හිංසනය පිටුදැකීම සඳහා වූ බහු ආංශික ජාතික ක්‍රියාකාරි සැලැස්මට අනුමැතිය
අදාළ සියලු පාර්ශ්වකාර ආයතනවල අදහස් විමසමින් සකස් කරනු ලැබ ඇති ශ්‍රී ලංකාවේ ලිංගික හා ස්ත්‍රී පුරුෂ සමාජභාවය පදනම් කරගත් හිංසනය පිටුදැකීම සඳහා වූ බහුආංශික ජාතික ක්‍රියාකාරි සැලැස්ම II (2024-2028) ක්‍රියාත්මක කිරීමට කාන්තා, ළමා කටයුතු හා සමාජ සවිබලගැන්වීම් ඇමැති ලෙස ජනාධිපති රනිල් වික්‍රමසිංහ මහතා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
හරිත හයිඩ්‍රජන්/ ඇමෝනියා නිෂ්පාදන ආයෝජන යෝජනා
හරිත හයිඩ්‍රජන්/ ඇමෝනියා නිෂ්පාදනය සම්බන්ධයෙන් ඉදිරිපත් වන පෞද්ගලික අංශයේ ආයෝජන යෝජනා ඇගයීමට ලක් කර අමාත්‍ය මණ්ඩලය වෙත නිර්දේශ ඉදිරිපත් කිරීමට අදාළ ආයතනවල නියෝජනයන්ගෙන් සමන්විත ව්‍යාපෘති කමිටුවක් පත් කිරීමට ආයෝජන ප්‍රවර්ධන ඇමැති ජනාධිපතිවරයා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
මුදල් හෝ වටිනාකම් පැවරීම් සේවා සපයන්නන් සඳහා නියෝග
2005 අංක 28 දරන ගෙවීමේ හා බේරුම් කිරීමේ පද්ධති පනතේ 11 වැනි වගන්තිය සමඟ කියවිය යුතු එකී පනතේ 17 වැනි වගන්තිය යටතේ 2024 අංක 1 දරන මුදල් හෝ වටිනාකම් පැවරීම් සේවා සපයන්නන් සඳහා වන නියෝග අනුමැතිය සඳහා පාර්ලිමේන්තුවට ඉදිරිපත් කිරීම පිණිස මුදල්, ආර්ථික ස්ථායීකරණ සහ ජාතික ප්‍රතිපත්ති ඇමැති ලෙස ජනාධිපතිවරයා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
සමාගම් කිහිපයකට වරාය නගර නිදහස් කිරීම් සහ දිරිගැන්වීම්
කොළඹ වරාය නගරය ආර්ථික කොමිෂන් සභාව පනතේ විධිවිධාන යටතේ ක්‍රමෝපාය වැදගත්කමක් ඇති ව්‍යාපාර ලෙස Horizon Group USA Global LLC, Satguru Travel and Tourism LLC, Pagero Lanka Software Engineering (Pvt) Ltd., KPMG Professional Services (Private) Ltd, Hexaware Technologies SL (Pvt) Ltd., Creative Software (Pvt) Ltd., Remediumone Global (Pvt) Ltd., GTN Group Holding Limited, IPD Colombo (Pvt) Ltd., Bistec Solutions (Pvt) Ltd., Port City Duty Free (Pvt) Ltd., China Duty Free Lanka (Pvt) Ltd., ODF Pte Ltd. නම් කිරීමටත්, එම පනතේ II වැනි උපලේඛනය යටතේ දක්වා ඇති පනත්වලින් යෝජිත නිදහස් කිරීම් සහ දිරිගැන්වීම් එකී ව්‍යාපාර වෙත ප්‍රදානය කිරීමටත්, ඒ සඳහා වන නියමයන් රජයේ ගැසට් පත්‍රයේ පළ කරන නිවේදන මඟින් ප්‍රකාශයට පත් කිරීමටත් ආයෝජන ප්‍රවර්ධන ඇමැති ලෙස ජනාධිපතිවරයා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
