ලංකාවේ ධීවරයෝ තුන්දෙනෙක් ඉන්දියාවෙන් අත්අඩංගුවට අරන්

රාමේෂ්වරම් ආසන්නයේදී ඉන්දීය මුහුදු සීමාවට ඇතුළු වූ ශ්‍රී ලාංකික ධීවරයන් තිදෙනෙකු ඉන්දීය වෙරළාරක්ෂක බලකාය විසින් අත්අඩංගුවට ගෙන ඇති බව වාර්තා වේ.

ඉන්දීය මාධ්‍ය වාර්තා කළේ, බෙංගාල බොක්ක මුහුදු ප්‍රදේශයේ සිදු කළ මුර සංචාරයක් අතරතුර ඉන්දීය වෙරළාරක්ෂක බලකාය විසින් ෆයිබර් බෝට්ටුවක සිටි එම ධීවරයින් තිදෙනා අත්අඩංගුවට ගෙන ඇති බවයි.

ඉන්දීය වෙරළාරක්ෂක බලකාය විසින් ලියාපදිංචිය සහිත (OFRP 5671 JFN) ශ්‍රී ලංකා ධීවර බෝට්ටුව සිය භාරයට ගෙන ඇත.

එලෙස අත්අඩංගුවට ගෙන ඇත්තේ කොලොම්බුතුරෙයි, නැදුන්කුලම ප්‍රදේශයේ පදිංචි 34 හැවිරිදි ආර්.නිරෝෂන්, යාපනය තලයාඩි, උඩුන්තුරේ පදිංචි 37 හැවිරිදි ටී.බාලා රමේෂ් සහ එම ප්‍රදේශයේම පදිංචි 44 හැවිරිදි පී.පුලෙයිකුමාර් යන ධීවරයින් පිරිසකි.