ගලේවෙල ප්‍රාදේශීය ලේකම් කොට්ඨාසයේ රාලලා රොටවැව ගමට පසුගිය 26 වැනිදින කඩා වැදුණු වනඅලි රංචුවක් ගොවීන්ගේ පොල් ඇතුළු අතිරේක භෝග රැසකට හානිකර ගොස් ඇති බව වාර්තා වේ.
නිතරම වනඅලින්ගේ තර්ජනයට ලක්වී ඇති මෙම ගොවිබිම් ආරක්ෂා කර ගැනීම සඳහා බලධාරීන් කිසිවෙක් මෙතෙක් කිසිම ක්‍රියාමාර්ගයක් ගෙන නැති බව ගොවීහු පවසති. මේ පිළිබඳව ගොවීහු කිහිපදෙනෙක් මෙසේ අදහස් දැක්වූහ.
ඒ.ජී.එච්.එස්. බණ්ඩාර (55) රාලලා රොටවැව, මොරගොල්ල “පසුගිය 26 වැනි දින රාත්‍රී අක්කර දෙකකින් පමණ යුත් පොල් ඉඩමට කඩා වැදුණු අලි රංචුවක් එහි තිබූ පොල් ගස් 20ක් පමණ ගොබ ඇද කා විනාශකර ගොස් තිබුණා. අපි බොහොම දුක් මහන්සියෙන් වගාකර රැකගත් මෙම පොල්ගස්වල වයස අවුරුදු 06ක් 07ක් වෙනවා. එසේ රැකගත් මෙම පොල්ගස් වනඅලි ඇවිත් එක රැයකින් විනාශ කරන විට කොහොම ඉවසන්නද? මෙහෙම ගියොත් අපේ දරු මල්ලන්ට පොල්ගෙඩියක්වත් කන්න ලැබෙන්නේ නෑ. ඉදිරියේදී ඉතුරු පොල් ගස් ටිකත් අලි ඇවිත් විනාශ කළොත් වග කියන්නේ කවුද? අලිවැට නිසිලෙස නඩත්තු නොකිරීම නිසා මේ තත්ත්වය උදාවී තිබෙනවා. ඊට වනජීවී නිලධාරීන් වගකිව යුතුයි. ඒ නිසා අපේ ගොවිබිම් ආරක්ෂා කරදීමට වහා පියවර ගන්නා ලෙස බලධාරීන්ගෙන් ඉල්ලා සිටිනවා.”
කැලුම් තුෂාර යාපා (44) රාලලා රොටවැව, මොරගොල්ල- “මගේ නිවෙස අසල ඇති වට්ටක්කා හේන රැකබලා ගන්නේ මමයි. පසුගිය 26 වැනි දින රාත්‍රී වනඅලි රංචුවක් ඇවිත් වට්ටක්කා හේනට ඇතුළු වුණා. වනඅලි කඩාවැදුණු ශබ්දය මට ඇසුණු නිසා අපි වහා උන් පලවා හැරියා. එහෙත් ඉදිරි දිනයකදී උන් යළි පැමිණ වට්ටක්කා හේන විනාශ කිරීමේ අනතුරක් තිබෙනවා. වනජීවී නිලධාරීන් විසින් අලි වැට නිසි ලෙස නඩත්තු නොකිරීම මීට හේතුවයි. අපේ භවභෝග ආරක්ෂා කර දීමට වහා පියවර ගන්නා ලෙස අදාළ බලධාරීන්ගෙන් ඉල්ලා සිටිනවා.”
ශ්‍රියානි මල්ලිකා (63) රාලලා රොටවැව, මොරගොල්ල- “මගේ මංඤ්ඤොක්කා ඉඩමට පසුගිය 26 වැනි දින රාත්‍රී වනඅලි ඇවිත් විනාශකර ගොස් තිබෙනවා. බලධාරීන් මේ ගැන සොයා බලන්නේ නෑ. වනඅලි නිසා අපිට ගොවිතැනක් බතක් කරගෙන ජීවත් වෙන්න බැරි තත්ත්වයක් උදාවී තිබෙනවා. මේ ගැන සොයා බලා වනඅලින්ගේ ආගමනය වැළැක්වීමට පියවර ගන්නා මෙන් බලධාරීන්ගෙන් ඉල්ලා සිටිනවා.”
එල්.එම්.පී. රත්නායක (49) රාලලා රොටවැව, මොරගොල්ල – “අපේ ගම ආවරණය කර ඇති විදුලිවැටේ තිබිය යුතු විදුලි බලයේ ශක්තිය ඇම්පියර් 12ක් වුවත් දැන් 02ක් වත් නෑ. ඒ නිසා පහසුවෙන් විදුලි වැට කඩාගෙන අලීන් ගොවි බිම් විනාශ කරනවා. විදුලි වැටේ කනුවල පරතරය වැඩි නිසා අලින්ට ගම්වලට කඩා වැදීම පහසුවක් වී තිබෙනවා. මීටර් 10ක් වත් කැලේ සුද්ධ පවිත්‍ර කළොත් වනඅලින්ගේ පැමිණීම අඩුවිය හැකියි. මම දිවා රාත්‍රී දෙකේම රකින නිසා මගේ ගොවිතැන් ආරක්ෂා වී තිබෙනවා. කෙසේ වෙතත් බලධාරීන්ගෙන් ඉල්ලා සිටින්නේ වනඅලි ගම්වැදීම වැළැක්වීමට ගොවීන්ගේ සහාය ඇතිව කඩිනමින් පියවර ගන්නා ලෙසයි.” යැයි පැවැසීය.
