ලබන වසරේ සිට බිත්තර සඳහා වැට් බද්දක් පැනවීමට රජය කටයුතු කරන බවත්, මේ නිසා බිත්තර මිල ඉහළ යා හැකි බවත් සඳහන් කරමින් ‘බිත්තර නිෂ්පාදකයන්ගේ සංගමය’ යැයි කියාගන්නා සංගමයක් මාධ්‍ය වෙත නිකුත් කර ඇති නිවේදනයේ කිසිදු සත්‍යතාවක් නැතැයි කෘෂිකර්ම හා වැවිලි කර්මාන්ත අමාත්‍යාංශය සඳහන් කරයි. බිත්තර සඳහා මේ වන විටත් 18%ක බද්දක් අය කරනු ලබන අතර, මේ වැට් ප්‍රමාණය කිසි සේත්ම ලබන වසරේ තව දුරටත් ඉහළ දැමීමට සූදානමක් නැති බවද එම අමාත්‍යාංශය සදහන් කරයි.
මේ වන විට අප රටට බිත්තර ආනයනය කිරීම මුළුමනින්ම අත්හිටුවා තිබේ. දැනට රටපුරා වෙළෙඳසල්වල අලෙවි කරනු ලබන්නේ අපේ රටේ නිෂ්පාදනය කරන ලද බිත්තර වේ. දෛනික පාරිභෝජනයට අවශ්‍ය තරම් බිත්තර මේ වනවිට අපේ රටේ කුකුළු නිෂ්පාදන කරුවන් විසින් නිෂ්පාදනය කරනු ලබයි.පසුගිය වර්ෂයේදී මෙරට දෛනික බිත්තර පරිභෝජනය බිත්තර මිලියන 7ක් වුවද, මේ වර්ෂයේ මේ වන විට දෛනික බිත්තර පරිභෝජනය 15%කින් ඉහළ ගොස් තිබේ. දැනට අප රටේ දෛනික බිත්තර අවශ්‍යතාව බිත්තර මිලියන 8.5 දක්වා ඉහළ ගොස් ඇත.
මෙරට බිත්තර නිෂ්පාදනය ඉහළ නැංවීම සඳහා රජය විසින් ගෙන ඇති පියවර රැසකි. ඒ අනුව පසුගිය වසරේ දී මෙරටට ආනයනය කරන ලද මව්සතුන් ප්‍රමාණය 85,000ක් වුවද, 2024 වසරේ මේ වන විට මවු සතුන් ප්‍රමාණය 116,000 දක්වා ඉහළ නංවා ඇත. මේ නිසා කුකුළු පැටවුන් සමස්ත ධාරිතාව ඉක්මවා මේ වන විට කුකුළු ගොවිපොළවල ස්ථාපිත වී ඇත.
බඩඉරිඟු මිල ඉහළ යෑම හා බඩඉරිඟු අස්වැන්න අඩු වීම හේතුවෙන් සත්ත්ව ආහාර නිෂ්පාදනය සඳහා අපේ රටේ නිපදවන ලද සහල් මෙට්‍රික් ටොන් 100,000ක් සත්ව ආහාර නිෂ්පාදනය සඳහා ලබා දීමට පියවර ගනු ලැබීය. සත්ත්ව ආහාර සඳහා දෙන දායකත්වය වක්‍රව නැවතත් කුකුළු මස් හා බිත්තර වශයෙන් ජනතාවටම ලැබෙන ප්‍රතිලාභයකි. එමෙන්ම බඩඉරිඟු ආනයනය සඳහා බලපත් දීමේදී මෙතෙක් ආනයනකරුවන්ට (Importers) බලපත් ලබා දීමේ පිළිවෙත නවතා දමනු ලැබීය. ඒ වෙනුවට කුකුළු ගොවිපොළ අයිතිකරුවන්ට හා සත්ත්ව ආහාර නිෂ්පාදන කර්මාන්තකරුවන්ට පමණක් බඩඉරිඟු ආනයන බලපත් දීමට පියවර ගනු ලැබීය. සත්ත්ව ආහාර සඳහා බඩඉරිඟු නිෂ්පාදනය දේශීය වශයෙන් ඉහළ නැංවීමට කන්දකාඩු ගොවිපොළේ බඩඉරිඟු වගා කිරීම සඳහා ඉඩම් දීමේදීද කුකුළු ගොවිපොළ අයිතිකරුවන් හා සත්ත්ව ආහාර නිෂ්පාදකයන්ට ප්‍රමුඛත්වය දෙන ලදි. කුකුළු කර්මාන්තය සඳහා රජයට කිසිදු වැඩ පිළිවෙළක් නැතැයි මේ බිත්තර සංගමය කියා තිබුණද මේ වන විට දේශීය බිත්තර නිෂ්පාදනය ඉහළ ගොස් තිබෙන්නේ රජය විසින් අනුගමනය කළ වැඩ පිළිවෙළ නිසාය.
මේ නිසා මෙම වසර අවසන් වන විට මෙරට අවශ්‍යතාවටත් වඩා බිත්තර නිෂ්පාදනය කෙරෙනු ඇතැයි කුකුළු කර්මාන්තකරුවෝ සාක්ෂි දරති. කෙසේ වුවද දැනට බිත්තර මිල රු. 50 සීමාව දක්වා පවතින්නේ බිත්තර හිඟයක් නිසා නොව, බිත්තර සඳහා වන ඉල්ලුම ඉහළ ගොස් ඇති නිසාය. එබැවින් බිත්තර නිෂ්පාදකයන්ගේ සංගමයක් යැයි සඳහන් පිරිස විසින් ඉදිරිපත් කර ඇති චෝදනා කෘෂිකර්ම හා වැවිලි කර්මාන්ත අමාත්‍යාංශය විසින් ප්‍රතික්ෂේප කර සිටී.
