හොරණ පෝරුවදණ්ඩ බොරලුගොඩ ප්‍රදේශයේ ඊයේ (1) දහවල් මාර්ගය අයිනේ කතාබස් කරමින් සිටි දෙදෙනෙක් වෙතට සුඛෝභෝගී මෝටර් රථයක් කඩා වැදීමෙන් එක් අයකු මියගොස් තවත් අයෙක් බරපතළ තුවාල ලැබූ බව හොරණ මූලස්ථාන පොලිසිය කියයි.
අනතුරින් මියගොස් ඇත්තේ බුලත්සිංහල හල් වතුර ප්‍රදේශයේ පදිංචිව සිටි වසන්ත ලක්මාල් නමැති 29 හැවිරිදි අවිවාහක පුද්ගලයෙකි. අනතුරින් බරපතළ තුවාල ලබා ඇත්තේ පෝරුවදණ්ඩ අරුණගම ප්‍රදේශයේ පදිංචි 61 හැවිරිදි පුද්ගලයෙකි.
මියගිය පුද්ගලයා එම ප්‍රදේශයේ එළවළු වෙළෙඳසැලක් ආරම්භ කිරීමේ කටයුතුවල නියැළෙමින් සිට ඇති අතර ඔහුට දහවල් ආහාර පාර්සලයක් රැගෙන ඔහුගේ පෙම්වතිය ඇයගේ පියා සමඟ ත්‍රිරෝද රථයකින් පැමිණ ඇතැයි පොලිසිය කියයි.
දියණිය ත්‍රිරෝද රථයේ පිටුපස අසුන්ගෙන සිටියදී පියා ත්‍රිරෝද රථයෙන් බිමට බැස දියණියගේ පෙම්වතා සමඟ ත්‍රිරෝද රථයේ පිටුපසට වී කතා කරමින් සිටියදී හොරණ දෙස සිට ඉංගිරිය දෙසට ධාවනය වීමෙන් තිබූ සුඛෝභෝගී මෝටර් රථයක් වම් අත දිසාවේ පිහිටා තිබෙන අංක 28 බෝක්කුවේ ගැටී රියදුරට පාලනය කරගත නොහැකිව මාර්ගයේ ප්‍රතිවිරුද්ධ දිසාව දකුණු දිශාවට ගොස් බොරළුගොඩ සංගමිත්තා මාවතට හැරෙන මාර්ගය අසල කතා කරමින් සිටි පුද්ගලයන් දෙදෙනා වෙතට කඩාවැදී නතර වී ඇතැයි පොලිසිය කියයි. එම අනතුරින් බරපතළ තුවාල ලැබූ පුද්ගලයන් දෙදෙනා හොරණ මූලික රෝහල වෙත ඇතුළත් කිරීමෙන් අනතුරුව එක් අයකු මියගිය බව රෝහල් ප්‍රකාශකයකු පැවසීය.
අනෙක් පුද්ගලයා බරපතළ තත්ත්වයේ පසුවූ බැවින් කොළඹ ජාතික රෝහල වෙත මාරු කර යැවූ බවත් රෝහල් ප්‍රකාශකයා වැඩිදුරටත් පැවසීය. අනතුරින් මෝටර් රථය සහ ත්‍රිරෝද රථයට අලාභ සිදුවී ඇත.
හොරණ මූලස්ථාන ප්‍රධාන පොලිස් පරීක්ෂක පී.එස්. පනාවල මහතාගේ උපදෙස් මත රථ වාහන අංශයේ ස්ථානාධිපති උප පොලිස් පරීක්ෂක විමල් ආනන්ද පොලිස් සැරයන් (60503) දිමුතු, පොලිස් කොස්තාපල්වරුන් වන (74802) සම්පත්, (89321) ඉන්දික මහත්වරු පරීක්ෂණ පවත්වයි.
