කටුනායක ගුවන්තොටුපොළේ දෙවන පර්යන්තයේ ඉදිකිරීම් කටයුතු ආරම්භ කිරීම සඳහා ආධාර ලබාදීමට ජපන් ජාත්‍යන්තර සහයෝගිතා ඒජන්සිය (JICA) එකඟතාව පළ කර තිබේ.
පසුගිය කාල පරිච්ඡේදයේ රට තුළ ඇති වූ ආර්ථික අවපාතය හේතු කොටගෙන නවතා දැමුණු කටුනායක ජාත්‍යන්තර ගුවන්තොටුපොළේ දෙවන පර්යන්තයේ ඉදිකිරීම් කටයුතු නැවත ආරම්භ කිරීමට අවශ්‍ය සහන ණය යෝජනා ක්‍රමය යළි ලබාදීමට ජපන් ජාත්‍යන්තර සහයෝගිතා ඒජන්සිය (JICA) ආයතනය එකඟතාව පළ කර ඇති බව වරාය, නාවික හා ගුවන්සේවා ඇමැති නිමල් සිරිපාල ද සිල්වා මහතා පවසයි.
ඇමැතිවරයා මේ බව සඳහන් කළේ ජපන් ජාත්‍යන්තර සහයෝගිතා ඒජන්සියේ නියෝජිතයන් සමඟ එම අමාත්‍යාංශයේදී ඊයේ (10) පැවැති විශේෂ සාකච්ඡාවකදීය. ජාත්‍යන්තර මූල්‍ය අරමුදල මඟින් ක්‍රියාත්මක කරන ලද ණය ප්‍රතිව්‍යුහගතකරන ක්‍රියාවලියෙන් පසු රට තුළ යළිත් ඇති වී තිබෙන ආර්ථික ස්ථාවරභාවය හේතුවෙන් ජයිකා (JICA) ආයතනය මඟින් මෙම සහන ණය වැඩපිළිවෙළ යළි ක්‍රියාත්මක කිරීමට එකඟතාව පළ කර ඇති අතර මෙම කටයුතු සඳහා ජපන් රජයේ ප්‍රමුඛතාව ලබාදෙන බව ද ඇමැති නිමල් සිරිපාල ද සිල්වා මහතා සඳහන් කළේය.
ඒ අනුව සහන ණය වැඩපිළිවෙළ යටතේ ඉදිරි ඉදිකිරීම් කටයුතු සඳහා රුපියල් බිලියන 170ක පමණ මුදලක් ජයිකා (JICA) ආයතනය මඟින් ලබාදීමට තීරණය කර ඇති බව ද ඇමැතිවරයා කීවේය.
නවීන තාක්ෂණය සහ පහසුකම් සහිතව ඉදිවන මෙම දෙවන පර්යන්තය ඉදිකිරීමෙන් අනතුරුව දැනට වසරකට මෙහෙයුම් කටයුතු සිදුකරනු ලබන මිලියන 06ක් පමණ ගුවන් මගීන් සංඛ්‍යාව මිලියන 16ක් දක්වා වැඩි කිරීමට හැකියාව ලැබෙන බව ද නිමල් සිරිපාල ද සිල්වා මහතා මෙම සාකච්ඡාවේදී අවධාරණය කළේය. මෙම සාකච්ඡාවේදී ගනු ලබන තීරණය අනුව අදාළ ණය ගිවිසුම් කඩිනමින් අත්සන් කොට ඉදිකිරීම් කටයුතු සඳහා අදාළ ටෙන්ඩර් කැඳවීම් සැප්තැම්බර් මාසය වන විට සිදුකිරීමට පියවර ගන්නා බව ජයිකා නියෝජිතයන් ඇමැතිවරයාට පැවසීය.
මෙම සාකච්ඡාවට අමාත්‍යාංශයේ ලේකම් කේ.ඩී.එස්. රුවන්චන්ද්‍ර, ජයිකා (JICA) ආයතනය නියෝජනය කරමින් ප්‍රධාන නියෝජිත යමාඩා ටෙට්සුයා (Yamada Tetsuya), ගුවන්තොටුපොළ සහ ගුවන්සේවා සමාගමේ සභාපති අතුල ගල්කැටිය, සිවිල් ගුවන්සේවා අධිකාරියේ අධ්‍යක්ෂ ජනරාල් සාගර කොටකදෙණිය මහත්වරුන් ඇතුළු නිලධාරීහු පිරිසක් සහභාගි වූහ.
