නීතිඥභාවය අත්හිටුවා තිබියදී ශ්‍රේෂ්ඨාධිකරණයට අපහාස වන අන්දමේ කරුණු ඇතුළත් දිවුරුම් ප්‍රකාශ ඉදිරිපත් කිරීම හේතුවෙන් රක්ෂිත බන්ධනාගාරගත කර සිටින ඩබ්ලිව්.ඩී. ධර්මසිරි කරුණාරත්නට එරෙහි නඩුව ඊයේ (28) කැඳවූ අවස්ථාවේදී Òබුදු අම්මෝÓ යැයි කෑ ගසමින් ශ්‍රේෂ්ඨාධිකරණ ශාලාවේ සිහිසුන්ව ඇදවැටුණේය.
අභියාචනාධිකරණ ලේඛනාගාරයට ඇතුළු වී එහි තිබූ නඩු ගොනුවක් අනවසරයෙන් ගෙන එහි තිබූ ලේඛනයක් විනාශ කිරීම මඟින් නීතිඥභාවයේ වෘත්තීය ආචාරධර්ම කඩ කර ඇති බවට ඔහුට එරෙහි නඩුව මුර්දු ප්‍රනාන්දු, අචල වෙන්ගප්පුලි සහ අර්ජුන ඔබේසේකර යන මහත්ම මහත්මීන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් හමුවේ කැඳවනු ලැබිණි.
බන්ධනාගාර නිලධාරීන් විසින් ඔහු අධිකරණය හමුවට ඉදිරිපත් කර තිබිණි.
වෘත්තීය ආචාරධර්ම කඩ කිරීම සම්බන්ධයෙන් පැමිණිල්ල කැඳවූ අවස්ථාවේදී අධිකරණ ශාලාවේ විනිසුරු මඬුල්ල ඉදිරියේ සිටගෙන සිටි ඔහු එක්වරම ශබ්ද නඟා කෑගසමින් සිහිසුන්ව ඇදවැටිණි.
එම අවස්ථාවේ උපරිමාධිකරණ ආරක්ෂක අංශය සහ බන්ධනාගාර නිලධාරීන් පැමිණ ඒ මහතා රෝද පුටුවක තබා ඉවතට රැගෙන ගියේය.
අනතුරුව එම පැමිණිල්ල ඔක්තෝබර් 30 වැනි දින විභාගයට ගැනීමට නියම කළ විනිසුරු මඬුල්ල එතෙක් ඔහු රිමාන්ඩ් භාරයට පත් කරන ලෙස නියම කළේය.
අභියාචනාධිකරණ ලේඛනාගාරයට ඇතුළු වී එහි තිබූ නඩු ගොනුවක් අනවසරයෙන් ගෙන එහි තිබූ ලේඛනයක් විනාශ කිරීම මඟින් නීතිඥභාවයේ වෘත්තීය ආචාරධර්ම කඩ කළ බවට තමාට එරෙහිව විභාග වන නඩුවකට අදාළව අධිකරණයට අපහාසාත්මක වන කරුණු ඇතුළත් ලේඛන ඉදිරිපත් කළ නීතිඥභාවය අත්හිටුවා ඇති ඩබ්ලිව්.ඩී. ධර්මසිරි කරුණාරත්න රක්ෂිත බන්ධනාගාරගත කරන ලෙස ශ්‍රේෂ්ඨාධිකරණය ඉකුත් ජූලි මස 17 වැනිදා නියෝග කරන ලදි.
අභියාචනාධිකරණ ලේඛනාගාරයේ තිබූ නඩු ගොනුවක ලේඛනයක් අනවසරයෙන් ලබාගෙන විනාශ කිරීම සම්බන්ධයෙන් මෙම පුද්ගලයාට එරෙහිව අභියාචනාධිකරණ රෙජිස්ට්‍රාර්වරයාගේ පැමිණිල්ලක් අනුව ඊට අදාළ අපරාධ නඩුව ද මාලිගාකන්ද මහේස්ත්‍රාත් අධිකරණයේ විභාග වෙමින් පවතී.
නීතිඥවරයකු ලෙස කටයුතු කළ මෙම පුද්ගලයා අදාළ ක්‍රියාව මඟින් නීතිඥ වෘත්තියේ ආචාරධර්ම කඩ කර ඇති බවට ශ්‍රේෂ්ඨාධිකරණයට තවත් නඩුවක් ගොනු කර තිබිණි. එම නඩුව මීට පෙර විභාගයට ගත් අවස්ථාවේදී මෙම පුද්ගලයාගේ නීතිඥභාවය අදාළ නඩු විභාගය අවසන් වන තෙක් අත්හිටුවීමට ශ්‍රේෂ්ඨාධිකරණය නියම කළේය.
නීතිඥභාවය අත්හිටුවා සිටින විත්තිකරු විසින් එම නඩුවට අදාළව දිවුරුම් ප්‍රකාශ සහ ලේඛන කිහිපයක් ඉදිරිපත් කර තිබිණි.
ඒවායෙහි අධිකරණය විවේචනය කරමින් සහ අධිකරණයට අපහාසාත්මක වන ආකාරයේ කරුණු ඇතුළත් කර ඇති බවට අධිකරණය මඟින් එහිදී අවධානය යොමු කරන ලදි.
එමඟින් ඔහු බරපතළ වරදක් සිදුකර ඇති බැවින් ඔහු තවදුරටත් බන්ධනාගාරගත කිරීමට ශ්‍රේෂ්ඨාධිකරණය මීට පෙර තීරණය කළේය.
නීතිඥ යලිත් විජේසුන්දර මහතා විත්තිකරු වෙනුවෙන් පෙනී සිටි අතර නියෝජ්‍ය සොලිසිටර් ජනරාල් ශනිල් කුලරත්න මහතා නීතිපතිවරයා වෙනුවෙන් පෙනී සිටියේය.