වසර මැද රාජ්‍ය මූල්‍ය තත්ත්වය පිළිබඳ වාර්තාව
වසර මැද රාජ්‍ය මූල්‍ය තත්ත්වය පිළිබඳ වාර්තාව පාර්ලිමේන්තුවේ සභාගත කිරීමට මුදල්, ආර්ථික ස්ථායීකරණ සහ ජාතික ප්‍රතිපත්ති ඇමැති ලෙස ජනාධිපතිවරයා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
වතුකර නිවාස – ලයින් කාමර ඒකාබද්ධ කර ගම්මාන කිරීම
වතුකර නිවාස සහ ලයින් කාමර ඒකාබද්ධ කර ගම්මාන බවට පත් කිරීමට නව නීතියක් හඳුන්වා දීම සඳහා පනත් කෙටුම්පතක් සකස් කරන ලෙස නීති කෙටුම්පත් සම්පාදකට උපදෙස් දීමට ජනාධිපතිවරයා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
වතුකරයේ පාසල්වලට ගුරු පුහුණු වැඩසටහනක්
වතුකරයේ පාසල්වල සුදුසුකම් ලත් විද්‍යාව, තාක්ෂණය, ඉංජිනේරු විද්‍යාව සහ ගණිතය (STEM) ගුරුවරුන්ගේ බරපතළ හිඟය පියවීම සඳහා ‘විද්‍යා වර්ධන/ අරිවෙලුච්චි/ STEM සවිබල ගැන්වීමේ’ ගුරු පුහුණු වැඩසටහන ක්‍රියාත්මක කිරීමට අධ්‍යාපන ඇමැති සුසිල් ප්‍රේමජයන්ත, ජලසම්පාදන සහ වතු යටිතල පහසුකම් සංවර්ධන ඇමැති ජීවන් තොණ්ඩමන් මහත්වරුන් ඉදිරිපත් කළ ඒකාබද්ධ යෝජනාවට අමාත්‍ය මණ්ඩලයේ අනුමැතිය හිමිව තිබේ.
කල්‍යාණි සාමග්‍රී ධර්ම මහා සංඝ සභාවේ නව සීමාමාලකය
මහා විහාරවංශික ශ්‍යාමෝපාලී මහා නිකායේ කල්‍යාණි සාමග්‍රී ධර්ම මහා සංඝ සභාවට අයත් වෙන්නවත්ත ශ්‍රී කල්‍යාණවංශිකාරාම විහාරස්ථාන භූමියෙහි ස්ථිර උපෝසථාගාරයක් ගොඩනැංවීම සම්බන්ධයෙන් අගමැති දිනේෂ් ගුණවර්ධන මහතා ඉදිරිපත් කළ යෝජනාව සැලකිල්ලට ගෙන වාරිමාර්ග දෙපාර්තමේන්තුවේ නිර්දේශ හා උපදෙස් මත යෝජිත සීමාමාලක ගොඩනැඟිල්ල ඉදි කිරීමට අමාත්‍ය මණ්ඩලයේ අනුමැතිය හිමිව තිබේ.
බර්ලින් බෞද්ධ මධ්‍යස්ථානයේ සියවස් සමරු මුද්දරය හා කෘතිය
ජර්මනියේ බර්ලින් බෞද්ධ මධ්‍යස්ථාන ශත සංවත්සර උලෙළට සමගාමිව කොළඹ පැවැත්වෙන වැඩසටහන යටතේ Das Buddhistische Haus (1924-2024) කෘතිය එළිදැක්වීමට හා ශ්‍රී ලංකා තැපැල් දෙපාර්තමේන්තුව මඟින් සමරු මුද්දරයක් නිකුත් කිරීම සඳහා අගමැති දිනේෂ් ගුණවර්ධන මහතා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
රාජගිරියේ ජල රක්ෂිත ඉඩම් කොටසක් නාගරික උයනක් ලෙස සංවර්ධනයට
රාජගිරිය, බුත්ගමුව පාරට යාබදව පිහිටි ජල රක්ෂිත ඉඩම් කොටසක් ආදායම් උත්පාදන මාර්ග සහිතව පෞද්ගලික අංශයේ දායකත්වයද ගනිමින් නාගරික උද්‍යානයක් ලෙස සංවර්ධනය කිරීම පිණිස යෝජනා කැඳවීම සඳහා නාගරික සංවර්ධන හා නිවාස ඇමැති ප්‍රසන්න රණතුංග මහතා ඉදිරිපත් කළ යෝජනාවය අමාත්‍ය මණ්ඩලයේ අනුමැතිය හිමිව තිබේ.
