ගාසා තීරයේ පවත්නා යුදමය තත්ත්වය හේතුවෙන් අවතැන්ව සිටින දරුවන්ගේ මූලික අවශ්‍යතා සැපයීමට අවශ්‍ය මූල්‍යාධාර ලබාදීම වෙනුවෙන් ජනාධිපති රනිල් වික්‍රමසිංහ මහතාගේ සංකල්පයක් අනුව පිහිටුවන ලද “ගාසා හි ළමා අරමුදල (Children of Gaza Fund)” සඳහා තවදුරටත් පරිත්‍යාග යොමු නොකරන ලෙස ජනාධිපති කාර්යාලය මහජනතාවට දැනුම් දෙයි.
එම අරමුදල සඳහා දායක වීමේ අවස්ථාව ඉකුත් 31 වැනිදා අවසන් වී තිබෙන බැවින් එම දිනට පසු ලැබෙන පරිත්‍යාග ජනාධිපති කාර්යාලයේ නිල බැංකු ගිණුමට ප්‍රේෂණය කළහොත් ඒවා සමාජ සත්කාරක වැඩසටහන් ක්‍රියාවට නැංවීම සඳහා ජනාධිපති අරමුදල වෙත බැර කිරීමට කටයුතු කරන බව ද දැනුම් දෙයි.
රාමසාන් මාසය තුළ මෙම අරමුදල වෙනුවෙන් දායක වන ලෙස ජනාධිපති රනිල් වික්‍රමසිංහ මහතා ජනතාවගෙන් කළ ඉල්ලීමට අනුව දිවයින පුරා විශාල ජනතාවක් ජාති, ආගම් භේදයකින් තොරව ඒ සමඟ අත්වැල් බැඳගනු ලැබීය. ඒ අනුව තවදුරටත් අරමුදලට දායක වීමට අවස්ථාව ලබා දෙන ලෙස ජනතාවගෙන් ලැබුණු ඉල්ලීම අනුව එම කාලය 2024 මැයි 31 වැනි දින තෙක් දීර්ඝ කෙරිණි.
අරමුදල සඳහා දායක වීමේ දිනය 2024 මැයි 31 දිනෙන් අවසන් වුවද පරිත්‍යාගශීලීන් විසින් මෙම අරමුදල සඳහා තවදුරටත් මුදල් තැන්පත් කිරීම සිදු කරන බව නිරීක්ෂණය වී ඇත.
අමාත්‍යාංශ සහ රජයේ ආයතන මෙවර ඉෆ්තාර් සැමරුම පැවැත්වීමට වෙන් කර තිබූ ප්‍රතිපාදනවලින් මෙම අරමුදලට ලැබුණු අමෙරිකානු ඩොලර් මිලියනයක් පළමු අදියර යටතේ ජනාධිපති රනිල් වික්‍රමසිංහ මහතා විසින් එක්සත් ජාතීන්ගේ නිල නියෝජිතායතනය හරහා පලස්තීන රජය වෙත භාරදුන් අතර 2024 ජූලි 31 දක්වා ලැබුණු සියලු පරිත්‍යාග ඉදිරියේදී නිල වශයෙන් පලස්තීන රජය වෙත භාරදීමට නියමිත බව ද ජනාධිපති කාර්යාලය පවසයි.
මේ අතර මෙම අරමුදල සමඟ මානුෂිකත්වයෙන් අත්වැල් බැඳගත් සියලු ජනතාවට ජනාධිපති රනිල් වික්‍රමසිංහ මහතාගේ සහ ජනාධිපති කාර්යාලයේ ස්තූතිය පිරිනමා තිබේ.
