කොළඹ ප්‍රධාන මහේස්ත්‍රාත් අධිකරණයේ නඩු භාණ්ඩ කාමරයේ ගබඩා කර තිබූ රුපියල් කෝටි 24ක් වටිනා හෙරොයින් කිලෝ 12ක් අතුරුදන් කර සාවද්‍ය පරිහරණය කළැයි කියන සිද්ධියට අදාළව අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් එම අධිකරණයේ නඩු භාණ්ඩ භාරකරු ලබන 04 වැනිදා දක්වා රඳවා තබාගෙන ප්රශ්න කිරීමට කොළඹ ප්‍රධාන මහේස්ත්‍රාත් තිළිණ ගමගේ මහතා එම දෙපාර්තමේන්තුවට ඊයේ (30) අවසර ලබා දුන්නේය.
මෙලෙස රැඳවුම් නියෝග මත රඳවා තබාගෙන ප්රශ්න කිරීමට අවසර ලබාදුන්නේ අංක 40/බී, වැඩමුල්ල කල්එළිය ලිපිනයේ පදිංචි මොහොමඩ් නියාස් මොහොමද් නදීබ් නමැති කොළඹ මහේස්ත්‍රාත් අධිකරණයේ නඩු භාණ්ඩ ගබඩාවේ හිටපු භාරකරුය.
කොළඹ මහේස්ත්‍රාත් අධිකරණයේ නඩු භාණ්ඩ කාමරයේ තිබූ හෙරොයින් ග්‍රෑම් 940යි මිලිග්‍රෑම් 321 බැගින් හෙරොයින් අඩංගු පාර්සල් දෙකක් අතුරුදන් කිරීම, ඒ සඳහා කූට ලේඛන සකස් කර විශ්වාසය කඩ කිරීම යන චෝදනා දෙක සම්බන්ධයෙන් මෙම සැකකරුට වරද පහදා දී අත්අඩංගුවට ගත් බව අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.
මෙම සැකකරු මෙවැනි ආකාරයේම නඩු භාණ්ඩ අස්ථානගත කිරීමේ සිද්ධියකට අදාළව කොළඹ අපරාධ කොට්ඨාසයෙන් අත්අඩංගුවට ගෙන වසරකට ආසන්න කාලයක් රක්ෂිත බන්ධනාගාරගත කර සිට ඇප මත මුදාහැර ඇති සැකකරුවෙක් බවද අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.
සිද්ධිය සම්බන්ධයෙන් දීර්ඝ ලෙසින් සැකකරුගෙන් ප්රශ්න කිරීමට අවශ්‍ය බැවින් දින හතක කාලයක් තම දෙපාර්තමේන්තුවේ රඳවා තබාගෙන ප්රශ්න කිරීමට අවසර ලබා දෙන ලෙසට අපරාධ පරීක්ෂණ දෙපාර්තමේන්තුව අධිකරණයෙන් ඉල්ලීය.
ඉදිරිපත් වූ කරුණු සැලකිල්ලට ගත් අධිකරණය සැකකරු ලබන 04 වැනිදා තෙක් අපරාධ පරීක්ෂණ දෙපාර්තමේන්තුවේ රඳවා තබාගෙන ප්රශ්න කිරීමට අවසර ලබා දෙමින් එදින තෙක් නඩුව කල් තැබීය.
