පාසල් 22ක කණ්ඩායම් සහභාගීත්වයෙන් පැවැති හොරණ අධ්‍යාපන කලාපයේ කලාප ක්‍රීඩා තරඟාවලියේ සැහැල්ලු පන්දු කාන්තා ක්‍රිකට් ශූරතාවය දිනා ගැනීමට හොරණ ශ්‍රී මේධංකර මහා විද්‍යාලයීය කාන්තා ක්‍රිකට් කණ්ඩායම පසුගියදා සමත් විය.
කාණ්ඩ දෙකක් යටතේ මෙම තරගය පැවැත්වුණ අතර, එහිදී මේධංකර මහා විදුහල් කණ්ඩායම විසින් හොරණ තක්ෂිලා මධ්‍ය මහා විදුහල පරාජයට පත්කරමින් අවසන් පූර්ව තරඟය ජයග්‍රහණය කළ අතර, අවසන් තරගයේදී පන්දු වාර දෙකයි පන්දු දෙකකදී හොරණ රාජකීය විදුහල පරාජයට පත්කරමින් හොරණ අධ්‍යාපන කලාපයේ සැහැල්ලු පන්දු කාන්තා ක්‍රිකට් ශූරතාවයට හිමිකම් කීමට මේධංකර ක්‍රීඩිකාවෝ සමත් වූහ.
මෙම ජයග්‍රහණයත් සමඟ බස්නාහිර පළාත් තරගය සඳහා සුදුසුකම් ලබාගැනීමට ඔවුන් සමත්වුණු අතර, අනුශූරයන් වූ හොරණ රාජකීය විදුහලටද බස්නාහිර පළාත් තරගය සඳහා සුදුසුකම් ලබාගැනීමට අවස්ථාව හිමිවිය.
විද්‍යාලයීය ආචාර්ය සමන් මඩලකන්ද මහතා මෙම ක්‍රිකට් කණ්ඩායමේ ප්‍රධාන පුහුණුකරු ලෙස 2022 වසරේ සිට කටයුතු කරන අතර, මේධංකර විදුහල සැහැල්ලු පන්දු ක්‍රිකට් ක්‍රීඩා අංශයෙන් කලාප ශූරතාවය දිනාගත් ප්‍රථම අවස්තාවද මෙය වීම විශේෂත්වයකි.