එක්ස්පෝ ප්‍රොපර්ටි ඩිවෙලොපර්ස් හට කොල්ලුපිටියේ ඉඩමක් බදු දීම
රජයේ තක්සේරුකරුගේ වර්තමාන තක්සේරුව මත පදනම්ව කොල්ලුපිටිය, මුහුදු මාවත ප්‍රදේශයේ පිහිටි නාගරික සංවර්ධන අධිකාරිය සතු පර්චස් 40ක ඉඩම් කොටසක් ඇතුළු පර්චස් 52ක ඉඩම් කොටස වසර 99 බදු පදනම මත එක්ස්පෝ ප්‍රොපර්ටි ඩිවෙලොපර්ස් (පෞද්ගලික) සමාගමට පවරා දීමට නාගරික සංවර්ධන හා නිවාස ඇමැති ප්‍රසන්න රණතුංග මහතා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
පිළිකා සත්කාරක සේවා යන්ත්‍ර අලුත්වැඩියාව හා නව යන්ත්‍ර ගැනීම
මහනුවර, කරාපිටිය, යාපනය සහ මඩකලපුව රෝහල්වලට සපයා ඇති, පිළිකා සත්කාරක සේවා සඳහා යොදා ගනු ලබන රේඛීය ත්වරණකාරක යන්ත්‍ර වැඩිදියුණු කිරීමටත්, රත්නපුර, බදුල්ල, හම්බන්තොට, අනුරාධපුර සහ කුරුණෑගල රෝහල් සඳහා නවීනතම වර්ගයේ විකිරණ චිකිත්සක උපකරණ ප්‍රමුඛතා පදනම මත 2024-2026 මධ්‍යකාලීන අයවැය රාමුව තුළ සපයාගැනීමටත් සෞඛ්‍ය ඇමැති වෛද්‍ය රමේෂ් පතිරණ මහතා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
සංස්ථාපිත හා ලියාපදිංචි සමාගම් යළි ලියාපදිංචි කිරීමට නව නීති
සමාගම් පනත යටතේ සංස්ථාපනය කරන ලද හෝ ලියාපදිංචි කරන ලද සමාගම් නැවත ලියාපදිංචි කිරීමට විධිවිධාන සැලසීම සඳහා නව නීතියක් හඳුන්වා දීමටත්, ඒ සඳහා සකස් කරනු ලැබ ඇති සංකල්ප පත්‍රිකාව මත පදනම්ව පනත් කෙටුම්පතක් සකස් කරන ලෙස නීති කෙටුම්පත් සම්පාදකට උපදෙස් දීමටත් කර්මාන්ත ඇමැති වෛද්‍ය රමේෂ් පතිරණ මහතා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
නව ‘සිසුසැරිය’ සේවා 500ක් ඇරඹීමට ප්‍රතිපාදන
2024 වර්ෂය තුළ නව සිසුසැරිය සේවා 500ක් ආරම්භ කිරීමට අවශ්‍ය රුපියල් කෝටි 20ක (රු. මිලියන 202ක්) ප්‍රතිපාදන ජාතික ගමනාගමන කොමිෂන් සභාව විසින් උපයාගනු ලබන අරමුදලින් වෙන් කරගැනීමට ප්‍රවාහන හා මහාමාර්ග ඇමැති, කැබිනට් ප්‍රකාශක ආචාර්ය බන්දුල ගුණවර්ධන මහතා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
වතු පාසල් සඳහා ඉන්දීය ආධාර යටතේ සුහුරු පන්ති කාමර 60ක් 
ඉන්දීය රජයේ මූල්‍ය ආධාර යටතේ නුවරඑළිය, මහනුවර හා බදුල්ල දිස්ත්‍රික්වල තෝරාගත් වතු ආශ්‍රිත පාසල්වල උසස් පෙළ පන්ති සඳහා සුහුරු පන්ති කාමර 60ක් පිරිනැමීමේ ව්‍යාපෘතියට අදාළ අවබෝධතා ගිවිසුම සංශෝධනය කරමින් එම ව්‍යාපෘතිය ක්‍රියාත්මක කිරීමට අදාළව පියවර ගනු ලබන බවට ජලසම්පාදන සහ වතු යටිතල පහසුකම් සංවර්ධන ජීවන් තොණ්ඩමන් මහතා ඉදිරිපත් කළ තොරතුරු අමාත්‍ය මණ්ඩලය විසින් සැලකිල්ලට ගන්නා ලදි.
