- ඉන්දියාව පහළට දමා අර්ෂාඩ් ඉතිහාසයට එක් වෙයි
- රු. කෝටි 6 මුදල් තෑග්ගක් සමඟ ඔහුගේ නමට ක්‍රීඩා ඇකඩමියක්
පැරිස් ඔලිම්පික් ක්‍රීඩා උලෙළේදී දකුණු ආසියානු කලාපයේ රටක් දිනාගත් එකම රන් පදක්කම පාකිස්තානයේ අර්ෂාඩ් නදීම් දිනා ගත්තේය. හෙල්ල විසි කිරීමේ දැවැන්තයකු වූ අර්ෂාඩ් නදීම් වසර 40කට පසු පාකිස්තානයේ පළමු ඔලිම්පික් රන් පදක්කම දිනා ගැනීම ඊයේ සිදු විය. ස්ටේට් ඩී ෆ්‍රාන්ස් ක්‍රීඩාංගණයේදී අර්ෂාඩ් නදීම් දැක්වූ දක්ෂතාවෙන් පැය කිහිපයකට පසු පාකිස්තාන රජය රුපියල් මිලියන 50ක් (ශ්‍රී ලංකා රුපියල් කෝටි 6) වටිනා මුදල් ත්‍යාග ප්‍රකාශයට පත් කළ බව වාර්තා විය.
මෙතෙක් හෙල්ල විසි කිරීමේ ඔලිම්පික් රන් පදක්කම දිනා සිටි ඉන්දියාවේ නිරාජ් චොප්රා (මීටර් 89.45) දෙවැනි තැනට ඇද දමමින් 27 හැවිරිදි අර්ෂාඩ් තම දෙවැනි විසිකිරීමේදී මීටර් 92.97ක දැවැන්ත දක්ෂතාවයක් දක්වමින් ඓතිහාසික රන් පදක්කම දිනා ගැනීමට සමත් වූවේය. එය ඔලිම්පික් වාර්තාවක් වූ අතර, 2008 බීජිංහිදී නොවේ ජාතික ඇන්ඩ්‍රියාස් තොරිකිඩ්සන් විසින් පිහිටුවා තිබූ මීටර් 90.57ක වාර්තාව මකා දැමුවේය.
“පාකිස්තාන රජය ජාතික වීරයා වෙනුවෙන් රුපියල් මිලියන 50ක් ප්‍රකාශයට පත් කර ඇත” යනුවෙන් කරච්චි නගරාධිපති මුර්ටාසා වහාබ් උපුටා දක්වමින් රාජ්‍ය රූපවාහිනි විකාශය වන පීටීවී ප්‍රවෘත්ති වාර්තා කළේය. එම රන් පදක්කම පකිස්තාන ජනතාවට තෑග්ගක් ලෙස හැඳින්වූ අගමැතිවරයා, අර්ෂාඩ් නදීම්ගේ නමින් ක්‍රීඩා ඇකඩමියක් කරච්චියේ පිහිටුවන බවට ද ඔහු පොරොන්දුවක් ලබා දුන්නේය.
1984න් පසු පාකිස්තානය ඔලිම්පික් රන් පදක්කමක් දිනාගත් පළමු අවස්ථාව මෙය වූ අතර, පාකිස්තානය 1992න් පසුව දිනාගත් පළමු ඔලිම්පික් පදක්කම ලෙසත් වාර්තා පොතට එක්වූවේය. ඔලිම්පික් උලෙළේදී ඊයේ (9) වන විට පදක්කම් දිනා ගත් රටවල් 75ක් අතර 54 වැනි ස්ථානයේ පාකිස්තානය පසු විය. ඉන්දියාව ක්‍රීඩා ඉසව් 16ක් සඳහා ක්‍රීඩක ක්‍රීඩිකාවන් 110කගේ කණ්ඩායමක් මෙවර සභභාගි කරවා රිදී පදක්කමක් හා ලෝකඩ පදක්කම් 4ක් සමඟ 64 වැනි ස්ථානයේ සිටී. පාකිස්තානු පැරිස් ඔලිම්පික් කණ්ඩායම හත් දෙනෙකුගෙන් සමන්විත විය.
