නීතිවිරෝධී ලෙස ශ්‍රී ලංකාවට රැගෙන එමින් තිබූ රුපියල් හතළිස් එක් ලක්ෂ හැත්තෑ පන් දහසක් වටිනා විදේශීය නිෂ්පාදිත දුම්වැටි තොගයක් සමඟ ගුවන් මගීන් දෙදෙනෙකු පෙරේදා (25) රාත්‍රී කටුනායක ගුවන්තොටුපොළ පැමිණීමේ පර්යන්තයේ දී ගුවන්තොටුපොළ රේගු නිලධාරීන් පිරිසක් විසින් අත්අඩංගුවට ගෙන තිබේ.
මෙයින් එක් ගුවන් මඟියෙකු පොලොන්නරුව ප්‍රදේශයේ පදිංචි 21 හැවිරිදි තරුණයෙකි. ඔහු සිය ඥාතිවරයෙකු මුණ ගැසීමට ඩුබායි වෙත ගොස් ආපසු පැමිණෙමින් සිටියදී මෙසේ නීතිවිරෝධී ලෙස මෙම විදේශීය දුම්වැටි තොගය රැගෙන විත් තිබුණි.
මීට අමතරව කොළඹ, තලවතුගොඩ ප්‍රදේශයේ පදිංචි 44 හැවිරිදි ඩුබායි හි කාර්මික වෘත්තියක නියැළී සිටි පුද්ගලයෙකු ද මෙසේ නීතිවිරෝධී ලෙස දුම්වැටි තොගයක් රැගෙන විත් තිබුණි.
ඔවුන් දෙදෙනා පෙරේදා (25) පස්වරු 5.00ට ඩුබායි සිට ෆ්ලයි ඩුබායි ගුවන් සේවයේ FZ- 549 දරන ගුවන් යානයෙන් කටුනායක ගුවන්තොටුපොළ වෙත පැමිණ තිබුණි.
ඔවුන් දෙදෙනා විසින් තම ගමන් මලු තුළ සඟවා ගෙන Ò මැන්චෙස්ටර්Ó වර්ගයේ විදේශීය දුම්වැටි 41,400ක් අඩංගු දුම්වැටි කාටූන් 207ක් නීතිවිරෝධී ලෙස රැගෙන පැමිණ තිබුණි.
මේ ආකාරයට 1999 අංක 08 දරන දුම්කොළ බදු පනත සහ 2004 අංක 09 දරන සංශෝධිත දුම්කොළ බදු පනත යටතේ මෙරටට නිසි බලපත්‍රයක් නොමැතිව දුම්කොළ අඩංගු දුම්වැටි හෝ දුම්කොළ නිෂ්පාදන ශ්‍රී ලංකාවට ආනයනය කිරීම සපුරා තහනම් වේ.
මොවුන් දෙදෙනා කෙසේ හෝ මෙම දුම්වැටි තොගය කටුනායක ගුවන් තොටුපොළෙන් පිට කර ගෙන ගොස්, වෙළෙඳ පොළ වෙත මෙම දුම්වැටි තොගය අලෙවි කළේ නම්, එයින් රුපියල් තිස් දෙලක්ෂයක බදු ආදායමක් ශ්‍රී ලංකා රජයට අහිමි වීමට ඉඩ තිබී ඇත.
මේ පිළිබඳ විධිමත් රේගු පරීක්ෂණය ජ්‍යෙෂ්ඨ නියෝජ්‍ය රේගු අධ්‍යක්ෂ රුචිර වීරසේකර මහතා විසින් පවත්වා තිබූ අතර එහිදී මොවුන් දෙදෙනා නීතිවිරෝධී ලෙස ශ්‍රී ලංකාවට රැගෙන ඒමට තැත් කළ දුම්වැටි තොගය රාජසන්තක කළ අතර මොවුන් දෙදෙනාට අවවාද කර නිදහස් කිරීමට පියවර ගෙන තිබුණි.
