2024 ජනාධිපතිවරණය සැප්තැම්බර් 21 දා පැවැත්වෙන බව මැතිවරණ කොමිෂන් සභාව නිවේදනය කර සිටියි. ඊට අදාළ අති විශේෂ ගැසට් නිවේදනය නිකුත් කරමින් මැතිවරණ කොමිෂන් සභාව මේ බව දක්වා ඇත. 1981 අංක 15 දරන ජනාධිපතිවරයා තෝරා පත් කරගැනීම පිළිබඳ පනතේ 2 වැනි වගන්තියෙන් මැතිවරණ කොමිෂන් සභාව වෙත පැවරී ඇති බලතල ප්‍රකාරව මේ ගැසට් නිවේදනය නිකුත් කර තිබේ. එම ගැසට් නිවේදනයට අනුව අගෝස්තු මස 15 වැනි දින ජනාධිපතිවරයා තෝරා පත් කරගැනීම සඳහා අපේක්ෂකයන්ගේ නාමයෝජනා කැඳවීමේ දිනය ලෙස ප්‍රකාශයට පත් කර ඇත.
රාජගිරිය සරණ මාවතේ පිහිටි මැතිවරණ කොමිෂන් සභා කාර්යාලය ජනාධිපතිවරණයට ඉදිරිපත් වන අපේක්ෂකයන්ගේ නාමයෝජනා භාර ගන්නා ස්ථානය ලෙසද මේ ගැසට් නිවේදනය මගින් ප්‍රකාශයට පත් කර තිබේ.
ජනාධිපතිවරණය ප්‍රකාශයට පත් කළ දිනයේ පෙ.ව. 8.30 සිට නාමයෝජනා කැඳවීමේ දිනය වන ලබන මස 15 දිනට පෙර දිනය වන අගෝස්තු මස 14 දා දහවල් 12.00 දක්වා ජනාධිපතිවරණ අපේක්ෂකයන් සඳහා ඇප මුදල් තැන්පත් කළ හැකි බව මැතිවරණ කොමිෂන් සභාව පවසයි. මේ කාලසීමාව තුළ සෙනසුරාදා සහ ඉරිදා දින හැර සෙසු දිනවල පෙ.ව. 8.30 සිට ප.ව. 4.15 දක්වා කාලය තුළත් අගෝස්තු මස 14 දා පෙ.ව. 8.30 සිට දහවල් 12.00 දක්වා කාලය තුළත් ඇප මුදල තැන්පත් කළ හැකිය.
මේ අනුව අපේක්ෂකයා පිළිගත් දේශපාලන පක්ෂයක් විසින් නාම යෝජනා කරනු ලබන අපේක්ෂකයකු වන අවස්ථාවක රු. 50,000ක මුදලක්ද අපේක්ෂකයා වෙනත් යම් දේශපාලන පක්ෂයක් විසින් හෝ ඡන්ද හිමියකු විසින් නාමයෝජනා ඉදිරිපත් කරන අපේක්ෂකයකු වන අවස්ථාවක රු. 75,000ක මුදලක්ද ඇප මුදල් ලෙස තැන්පත් කළ යුතු බව කොමිසම නිකුත් කළ තවත් ගැසට් නිවේදනයක දැක්වේ.
