එංගලන්ත ක්‍රිකට් කණ්ඩායම සමඟ මැන්චෙස්ටර්හිදි පැවැත්වෙන පළමු ටෙස්ට් තරගයේ බිඳ වැටුණු දෙවැනි ඉනිම යළි ගොඩනැඟීමට ඇන්ජලෝ මැතිව්ස් සහ කමිඳු මෙන්ඩිස් සටනක නිරත වූහ. මේ තරගය ඊයේ තෙවැනි දිනයට නතර කරන විට සිය දෙවැනි ඉනිම ක්‍රීඩා කරන ශ්‍රී ලංකා පිල කඩුලු 6ක් දැවී ලකුණු 204ක් රැස් කර සිටි අතර, එංගලන්ත පළමු ඉනිමට වඩා ඉදිරියෙන් සිටියේ ලකුණු 82කිනි.
කමිඳු මෙන්ඩිස් ලකුණු 56ක් සහ දිනේෂ් චන්දිමාල් ලකුණු 20ක් රැස් කරමින් නොදැවී කඩුල්ලේ රැඳී සිටියහ. කමිඳු ඊයේ වාර්තා කළේ තෙවැනි ටෙස්ට් අර්ධ ශතකයයි. ඊයේ දිවා විවේකයට ඕවර කිහිපයක් තිබියදී එංගලන්ත පළමු ඉනිම නිමා වූයේ ශ්‍රී ලංකා පිලට වඩා ලකුණු 122ක් ඉදිරියෙනි. කෙසේ වෙතත් ශ්‍රී ලංකා දෙවැනි ඉනිමේදී එංගලන්ත පළමු ඉනිම අබිබවා යෑමටත් පෙර පිතිකරුවන් සිව්දෙනකු යළි දැවී ගිය අතර, දිනේෂ් චන්දිමාල් ආබාධයකින් පිටියෙන් ඉවත් විය.
අසිත ප්‍රනාන්දු
දිවා විවේකයට ඕවර 3ක් තිබියදී ශ්‍රී ලංකා ඉනිම ඇරඹූ අතර එම ඕවර 3දීවත් කඩුලු රැක ගැනීමට නිශාන් මධුෂ්ක සහ කුසල් මෙන්ඩිස්ට නොහැකි වූහ. දෙදෙනාම ලකුණු නොලබා දැවී ගිය අතර, මුළු ලකුණු 52 වෙද්දී දිමුත් කරුණාරත්න (27) ද යළි ක්‍රීඩාගාරයේ අසුන් ගත්තේය.
අංක 5 පිතිකරු ලෙස පිටියට පිවිසි දිනේෂ් චන්දිමාල් ලකුණු 10ක් ලබා සිටියදී පන්දුවක් අතේ වැදීමෙන් පිටියෙන් ඉවත් වූ අතර, නායක ධනංජය ද සිල්වාගේ ඉනිම ලකුණු 11කට සීමා විය.
ජ්‍යෙෂ්ඨ පිතිකරු ඇන්ජලෝ මැතිව්ස්ට එක්වූ කමිඳු මෙන්ඩිස් ලකුණු 78ක සබඳතාවක් පිහිටුවමින් ඉනිම එංගලන්ත ලකුණු පුවරුව අබිබවා ගෙන ගිය අතර, ඊයේ සිය 42 වැනි ටෙස්ට් අර්ධ ශතකය රැස් කළ මැතිව්ස් ලකුණු 65කට දැවී යන විට මුළු ලකුණු සංඛ්‍යාව 173ක් විය.