කුලී නිවැසි – ගෙවල් හිමි සම අයිතිවාසිකම් රකින පනතක්
කුලී නිවැසියාගේ සහ ගෙවල් හිමියාගේ අයිතිවාසිකම් සමානව ආරක්ෂා කිරීමට සකස් කළ පනත් කෙටුම්පත රජයේ ගැසට් පත්‍රයේ පළ කිරීමටත්, ඉන් අනතුරුව අනුමැතිය පිණිස පාර්ලිමේන්තුවට ඉදිරිපත් කිරීමටත් අධිකරණ බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ ඇමැති ආචාර්ය විජයදාස රාජපක්ෂ මහතා ඉදිරිපත් කළ යෝජනාවට අමාත්‍ය මණ්ඩලයේ අනුමැතිය හිමිව තිබේ.
රුමේනියාව සමඟ සංස්කෘතික සහයෝගිතා අවබෝධතා ගිවිසුම
විදේශ කටයුතු ඇමැතිවරයා විසින් ඉදිරියේදී සිදු කිරීමට නියමිත රුමේනියාවේ නිල සංචාරයේදී දෙරට අතර සංස්කෘතික සහයෝගිතා ප්‍රවර්ධන වැඩසටහන ක්‍රියාත්මක කිරීම සම්බන්ධ අවබෝධතා ගිවිසුමට අත්සන් තැබීමට වැඩබලන විදේශ කටයුතු ඇමැතිවරයා විසින් ඉදිරිපත් කරන ලද යෝජනාවට අමාත්‍ය මණ්ඩලයේ අනුමැතිය හිමිව තිබේ.
වතු කම්කරුවන්ට නිසි වැටුප නොගෙවන සමාගම්වලට පියවර
හැකියාව තිබියදීත් සිය වතු කම්කරුවන් වෙත නියමිත වැටුප නොගෙවන ප්‍රාදේශීය වැවිලි සමාගම් සමඟ රජය එළඹ ඇති ඉඩම් බදු ගිවිසුම් අවලංගු කිරීමට අවශ්‍ය නීති පැනවීමේ ක්‍රියාවලිය කඩිනම් කිරීම අමාත්‍ය මණ්ඩල රැස්වීමේදී තීරණය කරන ලදි.
පාසල්-රෝහල්වල අනීතික ක්‍රියා වැළැක්වීමට නව නීති
පාසල්වල ඉගැන්වීමේ කටයුතු සහ රෝහල්වල සුව සේවා අඩපණ වන අයුරින් ඇතැම් කණ්ඩායම් සිදු කරන අනීතික ක්‍රියා මඟින් සිදු කරනු ලබන අසාධාරණයන් වැළැක්වීමට නව නීති හඳුන්වා දීමට අවශ්‍ය පියවර ගැනීමට අමාත්‍ය මණ්ඩල රැස්වීමේදී තීරණය කරන ලදි.
