව බවය.
පසුව මිහින්තලේ පොලිසියේ විමර්ශනය පිළිබඳව සෑහීමකට පත් නොවූ පැමිණිලිකාර සුනන්ද ධර්මසිරි මහතා මේ සම්බන්ධයෙන් වෙනත් විමර්ශනයක් සිදු කරන ලෙස උතුරු මැද නියෝජ්‍ය පොලිස්පතිවරයාගෙන් කළ ඉල්ලීමකට අනුව ඉදිරි විමර්ශන කටයුතු මිහින්තලේ පොලිසියෙන් ඉවත් කර කවරක්කුලම පොලිසියට පවරනු ලැබීය.
කවරක්කුලම පොලිසිය ද සිය විමර්ශනයේදී තහවුරු කළේ අදාළ වෑන් රථය අදාළ මූල්‍ය ආයතනයේ සීසර්වරුන් විසින් අත්පත් කරගෙන ඇත්තේ නීත්‍යනුකූලව බවටය.
එකී විමර්ශනය පිළිබඳව ද සෑහීමකට පත් නොවූ පැමිණිලිකාර සුනන්ද ධර්මසිරි මහතා ඒ පිළිබඳව අනුරාධපුර ජ්‍යෙෂ්ඨ පොලිස් අධිකාරි තිළිණ හේවාපතිරණ මහතාට යළි පැමිණිලි කළ අතර පසුව මේ සිද්ධියට අදාළ සියලු විමර්ශන ජ්‍යෙෂ්ඨ පොලිස් අධිකරිවරයාගේ නියෝග මත අනුරාධපුර කොට්ඨාස අපරාධ විමර්ශන අංශයට පැවරිණ.
පසුව අනුරාධපුර කොට්ඨාස අපරධ විමර්ශන අංශය මඟින් මේ පිළිබඳව මුල සිටම විශේෂ විමර්ශනයක් අරඹනු ලැබීය. එකී විමර්ශනයේදී කොට්ඨාස අපරාධ විමර්ශන අංශය අනාවරණය කර ගනු ලැබූවේ සීසර්වරුන් වෑන් රථය අත්පත් කරගෙන ඇත්තේ නීති විරෝධීව කුමන්ත්‍රණකාරිව පොලිස් නිලධාරීන් ලෙස වංචනිකව පෙනී සිටිමින් බවටය. අනතුරුව ඒ බව අධිකරණයට කරුණු වාර්තා කෙරිණ.
සීසර්වරුන් විසින් ප්‍රශ්නගත වෑන් රථය අත්පත් කරගෙන ඇත්තේ නීත්‍යනුකූලව බවට මිහින්තලේ සහ කවරක්කුලම පොලිසිය ස්වකීය විමර්ශනවලදී ප්‍රකාශ කර තිබීමත් අදාළ වෑන් රථය අත්පත්කර ගෙන ඇත්තේ සීසර්වරුන් පොලිස් නිලධාරීන් ලෙස වංචනිකව පෙනී සිටිමින් කුමන්ත්‍රණකාරිව බවට අනුරාධපුර කොට්ඨාස අපරාධ විමර්ශන අංශය සිය විමර්ශනයේදී තහවුරු කර තිබීමත් අධිකරණයේ විශේෂ අවධානයට ලක් විය.
පැමිණිල්ල වෙනුවෙන් අනුරාධපුර කොට්ඨාස අපරාධ විමර්ශන අංශයේ නිලධාරීන් පෙනී සිටි අතර අගතියට පත් පර්ශ්වයේ අයිතිවාසිකම් වෙනුවෙන් නීතිඥ භාග්‍ය ශ්‍රී හේරත් මහතා පෙනී සිටියේය.