පළමු ඉනිමේදී අර්ධ ශතකයක් රැස් කළ මිලාන් රත්නායකට ඊයේ රැස් කළ හැකි වූයේ ලකුණු 10ක් පමණි. ඔහු 6 වැනි කඩුල්ල ලෙස දැවී යෑමෙන් පසු චන්දිමාල් යළි පන්දුවට පහරදීමට සඳහා පිටියට පිවිසියේය. ජේමි ස්මිත්ගේ නොදැවුණු ඉනිම හේතුවෙන් පෙරේදා තරගය දෙවැනි දිනයට නතර කරන විට එංගලන්තය පළමු ඉනිමේදී ශ්‍රී ලංකාවට වඩා ලකුණු 23ක් ඉදිරියෙන් සිටි අතර, එම වාසිය ලකුණු 122 දක්වා ඉදිරියට ගෙන යෑමට ස්මිත් සමඟ එක්වූ එංගලන්ත පසු පෙළ පිතිකරුවෝ සමත් වූහ. 7 වැනි කඩුල්ලට ස්මිත් සමඟ එක්වූ ගස් ඇට්කින්සන් ලකුණු 66ක සබඳතාවකින් ඉනිම ලකුණු 300 සීමාවෙන් එපිටට රැගෙන ගිය අතර, මේ තරගයෙන් ටෙස්ට් වරම් ලැබූ මිලාන් රත්නායකගේ මංගල කඩුල්ල ලෙස ඇට්කින්සන් දැවී ගියේ ලකුණු 20ක් රැස් කර සිටියදීය.
පන්දු 136කින් සිය මංගල ටෙස්ට් ශතකය රැස් කළ ස්මිත් 8 වැනි කඩුල්ල ලෙස පිටියෙන් ඉවත් කිරීමට ප්‍රභාත් ජයසූරිය සමත් වූ අතර, ඒ වන විට ඔහු පන්දු 148කදී හතරේ පහර 8ක් සහ හයේ පහරක් සමඟ ලකුණු 111ක් රැස් කර තිබිණි.
මේ තරගයේ සිව්වැනි කඩුල්ල ලෙස මාක් වුඩ් ලකුණු 22කට දවා ගැනීමට අසිත ප්‍රනාන්දු සමත් වූ අතර, මුළු ලකුණු 358දී විශ්ව ප්‍රනාන්දු විසින් මැතිව් පොට්ස් දවා ගැනීමත් සමඟ එංගලන්ත ඉනිම නිමා විය.
පන්දු යැවීමේදී අසිත ප්‍රනාන්දු කඩුලු 4ක් බිඳ දැමූ අතර, ප්‍රභාත් ජයසූරිය කඩුලු 3ක්, විශ්ව ප්‍රනාන්දු කඩුලු 2ක් සහ මිලාන් රත්නායක කඩුල්ලක් දවා ගත්හ.
අද තරගයේ සිව්වැනි දිනයයි.
****
ශ්‍රී ලංකා පළමු ඉනිම – 236 (ඕවර 74) ධනංජය ද සිල්වා 74, මිලාන් රත්නායක 72 (ක්‍රිස් වෝක්ස් 32/3, ෂොයිබ් බෂීර් 55/3, ගස් ඇට්කින්සන් 48/2)
එංගලන්ත පළමු ඉනිම – 358 (ඕවර 85.3) ජේමි ස්මිත් 111, හැරී බෘෘක් 56 (අසිත ප්‍රනාන්දු 103/4, ප්‍රභාත් ජයසූරිය 85/3, විශ්ව ප්‍රනාන්දු 73/2)
ශ්‍රී ලංකා දෙවැනි ඉනිම
නිශාන් මධුෂ්ක ප.වෝක්ස් 0
දිමුත් කරුණාරත්න ඇ.බෘෘක් ප.වුඩ් 27
කුසල් මෙන්ඩිස් ඇ.ස්මිත් ප.ඇට්කින්සන් 0
ඇන්ජලෝ මැතිව්ස් ඇ.පොට්ස් ප.වෝක්ස් 65
දිනේෂ් චන්දිමාල් නොදැවී 20
ධනංජය ද සිල්වා ක.මු.ක. ප.පොට්ස් 11
කමිඳු මෙන්ඩිස් නොදැවී 56
මිලාන් රත්නායක අ.ඩුකට් ප.රූට් 10
අතිරේක 15
එකතුව කඩුලු 6ක් දැවී (ඕවර 60) 204
කඩුලු බිඳ වැටීම: 1-0, 2-1, 3-52, 3-74, 4-95, 5-173, 6-190
පන්දු යැවීම: වෝක්ස් 12-3-34-2, ඇට්කින්සන් 10-1-38-1, බෂීර් 16-0-61-0, වුඩ් 10.2-1-36-1, පොට්ස් 11-4-26-1, රූට් 0.4-0-1-1.
