රත්නපුර මහ නගර බලප්‍රදේශයේ රත්නපුර පොලිසියත්, ඇහැලියගොඩ මහජන සෞඛ්‍ය කොට්ඨාසයේ රාජ්‍ය ආයතන කීපයක් ඩෙංගු මදුරුවන් බෝවෙන ස්ථාන ඇති බවට හඳුනාගෙන ඇතැයි රත්නපුර වසංගත රෝග වෛද්‍ය අංශය පවසයි.
රත්නපුර දිස්ත්‍රික් සම්බන්ධිකරණ කමිටුවට ද මෙම තත්ත්වය ගැන රත්නපුර මහජන සෞඛ්‍ය බලධාරීන් මාසික සෞඛ්‍ය වාර්තාව ඉදිරිපත් කරමින් කරුණු සඳහන් කර තිබේ.
මෙම තත්ත්වය හේතුවෙන් පරිසර පොලිසියට සිදුව ඇත්තේ පොලිසියට එරෙහිව නඩු පැවරීමට දැයි රත්නපුර සම්බන්ධිකරණ කමිටුවේ සභාපති පාර්ලිමේන්තු මන්ත්‍රී අකිල එල්ලාවල මහතා විමසීය.
රත්නපුර වසංගත රෝග වෛද්‍යවරිය දිස්ත්‍රික් සම්බන්ධීකරණ කමිටුවට දැනුම් දුන්නේ පොලිසිය, පාසල්, ඩිපෝව ආදි රාජ්‍ය ආයතන කීපයක මදුරුවන් බෝවෙන ස්ථාන ඇතැයි මාසිකව ලබා ගන්නා වාර්තා අනුව වාර්තා වී ඇති බවයි.
එලෙස වාර්තා ලබා නොගන්නා රාජ්‍ය ආයතනවලද මදුරුවන් බෝවෙන ස්ථාන තිබිය හැකි බැවින් ඒ ගැන ද රාජ්‍ය ආයතන සැලකිල්ලිමත් විය යුතු බවද මහජන සෞඛ්‍ය බලධාරීන් පෙන්වා දෙති.
ඇහැලියගොඩ කොට්ඨාසයේ රාජ්‍ය කාර්යාලයක හා පාසල් දෙකක ද මදුරුවන් බෝවෙන ස්ථාන ඇතැයි මහජන සෞඛ්‍ය බලධාරීන් වාර්තාකොට තිබේ. රත්නපුර මහ නගර සීමාවේ රාජ්‍ය ආයතන හතරකද මදුරු කීටයින් ඇතැයි හඳුනාගෙන තිබේ .
මේ වසරේ ගතවූ මාස හත තුළ රත්නපුර දිස්ත්‍රික්කයේ ඩෙංගු රෝගීන් 2030ක් වාර්තා වී තිබේ. සතියකට ඩෙංගු රෝගීන් 50ක් පමණ වාර්තා වෙන නිසා මෙම තත්ත්වය වැඩිවීමක් නොවුණද අවශ්‍ය තරමට පාලනය නොවීමක් බව රත්නපුර වසංගත රෝග වෛද්‍යවරිය පැවසුවාය.
රත්නපුර මහ නගර සභා බලප්‍රදේශය, ඇහැලියගොඩ, කුරුවිට සහ පැල්මඩුල්ල කොට්ඨාසවලින් පසුගිය කාලයේ වැඩි වශයෙන් ඩෙංගු වැඩි වී තිබේ.
පාසල් වැනි ස්ථාන සෙනසුරාදා, ඉරිදා සහ රජයේ නිවාඩු දිනවල නිවාඩු නිසා පිරිසිදු කිරීම් එම දිනවලදි සිදුනොවෙන බවත් ඒ නිසා ගැටලු මතුවී ඇතැයි රත්නපුර දිස්ත්‍රික් සම්බන්ධිකරණ කමිටුවේ සභාපති අකිල එල්ලාවල මහතා පැවසීය.
රාජ්‍ය ආයතනවල කමිටු පත්කර ඩෙංගු මර්දන වැඩසටහන් දිගටම ක්‍රියාත්මක කරන ලෙසද ඔහු උපදෙස් දුන්නේය.
බොහෝ රාජ්‍ය ආයතනවල ඩෙංගු මදුරුවන් බෝවන්නේ නොසැලකිලිමත් බව නිසා නොව ඒ සම්බන්ධව විශේෂ අවධානය යොමු නොවීම නිසා ඩෙංගු මර්දන වැඩසටහන් සක්‍රිය කළ යුතු බව රත්නපුර දිස්ත්‍රික් සම්බන්ධීකරණ කමිටුවේ සභාපතිවරයා පැවසීය.
