ගලහ පොලිසිය අසල ඊයේ (13) පාන්දර ත්‍රිරෝද රථයක් අඩි 25ක පමණ පල්ලමකට පෙරළීමෙන් එක් අයෙකු මියගොස් තවත් තිදෙනෙකු තුවාල ලබා ඇත. විනෝද චාරිකාවක් යමින් සිටි ගලහා වෙදහැට ජනපදයේ පදිංචි තරුණයි පිරිසක් රැගත් ත්‍රිරෝද රථයක් ගලහා නගරය ආසන්නයේදී පාරෙන් ඉවතට පැන නිෙවසක් තුළට පෙරළී යෑමෙන් මෙලෙස එහි ගමන් ගත් එක් අයකු මිය ගොස් තුවාල ලැබූ තිදෙනකු ගලහ රෝහලට ඇතුළත් කොට තිබේ.
මෙසේ මියගොස් ඇත්තේ උඩුදෙණිය ගෙදර කවිඳු රෝෂාන් ප්‍රේමවන්ශ නමැති 24 හැවිරිදි අවිවාහක තරුණයකි.
දොළොස් දෙනකුන් යුත් මිතුරන් පිරිසක් එක්ව ත්‍රීකුණාමලය ප්‍රදේශයේ විනෝද චාරිකාවක් යෑමට සූදානම්ව ඇති අතර ඒ සඳහා වෑන් රථයක් ගලහා නගරයෙන් යෑමට නියමිතව තිබී ඇත.
වෙදහැට නමැති ප්‍රදේශයට ගලහා නගරයේ සිට කිලෝමීටර් දෙකක් පමණ ඇති අතර මියගිය අයට අයත් ත්‍රිරෝද රථයෙන් මෙම සිව් දෙනා අලුයම හතරට පමණ ගලහ නගරයට යෑම සඳහා පිටත්ව ගොස් තිබේ.
මියගිය කවිඳුගේ සොහොයුරා වන පසිඳු දිල්ශාන් යන අය ත්‍රිරෝද රථය පදවා ඇති අතර ඔහුට නින්ද යෑම නිසා මෙම අනතුර සිදුව ඇති බව පරීක්ෂණ පවත්වන ගලහ පොලිසිය පවසයි.
මෙම ත්‍රිරෝද රථය නිවසක කාමරය අසලට පෙරළී ඇති අතර ඒ අසල කාමරවල දෙදෙනෙකු නිදා සිට ඇති බවද පොලිසිය පවසයි.
මියගිය අයගේ සිරුර ගලහා රෝහලේ ඇති අතර පශ්චාත් මරණ පරීක්ෂණ කටයුතු සදහා එය පේරාදෙණිය රෝහල වෙත රැගෙන යෑමට නියමිතව ඇත.
