වැඩවර්ජනය නොකළ පළමු ශ්‍රේණියේ ගුරුවරයකුගේ වැටුප රජය ඊයේ (10) ලබාදුන් වැටුප් වර්ධකය නිසා රුපියල් 1630කින් ද දෙවැනි ශ්‍රේණියේ පළමු පන්තියේ ගුරුවරයකුගේ වැටුප රුපියල් 1335කින් ද 3 වැනි ශ්‍රේණියේ ගුරුවරයකුගේ වැටුප රුපියල් 525කින් ඉහළ ගොස් ඇතැයි කැබිනට් ප්‍රකාශක, ඇමැති, ආචාර්ය බන්දුල ගුණවර්ධන මහතා පැවැසීය.
ගුරු-විදුහල්පතිවරුන් එක්ව ආරම්භ කළ වර්ජනයට සහභාගි නොවී ඉගැන්වීම් කටයුතුවල නිරත වූ ගුරුවරුන්ට මෙම වැටුප් වර්ධකය ලබාදීමට කැබිනට් අනුමැතිය හිමි වූ බව ද ආචාර්ය බන්දුල ගුණවර්ධන මහතා පැවැසීය.
රජයේ ප්‍රවෘත්ති දෙපාර්තමේන්තුවේ ඊයේ (10) පැවැති කැබිනට් තීරණ දැනුම් දීමේ මාධ්‍ය හමුවේදී ඇමැතිවරයා මේ බව සඳහන් කළේය.
විශ්‍රාම වැටුපට බලනොපාන ආකාරයට වැටුප් වර්ධක ලබාදීමට කටයුතු කරන බව හෙතෙම කීවේය.
ඇමැතිවරයා වැඩිදුරටත් මෙසේ ද පැවැසීය.
රාජ්‍ය අංශයේ අනෙකුත් සුළු සේවකයන්ට හා වැඩ කළ සියලු දෙනාට වැටුප් වර්ධකයක් ලැබෙනවා. අධ්‍යාපනය, සෞඛ්‍ය හා ප්‍රවාහනය වැනි අත්‍යවශ්‍ය සේවා කඩාකප්පල් කිරීමේ උත්සාහය නතර කිරීම සඳහා නීතිමය වශයෙන් මේ කඩාකප්පල්කාරී ක්‍රියා නතර කරන්න අවශ්‍ය කරුණු අධ්‍යයනය කරන්න කියලා ජනාධිපතිවරයා විසින් විජයදාස රාජපක්ෂ ඇමැතිවරයට අනුමැතිය දුන්නා. ජන ජීවිතයට අත්‍යවශ්‍ය සේවාවන් කඩාකප්පල් කිරීම වැළැක්වීම සඳහා රජයකට මැදිහත්වීම පිළිබඳ නීතිපති උපදෙස් ලැබිලා තිබෙනවා. අනාගතයේදී මේ රටේ ජනතාවට බියෙන් හා සැකෙන් තොරව තමන්ගේ ජන ජීවිතය පවත්වාගෙන යෑමටත් ඔවුන්ගේ දරුවන්ගේ අධ්‍යාපනය කඩාකප්පල් වීම වැළැක්වීමත් රෝගීන්ට ඇති වන පීඩාව වැළැක්වීම සඳහා යම්කිසි පිළිසරණක් ලබාදීම සඳහා රජයේ අවධානය යොමුව තිබෙනවා. පසුගිය දශක හතරක කාලය තුළ ආණ්ඩුවක් එදිනෙදා පවත්වාගෙන යෑමේ වියදම් දැරීමට ප්‍රමාණවත් ආදායමක්, බදු පනවලා හා බදු නොවන මාර්ගවලින් උපයා ගන්න අපොහොසත් වෙලා තිබෙනවා. රාජ්‍ය සේවක වැටුප්, විශ්‍රාමික ජ්‍යෙෂ්ඨ පුරවැසියන්ගේ විශ්‍රාම වැටුප්, සමෘද්ධිය, අස්වැසුම ඇතුළු ජීවත් වීම සඳහා ජීවත්වීමේ අරගලයක යෙදෙන මිනිස්සුන්ට ගෙවන ආධාර සඳහා ප්‍රමාණවත් ආදායමක් තිබුණේ නැහැ. ඒ සඳහා ලබාගත් ණයවලට ගෙවන පොලී කියන වියදම කුමන ආණ්ඩුවක් ආවත් දරන්න වෙනවා. කාගේ ආණ්ඩුවක් තිබුණත් 10 වැනිදට විශ්‍රාමික වැටුප් ගෙවන්න වෙනවා. මාසේ අන්තිම වෙනකොට වැටුප් ගෙවන්න වෙනවා.
කාගෙවත් පෞද්ගලික මුදලකින් ගෙවන එකක් නෙවෙයි. ජනාධිපතිවරයා මුදල් විෂය භාර ඇමැතිවරයා ලෙස එතුමගේ පෞද්ගලික බැංකු ගිණුමෙන් හිතන්නවත් බැහැ. අප කාටවත් පෞද්ගලික ගිණුමකින් ගෙවන්න බැහැ. ජනතාව ගෙවන මුදල්වලින් තමයි වැටුප් ගෙවන්නේ. ගිය වසරේ පුනරාවර්තන වියදම් සඳහා ට්‍රිලියන 4.7ක් වියදම් වෙලා තියෙනවා. මහජනතාව වෙත විශාල පීඩනයක් පටවලා ලබාගෙන තිබෙන බදු හා බදු නොවන ආදායම ට්‍රිලියන 3යි. භාණ්ඩාගාරයට 3ක් ලැබිලා එයින් 4.7ක් ගෙවන් සිද්ධ වෙනකොට 1.7ක් දිනපතා භාණ්ඩාගාර බිල්පත් වෙන්දේසී කරලා ගන්න ණයවලින් තමයි ගෙවලා තියෙන්නේ. ඉබ්බන්ගෙන් කොතරම් පිහාටු ඉල්ලුවත් කොහොමද පිහාටු දෙන්නේ නෑ. භාණ්ඩාගාරයට මුදල් නැත්නම් කොතරම් වැඩවර්ජන කරත් දෙන්න විදිහක් නැහැ. මේ වර්ජන මෙහෙයවන අය කියනව නම් මාස කිහිපයකින් බලයට එනව නම්, ඒ ආවම වැටුප් වැඩි කරන්න මුදල් කොහෙන්ද කියන එක ජනතාවට කිය යුතුයි. නියත වශයෙන්ම තව මාස තුනකින් බලයට එනවා කියලා. එහෙම නම් නිහඬව ඉඳලා වැටුප් වැඩි කරල දෙන්න පුළුවන්නේ. මෙය තනිකරම කඩාකප්පල්කාරී ක්‍රියාවක්. එය තමයි කරමින් ඉන්නේ.
